1 Korin
Pol i bekim tok bilong ol samting bilong marit.
7
1Orait, nau mi laik bekim tok yupela i bin raitim long pas. Yupela i tok, “Em i gutpela long man na meri tupela i no ken i slip wantaim.” 2Tasol, pamuk pasin i kamap bikpela. Olsem na, mobeta ol wanwan man i gat meri bilong em yet, na ol wanwan meri i gat man bilong em yet. 3Man i no ken i pasim bodi bilong em na tok “nogat” long meri bilong em, na meri i no ken i pasim bodi bilong em na tok “nogat” long man bilong em. 4Bodi bilong meri, em i no bilong em wanpela tasol. Nogat. Em bilong man bilong em tu. Na wankain olsem, bodi bilong man, em i no bilong em wanpela tasol. Nogat. Em bilong meri bilong em tu. 5Wanpela i no ken i pasim bodi bilong em na tok “nogat” long narapela. Tasol, mebi sampela taim, sapos tupela marit i wanbel, orait yutupela ken i pasim marit pasin liklik taim, bai yutupela i ken i pas olgeta long prea. Tasol bihain yutupela mas i pas gen long marit pasin. Long wanem, nogut yu no strong long kontrolim tingting bilong yu long marit pasin na Satan i grisim yu long mekim pasin i paul.
6Mi mekim dispela tok bilong tok orait long yupela long pasim marit pasin liklik taim, mi no tok olsem em i wanpela lo yupela mas bihainim. 7Long tingting bilong mi, mi laik ol manmeri i stap olsem mi. Tasol, God i givim kainkain strong long ol wanwan manmeri. Wanpela i gat strong long wanpela samting na narapela i gat strong bilong narapela samting.
8Orait, mi mekim tok nau long ol man i no marit na long ol wido meri. Sapos ol i stap singel olsem nau mi i stap, orait dispela em i gutpela. 9Tasol, sapos ol i no kontrolim bodi bilong ol yet, orait mobeta ol i marit. Nogut tingting bilong ol bilong mekim marit pasin i kilim ol. Olsem na, mobeta ol i marit.
10Orait, mi givim wanpela lo nau long ol marit manmeri. Em i no mi i givim, Em i BIKPELA i givim. Na dispela lo i olsem, meri em i no ken i lusim man bilong em. 11Tasol, sapos em i lusim man bilong em pinis, orait em mas i stap singel o em i ken i go bek long man bilong em na oraitim marit bilong em, na em tasol. Na man em i no ken i katim marit na rausim meri bilong em.
12Mi mekim tok nau long ol narapela marit manmeri. Mi yet i tok, Em i no BIKPELA. Sapos wanpela brata em i marit long meri i no bilip, na meri i wanbel long i stap wantaim em, orait em i no ken i katim marit na rausim meri bilong em. 13Na sapos wanpela sista em i marit long man i no bilip, na man i wanbel long i stap wantaim em, orait em i no ken i katim marit na lusim man bilong em. 14Long wanem, man i no bilip em i klin bikos meri bilong em, em i bilipmeri na em i klin. Na meri i no bilip em i klin bikos man bilong em, em i bilipman na em i klin. Sapos i no olsem, orait pikinini bilong yupela i no inap i stap klin. Tasol, em i olsem na ol i klin. 15Tasol, sapos man i no bilip i laik lusim bilipmeri bilong em, o meri i no bilip i laik lusim bilipman bilong em, orait em i ken i lusim. Wanpela brata o wanpela sista i no kalabus long em. God i singautim yumi bilong wokim bel isi pasin. 16Sista, yu no ken i save, pasin bilong yu bai sevim man bilong yu o nogat. Na brata, yu no ken i save, pasin bilong yu bai sevim meri bilong yu o nogat.
BIKPELA i singautim yumi long bihainim Em.
17Em olsem tasol mobeta yupela no senisim sindaun bilong yupela. Hau yupela sindaun taim BIKPELA i singautim yupela, orait yupela sindaun olsem na bihainim Em. Mi putim dispela lo long olgeta sios. 18Sapos BIKPELA i singautim wanpela man na em i man i katim skin bilong em pinis, orait em i no ken i kamap man i no katim skin bilong em. Na sapos BIKPELA i singautim wanpela man na em man i no katim skin bilong em, orait em i no ken i katim skin bilong em. 19Long wanem, man i katim skin o man i no katim skin, dispela em i samting nating tumas. Tasol, pasin bilong bihainim tok bilong God em i bikpela samting. 20Yupela wanwan, yupela i stap olsem wanem taim BIKPELA i singautim yupela, orait yupela i stap olsem tasol. 21Sapos yu i stap wanpela slev na BIKPELA i singautim yu, orait yu no ken i tingting planti. Tasol, sapos yu ken i kisim fridom bilong yu, orait yu kisim. 22Long wanem, man i stap slev na BIKPELA i singautim em, orait em i fri man bilong BIKPELA. Na wankain olsem, man i stap fri na BIKPELA i singautim em, orait em i slev bilong Krais. 23Krais i baim yupela long bikpela pe stret, olsem na, yupela no ken i larim ol man i bosim yupela. 24Em olsem na, ol brata, yupela i stap olsem wanem taim BIKPELA i singautim yupela, orait yupela i stap olsem tasol wantaim God.
Pol i mekim tok long yangpela manmeri i no marit yet.
25Orait, mi mekim tok nau long ol yangpela man na ol yangpela meri ol i makim bilong marit. Mi no kisim wanpela tok long maus bilong BIKPELA long dispela samting. Tasol mi bai autim skelim bilong mi, na long marimari bilong BIKPELA long laip bilong mi, yupela ken i trastim tok bilong mi. 26Nau i gat ol bikpela hevi i wok long kamap, na mi skelim na mi tingim olsem, hau yupela i stap nau, orait mobeta yupela i stap olsem tasol. 27Sapos ol i makim pinis wanpela meri bilong yu, orait yu no ken i lusim em. Na sapos ol i no makim pinis wanpela meri bilong yu, orait yu no ken i painim meri. 28Tasol, sapos yu gohet na marit, orait yu no mekim sin. Na sapos meri ol i makim pinis bilong marit em i gohet na marit, orait em i no mekim sin. Tasol ol manmeri i marit, ol bai lukim planti hevi, na dispela tok mi mekim em bilong sevim yupela long ol dispela hevi. 29Ol brata, mi minim olsem, taim God i makim em i sotpela. Olsem na, nau ol man i gat meri ol i mas i stap olsem ol i no gat meri. 30Na ol man i krai sori ol i mas i stap olsem ol i no krai sori. Na ol man i amamas ol i mas i stap olsem ol i no amamas. Na ol man i baim ol samting ol i mas i stap olsem ol i no gat wanpela samting bilong ol i stap. 31Na ol man i bisi long ol samting bilong dispela graun ol i mas i stap olsem ol i no bisi long dispela samting. Long wanem, ol samting nau bilong dispela graun i wok long pinis.
32Mi laik yupela i stap fri long tingting planti. Man i no marit em i ken i putim tingting bilong em i go long ol samting bilong BIKPELA na hau em i ken i mekim pasin BIKPELA i laikim. 33Na man i marit em i mas putim tingting bilong em i go long samting bilong dispela graun na hau em i ken i mekim pasin meri bilong em i laikim. 34Olsem na tingting bilong em i go long tupela samting. Na meri i no marit o yangpela meri ol i makim bilong marit, em i ken i putim tingting bilong em i go long ol samting bilong BIKPELA na hau em i ken i mekim pasin i holi long bodi na spirit bilong em. Na meri i marit em i mas putim tingting bilong em i go long samting bilong dispela graun na hau em i ken i mekim pasin man bilong em i laikim. 35Mi mekim dispela tok bilong helpim yupela na mi no minim long banisim yupela. Mi laik strongim yupela long wokabaut long rot i stret tasol na strongim yupela bai tingting bilong yupela i stap isi na yupela i ken i pas olgeta long BIKPELA.
36Sapos wanpela man i tingim olsem, “Mi no mekim stretpela pasin long meri ol i bin makim bilong mi.” Na sapos bel bilong em i kirap na em i tingim olsem, “Mi mas maritim em.” Orait, em i ken i bihainim laik bilong em. Em i no mekim sin. Tupela i ken i marit. 37Tasol, sapos wanpela man i stretim tingting bilong em yet, na ol i no fosim em na em i fri bilong skelim laik bilong em yet, na long bel bilong em, em i wokim disisen pinis, na em i no laik maritim meri ol i bin makim bilong em, orait dispela man tu em i mekim pasin i stret. 38Em olsem na, man i maritim meri ol i bin makim bilong em, em i mekim gutpela pasin. Tasol, man i no maritim meri ol i bin makim bilong em, em bai mekim pasin i gutpela moa.
39Marit i pasim meri long man bilong em i go i go olgeta. Tasol, sapos man bilong em i dai pinis, orait em i fri long maritim wanem man em i laik maritim, tasol em i mas maritim man i pas long BIKPELA. 40Long tingting bilong mi, amamas bilong meri i stap nating tasol bai winim amamas bilong meri i marit gen. Na mi tingim olsem Spirit bilong God i stap long mi tu.
