1 Korin
Kirap bek bilong Krais.
15
1Ol brata, nau mi laik kirapim tingting bilong yupela long gutnius mi bin autim long yupela. Yupela i bin kisim dispela gutnius na yupela i sanap long em 2na long dispela gutnius God bai sevim yupela – sapos yupela holim strong tok mi bin autim long yupela. Tasol, nogut yupela giaman long bilip bilong yupela.
3Na tok mi bin kisim mi bin givim long yupela. Dispela tok i paslain long ol narapela tok na i olsem, Krais Em i dai long sin bilong yumi olsem Tok bilong God i tok, 4na ol i planim Em na long 3-pela de Em i kirap gen olsem Tok bilong God i tok. 5Na Em i kamap long ai bilong Sifas na bihain Em i kamap long ai bilong olgeta disaipel na ol i lukim Em. 6Na bihain Em i kamap long ai bilong ol planti brata na sista, namba bilong ol i winim 500, na wantaim ol i lukim Em. Planti bilong ol i stap yet na wanwan tasol i dai pinis. 7Na Em i kamap long ai bilong Jems, na Em i kamap long ai bilong olgeta aposel na ol i lukim. 8Na las Em i kamap long ai bilong mi na mi lukim. Ating mi olsem pikinini i bon long taim mama i no tingim. Tasol, Em i kamap long mi na mi lukim.
9Ol narapela aposel i winim mi. Na mi no gutpela man na mi kisim nem “aposel”. Long wanem, pastaim mi bin wok long distroim sios bilong God. 10Tasol, long grasia bilong God, mi stap olsem mi stap. Na grasia God i givim mi i no stap nating long mi. Nogat. Mi wok hat moa na mi winim ol narapela aposel. Tasol, i no mi. Nogat. Grasia bilong God i stap wantaim mi na i wok long mi. 11Em olsem tasol maski mi tok o ol narapela aposel i tok, mipela olgeta i autim wanpela tok, na em i dispela tok yupela i bin kisim na bilipim.
Kirap bek bilong manmeri i bilip.
12Tok mipela i autim i mekim klia olsem Krais i bin kirap bek long matmat. Na olsem wanem sampela bilong yupela i tok, man i dai pinis i no inap kirap bek? 13Sapos man i dai pinis i no inap kirap bek, orait yupela mas tok olsem, Krais i no bin kirap bek. 14Na sapos Krais i no kirap bek, orait autim tok bilong mipela i nogut na bilip bilong yupela i nogut tu. 15Na tu, dispela i minim olsem, mipela i stap giaman witnis bilong God. Long wanem, mipela i tok witnis olsem, God i bin kirapim Krais long dai. Na sapos man i dai pinis i no inap kirap bek long dai, orait God i no bin kirapim Krais long dai. 16Long wanem, sapos man i dai pinis i no inap kirap bek, orait Krais tu i no inap kirap bek. 17Na sapos Krais i no kirap bek na i stap laip, orait bilip bilong yupela i samting nating, na yupela i stap yet long sin bilong yupela. 18Long dispela pasin ol manmeri i bilipim na trastim Krais na i dai pinis, ol i lus. 19Sapos wok bilong Krais i givim hop long yumi long dispela laip na em tasol, orait ol manmeri i ken i sori tumas moa long yumi.
20Tasol, i tru, Krais i bin kirap bek long dai, na Em i olsem fes kaikai bilong ol manmeri i bilipim na trastim Em na i dai pinis. 21Long wanem, dai em i kamap long rot bilong wanpela man, na tu, kirap bek i kamap long rot bilong wanpela man. 22Long rot bilong Adam ol i save dai. Na wankain olsem, long rot bilong Krais ol bai kirap bek na i stap laip. 23Tasol i gat wei bilong em i stap. Krais i olsem fes kaikai na Em i kirap bek, na bihain, taim Krais i kam, ol manmeri bilong Krais bai kirap bek. 24Long dispela taim, pinis bilong olgeta samting bai kamap, na taim Krais i distroim ol samting bilong bosim na ol samting i gat namba na ol samting i gat pawa, Krais bai givim kingdom i go bek long han bilong Papa God. 25I tru, Krais i mas bosim na kontrolim olgeta samting inap long Em i putim olgeta birua bilong Em aninit long lek bilong Em. 26Las birua Em bai distroim em i pasin bilong i dai. 27Na God i “bin putim olgeta samting aninit long lek bilong em.” (Buk Song 8:6) Taim Tok bilong God i tok, God i putim “olgeta samting” aninit long lek bilong Krais, i klia olsem, God i no putim Em yet wantaim aninit long lek bilong Krais. Nogat. 28Na taim God i putim olgeta samting aninit long lek bilong Krais pinis, orait Pikinini Man bai i stap aninit long lek bilong God, na long dispela rot God bai i stap antap long olgeta samting olgeta.
29Em olsem na sapos i no gat pasin bilong kirap bek, orait ol manmeri i kisim baptais bilong ol man i dai pinis ol i mekim wanem? Sapos manmeri i dai pinis i no inap kirap bek, olsem wanem sampela manmeri i kisim baptais bilong ol? 30Na olsem wanem mipela i orait long fesim ol trabel na hevi olgeta taim? 31Olgeta de mi save fesim dai. Mi tok tru olsem i tru long mi autim amamas bilong mi long wok Krais Jisas, BIKPELA bilong yumi, i bin mekim long yupela long wok bilong mi. 32Long Efesus mi pait long ol wel animal. Tasol sapos hop bilong mi i olsem ol man bilong dispela graun tasol, orait mi pait nating. Sapos i tru man i dai i no inap kirap bek, orait,
“Nau yumi mas kaikai na dring na mekim amamas.
Long wanem, tumora laip bilong yumi bai ekspaia.”
33Yupela no ken i larim ol man i paulim yupela. Harim. “Sapos gutpela man i poroman wantaim man nogut, orait man nogut bai paulim gutpela man.” 34Yupela mas kisim bek gutpela tingting, na yupela mas lusim dispela sin pasin bilong yupela. Long wanem, sampela bilong yupela i no save gut long God. Mi mekim dispela tok bilong semim yupela.
Nupela bodi bilong bilip manmeri i kirap bek.
35Tasol, wanpela man bai tok olsem, “Manmeri i dai pinis bai kirap bek olsem wanem? Na bodi bilong ol bai i stap olsem wanem?” 36Dispela tok i longlong. Yu save, samting yu planim em mas i dai pastaim na bihain em bai kamap laip gen. 37Taim yu planim wit o ol narapela samting, yu no save planim bodi bilong em. Nogat. Yu planim sit tasol. 38Na God i kamapim bodi long sit. Wanem kain bodi God i makim bilong sit, orait dispela bodi bai kamap. Long kainkain sit God i givim kainkain bodi. 39Na olgeta bodi i no wankain. Nogat. Manmeri i gat narapela kain bodi, na ol animal i gat narapela kain bodi, na ol pisin i gat narapela kain bodi, na ol pis i gat narapela kain bodi. 40Na ol samting bilong antap i gat bodi bilong ol i stap, na ol samting bilong graun i gat bodi bilong ol i stap. Tasol glori bilong ol bodi bilong antap em i narapela kain na glori bilong ol bodi bilong graun em i narapela kain. 41San i gat narapela kain glori bilong em i stap, na mun i gat narapela kain glori bilong em i stap, na sta i gat narapela kain glori bilong em i stap. Na ol sta yet i gat kainkain glori bilong ol i stap.
42Na wankain olsem long manmeri i kirap bek long dai. Bodi ol i planim bai sting, tasol bodi i kirap bek bai i stap oltaim oltaim. 43Bodi ol i planim em i samting bilong sem, tasol em bai kirap bek long glori. Bodi ol i planim em i wik, tasol em bai kirap bek long pawa. 44Bodi ol i planim em i bilong dispela graun, tasol bodi i kirap bek em i bilong nupela laip bilong spirit. Sapos i gat bodi i stap bilong dispela graun, orait i gat bodi i stap bilong nupela laip bilong spirit.
45Tok bilong God i tok olsem, “Fes Adam em i kamap man i gat laip i stap.” (Jenesis 2:7) Na las Adam Em i spirit bilong givim nupela laip. 46Samting bilong nupela laip bilong spirit em i no kamap pastaim. Nogat. Samting bilong laip bilong dispela graun i kamap pastaim na bihain samting bilong nupela laip bilong spirit i kamap. 47Fes man em i bilong dispela graun na em i das samting. Na las Man Em i bilong heven. 48Hau fes man bilong dispela graun i stap, orait ol man bilong dispela graun i stap olsem em. Na hau dispela Man bilong heven i stap, orait ol manmeri bilong heven bai i stap olsem Em. 49Olsem nau mipela i stap wankain olsem dispela man bilong graun, orait bai mipela i stap wankain olsem dispela Man bilong heven.
50Ol brata na sista, mi tok klia long yupela olsem, dispela bodi bilong mit na blut i no inap i go insait long kingdom bilong God. Samting i ken i sting i no inap i go insait long samting bilong oltaim oltaim. 51Harim. Bai mi tokaut long samting i bin hait. Mipela olgeta i no inap i dai, tasol mipela olgeta bai senis. 52Taim las biugel i krai dispela samting bai kamap wantu stret. Biugel i krai na ol manmeri i dai pinis bai kirap na i stap oltaim oltaim, na mipela olgeta bai senis. 53Bodi bilong yumi i save sting, olsem na em i mas kamap bodi bilong i stap oltaim oltaim. Dispela bodi bilong i dai em i mas kamap bodi i no inap i dai. 54Taim dispela sting bodi bilong yumi i kamap bodi bilong i stap oltaim, taim dispela bodi bilong i dai i kamap bodi i no inap i dai, orait tok i stap em bai kamap tru, “God i winim dai na dai i no inap kamap moa.” (Aisaia 25:8) Olsem na,
55Hau na bai dai i winim ol manmeri?
Hau na bai dai i givim pen moa long ol?
(Hosea 13:14)
56Sin i kamapim pen bilong dai, na sin i kisim strong bilong em long lo bilong God. 57Tasol yumi ken i tok tenkyu long God. Long wanem, long wok bilong Jisas Krais, BIKPELA bilong yumi, dai i no inap winim yumi.
58Long dispela as, ol naispela brata na sista, yupela mas sanap strong na yupela no ken i larim wanpela samting i pundaunim yupela. Wok hat long wok bilong BIKPELA. Long wanem, wok yupela i mekim bilong BIKPELA i no inap lus nating.
