1 Korin
Pol i autim tok bilong Krais i dai long diwai kros.
2
1Na mi, taim mi bin kam long yupela, ol brata, mi no yusim ol kainkain naispela toktok na ol kainkain save bilong autim tok bilong God. 2Long wanem, mi bin wokim disisen olsem, taim mi i stap wantaim yupela, orait mi no ken i bisi long ol sampela samting, nogat, mi mas bisi long Jisas Krais na dai bilong Em long diwai kros tasol. 3Taim mi bin kam long yupela, mi no gat strong na mi pret na mi guria planti. 4Na toktok mi autim na pris bilong mi, mi no mekim long ol kainkain save na long ol kainkain naispela toktok. Nogat. Mi mekim bai pawa bilong Holi Spirit yet i kamap ples klia tasol. 5Long wanem, mi no laik bilip bilong yupela i sanap long save bilong man. Mi laik bilip bilong yupela i sanap long pawa bilong God.
Trupela save i kam long Holi Spirit.
6Em olsem, tasol, bilong ol manmeri i bikpela pinis long tok bilong God, tok mipela i autim em i trupela save. Trupela save mipela i autim em i no olsem save bilong dispela graun na em i no olsem save bilong hetman bilong dispela graun. Ol dispela samting i no inap i stap na i wok long lus. 7Mipela i autim trupela save bilong God. Trupela save em i hait toktok bilong God, na pastaim Em i no putim long ples klia. Tasol taim dispela graun i no kamap yet, God i makim trupela save em i rot bilong kisim mipela i kam long glori. 8Ol hetman bilong dispela graun ol i no klia long dispela samting. Sapos ol i klia, orait ol i no inap nilim BIKPELA bilong glori long diwai kros. 9Tasol, Tok bilong God i tok olsem,
“Wanpela ai em i no bin lukim,
na wanpela ia em i no bin harim,
na wanpela bel em i no kamapim tingting
long ol samting God i wokim bilong ol manmeri i lavim Em.”
(Aisaia 64:4)
10Tasol God, long wok bilong Holi Spirit, Em i bin soim mipela.
Na Holi Spirit i save lukim olgeta samting, na Em i lukim olgeta samting i dip tumas bilong God. 11Husat i ken i save long tingting bilong wanpela man? Spirit bilong em yet i stap insait long em, em tasol em i ken i save. Na wankain olsem, wanpela man i no inap save long tingting bilong God. Nogat. Spirit bilong God yet, Em tasol Em i ken i save. 12Em olsem na mipela no bin kisim spirit bilong dispela graun. Nogat. Mipela i bin kisim Spirit i kam long God yet, bai mipela ken i klia long ol samting God i givim fri long mipela. 13Na mipela i autim dispela samting tasol. Mipela no yusim toktok ol saveman bilong dispela graun i lainim mipela. Nogat. Mipela yusim toktok Holi Spirit i bin lainim mipela. Mipela yusim tok bilong Holi Spirit bilong tisim ol trupela tok bilong Holi Spirit.
14Man i no gat Holi Spirit, em i no inap bilipim ol samting bilong Spirit bilong God. Long wanem, long tingting bilong em ol dispela samting em i longlong samting. Na em i no inap save long ol dispela samting bikos Holi Spirit i no stap long em na bai em i ken i skelim. 15Man i gat Holi Spirit em i ken i skelim olgeta samting. Tasol man i no gat Holi Spirit em i no inap skelim man i gat Holi Spirit.
16“Long wanem, husat i save tru long bel na tingting bilong Bikpela?
Na husat bai skulim Em?”
(Aisaia 40:13)
Tasol tingting bilong Krais i stap long mipela.
