1 Korin
Rausim brata i mekim pasin i pamuk pasin.
5
1Mi harim ripot olsem, i gat wanpela kain pamuk pasin i stap namel long yupela, na dispela kain pamuk pasin i no save kamap namel long ol haiden. Dispela pasin i olsem, wanpela man i kisim meri bilong papa bilong em. 2Na yupela apim yupela yet! Yupela no laik pulap long bikpela sori na rausim dispela man long kongregesen bilong yupela. 3Tasol mi, long nem bilong BIKPELA Jisas bilong yumi, mi kotim pinis dispela man i mekim dispela pasin nogut. Tru, mi i stap longwe, tasol long spirit mi i stap wantaim yupela, na mi kotim em olsem mi i stap pinis wantaim yupela. 4Olsem na, taim yupela bung na spirit bilong mi i stap na pawa bilong BIKPELA Jisas bilong yumi i stap, 5orait yupela mas putim dispela man i go long sait bilong Satan, bai olpela bel bilong em i pinis na laip bilong em i stap seif long de bilong BIKPELA.
6I no gutpela long yupela apim yupela yet. Ating yupela no save olsem, liklik hap leven bai mekim olgeta do i solap. 7Yupela mas rausim olpela leven, bai yupela i ken i stap nupela do. Na yupela i stap nupela do pinis. Long wanem, Krais Em i pikinini sipsip bilong Abrusim na Em i dai pinis. 8Em olsem na yumi bihainim pasin bilong Abrusim. Yumi no ken i kaikaim bret i gat olpela leven. Olpela leven em i pasin bilong mekim nogut long ol narapela manmeri na ol kainkain pasin nogut. Yumi kaikaim bret i no gat leven. Bret i no gat leven em i pasin i trupela pasin na trupela toktok.
9Long narapela pas mi bin raitim long yupela, mi bin tok olsem, “Yupela no ken i bung wantaim ol manmeri i mekim pamuk pasin.” 10Mi no minim olsem, yupela no ken i bungim ol manmeri bilong dispela graun i mekim pamuk pasin, na ol manmeri i mekim mangal pasin na ol i konim ol manmeri, na ol manmeri i lotuim ol aidol. Nogat. Sapos yupela no laik bungim ol dispela kain manmeri, orait ating yupela mas lusim dispela graun olgeta. 11Tasol nau mi tokim yupela olsem, yupela no ken i bung wantaim wanpela man i tok, “Mi Kristen brata bilong yupela,” tasol em i mekim pamuk pasin, o em i mangalim ol samting, o em i lotuim ol aidol, o em i tok baksait, o em i spak, o em i konim ol manmeri. Nogat. Na tu, yupela no ken i kaikai wantaim em.
12Em i no samting bilong mi bilong skelim ol manmeri i stap autsait long sios. Nogat. Tasol yupela i gat wok bilong skelim manmeri i stap insait. 13God bai skelim ol manmeri i stap autsait. Olsem na, “Rausim man nogut long kongregesen bilong yupela.” (Lo 17:7.)
