Ol samting bilong helpim manmeri bilong PNG i skelim baibel.

Want to view this page in English?

“Dispela man Jisas, Em i ston yupela ol wokman i bin lusim, tasol nau Em i kamap as ston. Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em.”

Ol Samting Mipela Putim

1
Nupela Tok Pisin Baibel
Nupela Tok Pisin Baibel em i Tok bilong God long nek bilong Tok Pisin. Dispela nupela Baibel i kamap bilong helpim ol manmeri klia long tok God yet i bin mekim. Wanwan buk bilong Baibel i no pinis yet, tasol planti i pinis na i stap bilong yu ken i lukim.

2
Ol Stadi Buk
Ol Baibel ves ol i no stap wan wan. Nogat. Ol i bung wantaim bilong autim stori bilong wok bilong God. Ol Stadi Buk i stap bilong helpim yu kisim as na minim bilong stori bilong God, bai yu ken i save moa long God, na save moa long laik bilong Em.

3
Autim Tok
Long dispela hap bai yu lukim ol wanwan tok mi bin autim. Sampela tok i stap long Tok Pisin, na sampela tok i stap long tok Inglis bilong PNG. God yet Em i as bilong toktok, na man i laik autim Tok bilong God, orait em i mas tokaut long God tasol.

4
Sande Baibel Toktok
Tok bilong God i gat strong bilong mekim wok insait long laip bilong ol manmeri, bilong strongim ol na bilong senisim tingting na laip bilong ol. Sande Baibel Toktok i stap bilong strongim na skulim na givim tingting long manmeri bilong God.

5
Toktok bilong Kisim Save
Sampela taim ol sios i tokaut long ol sampela samting i no stap long Baibel. Long Kisim Save, long wanwan taim, bai mi raitim ol toktok bilong putim ol sampela toktok long ples klia. Wanpela i olsem, yu ken i kisim save long stori bilong Martin Luther.

6
Gutnius Toktok
Planti manmeri i paul long gutnius bilong God long feitful wok bilong Jisas. Long Gutnius Toktok bai yu lukim ol wanwan sotpela tok i stap bilong helpim yu klia long rot bilong God long feitful wok bilong Jisas bilong God i kisim bek sin manmeri.


Stori bilong mipela.

Mi wantaim meri bilong mi i bin i stap long PNG 24 yia. Mitupela i bin sindaun long wanpela ples insait long hap Okapa insait long Eastern Highlands Provins. Long dispela hap mi bin autim gutnius bilong God. Gutnius bilong God em i stori bilong God i kisim bek sin manmeri long feitful wok bilong Jisas long diwai kros.

Gutnius mipela save autim.

Em olsem na mi bin autim gutnius na Holi Spirit i bin opim ai na ia na bel bilong ol sampela manmeri long ples na ol i tanim bel na bilip. Ol i bilip olsem, Jisas i bin feitful long bihainim olgeta tok bilong God na Em i dai, yes, Em i bihainim tru, maski Em i dai long diwai kros. Em i dai long diwai kros bilong tekewe pe bilong sin bilong ol. Ol i bilip olsem, God i save kisim bek sin manmeri long feitful wok bilong Jisas tasol. Ol i klia olsem, God i no inap tru long kisim bek ol long wanpela feitful wok bilong ol yet. Nogat. God i kisim bek ol long feitful wok Jisas i bin mekim bilong ol tasol. Em olsem na, long dispela as ol i tanim bel long pasin bilong givim baksait long God, na ol i putim bilipim na trastim bilong ol i stap olgeta long Jisas na long feitful wok Jisas i bin mekim bilong ol.

Lavim bilong God.

Na dispela kain gutnius i kamapim trupela amamas long ol. Ol i save olsem, God yet i bin singautim ol, na Krais Jisas i bin mekim wok long diwai kros bilong sevim ol, na Holi Spirit i bin opim ai na ia na bel bilong ol na i givim bilip long ol. Em olsem na ol i klia olsem, God i lavim ol na ol i no inap tru long lukim bel hat bilong God long sin na feil bilong ol. Taim ol i tingim olgeta wok God i bin mekim bilong ol, ol i kisim bikpela amamas, na bikpela tok tenkyu bilong ol i go olgeta long God.

Sios i kamap.

Ol i bilip long dispela kain gutnius, na ol i laik bung wantaim na i stap femili bilong God long ples bilong ol na holim dispela bilip. Long dispela pasin sios i bin kamap long ples. Ol i nupela manmeri i bilipim na trastim feitful wok bilong Jisas, olsem na, mi bin i stap wantaim ol na mi skulim ol long ol tok bilong Baibel.

Tok Pisin na Tok Ples.

Pastaim mi gat tingting long yusim Tok Ples bilong skulim ol manmeri long feitful wok bilong Jisas. Olsem na, pastaim mi wok long lainim Tok Ples. Tasol bihain mi senisim tingting na mi lainim Tok Pisin na mi yusim Tok Pisin. Wanpela as bilong mi senisim tingting na mi yusim Tok Pisin i olsem, mi lukim ol pikinini i lainim na yusim Tok Pisin pastaim na bihain ol i lainim Tok Ples bilong ol. Mi bin tingim olsem, i no longtaim na Tok Pisin bai i stap nambawan tok ples long PNG.

As tingting bilong websait.

Na narapela as bilong mi senisim tingting na mi yusim Tok Pisin i olsem, God yet i kamapim Tok Pisin na long rot bilong Tok Pisin planti manmeri long PNG i ken i harim Tok bilong God long feitful wok bilong Jisas. Em olsem na mi tingim olsem, wok mi mekim long Tok Pisin i ken i stap na planti manmeri nabaut long PNG i ken i yusim na kisim save long wok bilong God bilong sevim sin manmeri. Long dispela as mi kamapim dispela websait. Wok mi mekim bilong tanim Tok bilong God long Tok Pisin wantaim wok mi mekim bilong skulim ol manmeri long Tok bilong God long ples, ol dispela samting ol narapela manmeri i ken i lukim na yusim.

Bilong helpim tasol.

Mi no tingim olsem wok bilong mi i winim ol narapela manmeri. Na mi no tingim olsem Nupela Tok Pisin Baibel mi wokim i winim Buk Baibel o i winim Baibel ol narapela misin i kamapim. Nogat. Bikpela tingting bilong mi i olsem, mi laik ol manmeri bilong God i ken i klia tru long olgeta toktok God i mekim long Tok bilong God. Em olsem na, mi trai hat tasol long tanim Tok bilong God long gutpela wei bai ol manmeri i ken i klia long as na minim bilong Tok bilong God. Sapos dispela Nupela Tok Pisin Baibel wantaim ol narapela toktok mi putim long dispela websait i helpim yu, orait em i gutpela na mi amamas, na yumi wantaim yumi litimapim nem bilong God na yumi pas olgeta long Jisas na bihainim Em.

– Glenn and Beth Calderwood