1 Korin
Mani bilong helpim ol manmeri bilong God long Jerusalem.
16
1Nau mi laik stori long mani yupela laik bungim bilong helpim manmeri bilong BIKPELA. Yupela ken i mekim wankain pasin mi bin tokim ol sios bilong provins Galesia. 2Long olgeta fes de bilong wik yupela olgeta wanwan yupela ken i bungim hap mani bilong yupela inap long hamas mani yupela save lukim. Orait yupela holim dispela mani i stap, na taim mi kam long yupela bilong kisim dispela mani, orait yupela no gat wok bilong painim na bungim mani. 3Em olsem na taim mi kam long yupela, ol sampela man yupela wanbel long makim ol i ken i karim dispela presen i go long Jerusalem. Bai mi givim wanpela pas long ol na pas bai tokaut klia olsem ol man i karim mani ol i husat. 4Sapos yupela tingim olsem i gutpela long mi ken i go tu, orait mipela ken wokabaut wantaim.
Wokabaut bilong Pol.
5Mi gat tingting long wokabaut long provins Masedonia pastaim na bihain mi kam long yupela. 6Mebi mi ken i stap wantaim yupela longpela taim liklik o mebi mi ken i stap wantaim yupela inap long pinis bilong taim bilong kol. Em olsem na taim mi laik wokabaut i go long ol narapela hap, orait yupela ken i helpim mi redi bilong wokabaut bilong mi. 7Mi no laik kam nau long yupela na i stap wantaim yupela liklik taim tasol. Mi laik i stap longpela taim liklik wantaim yupela, sapos BIKPELA i wanbel. 8Tasol pastaim mi bai stap hia long taun Efesus i go inap long de Pentikos. 9Long wanem, BIKPELA i bin opim rot pinis long mi bilong mekim gutpela wok bilong Em. Na planti manmeri i egensim mi.
10Taim Timoti i kamap long yupela, orait yupela mas mekim gutpela pasin long em na em i no ken i pret long wanpela samting. Em i mekim wok bilong BIKPELA olsem mi mekim. 11Long dispela as wanpela bilong yupela no ken i lukdaun long em. Na taim em i laik lusim yupela, orait yupela givim wanbel long em na helpim em na larim em i kam bek long mi. Long wanem, mi wetim em i kam wantaim ol sampela brata.
Las toktok.
12Nau mi laik stori long brata bilong yumi Apolos. Mi bin tok strong long em bai em i go long yupela wantaim ol narapela brata. Em i no laik go nau long yupela, tasol em bai go long narapela taim.
13Yupela mas was gut na sanap strong long trupela bilip. Yupela mas i stap man tru na i stap strong. 14Pasin bilong lavim i mas stiaim olgeta samting bilong yupela.
15Yupela save pinis olsem, ol hauslain bilong Stefanas ol i fes manmeri bilong Akaia i bin tanim bel na bilipim na trastim gutnius. Na ol i pas olgeta long mekim wok long ol manmeri bilong BIKPELA. Ol brata na sista, mi laik tok strong long yupela olsem, 16yupela mas i stap aninit long dispela kain manmeri na yupela mas i stap aninit long olgeta manmeri i pas long wok bilong God na i hatwok long em. 17Mi amamas taim Stefanas na Fortunatus na Akaikus i bin kam long mi. Long wanem, samting yupela no helpim mi long em ol i bin helpim mi. 18Ol i bin strongim spirit bilong mi na bilong yupela tu. Yupela mas luksave long dispela kain man na rispektim wok bilong ol.
Gritim bilong ol wanwan manmeri.
19Ol sios bilong provins Esia ol i salim gritim bilong ol long yupela. Akwila na Prisila wantaim ol manmeri bilong sios i bung long haus bilong tupela ol i salim naispela gritim bilong ol long yupela. 20Na olgeta brata na sista bilong hia ol i salim gritim bilong ol long yupela. Na taim yupela gritim yupela yet yupela ken i givim kis i holi.
21Mi Pol mi raitim dispela gritim bilong mi long han bilong mi yet.
22Sapos wanpela man i no lavim BIKPELA, orait em i ken i bagarap. BIKPELA, mi laik Yu kam.
23Grasia bilong BIKPELA Jisas i ken i stap wantaim yupela.
24Mi lavim yupela olgeta i bilipim na trastim Krais Jisas. Amen.
