1 Korin
Ol i kaikaim ofa kaikai insait long tempel bilong ol aidol.
8
1Orait, mi mekim tok nau long kaikai ol man i ofaim long ol aidol. Toktok yupela i mekim, mipela i klia pinis. Yupela i tok, “Mipela olgeta i gat save.” Tasol, save i save kamapim bikhet pasin, na lavim i save strongim ol narapela. 2Sapos wanpela man i tingim olsem em i save, orait save bilong em i sot yet na em i gat wok yet bilong kisim save. 3Tasol man i save lavim, orait dispela man i save trutru.
4Em olsem na nau mi bai toktok long pasin bilong kaikaim ol kaikai ol man i ofaim long ol aidol. Mipela klia olsem, aidol em i samting nating olgeta na long dispela graun i gat wanpela God tasol i stap. 5Tru, i gat planti samting ol i kolim “god” na ol i kolim “bikpela”. Tasol maski ol sampela manmeri i tingim olsem ol dispela samting i stap long heven o i stap long graun, 6bilong yumi wanpela God, Papa, tasol i stap. Na long Em olgeta samting i bin kam, na bilong Em yumi i stap. Na i gat wanpela BIKPELA, Jisas Krais, tasol i stap. Na long han bilong Em olgeta samting i bin kamap na long wok bilong Em yumi gat laip.
7Tasol em i no olgeta manmeri i save long dispela samting. Sampela manmeri i bin lotu long ol aidol longpela taim pinis, olsem na, nau, taim ol i sindaun kaikaim kaikai ol man i ofaim long aidol, orait tingting bilong ol i kirap long aidol. Ol i no strong long tingting bilong ol, olsem na dispela pasin i bagarapim tingting bilong ol. 8Na, kaikai i no inap kisim yumi i kam aninit long amamas o kros bilong God. Nogat. Sapos yumi no kaikai, orait dispela i no mekim yumi i stap nogut, na sapos yumi kaikai, orait dispela i no mekim yumi i stap gut. 9Tasol, yupela mas lukaut. Nogut dispela kain fridom bilong yupela i pundaunim brata i wik. 10Long wanem, sapos brata i stap na tingting bilong em i wik, na em i lukim yupela i gat save i sindaun kaikaim kaikai insait long tempel bilong ol aidol, orait tingting bilong brata i wik bai kirap na em bai i go tu na sindaun kaikaim kaikai ol man i ofaim long aidol. 11Em olsem na dispela brata i wik, em i brata Krais i bin lusim laip bilong Em bilong sevim, save bilong yupela i distroim em. 12Taim yupela mekim sin long ol brata bilong yupela long dispela pasin bilong yupela na yupela bagarapim tingting bilong ol, orait yupela i mekim sin long Krais. 13Long dispela as, sapos samting mi kaikaim i mekim brata bilong mi i pundaun, orait mi no ken i kaikai moa dispela mit, bai pasin bilong mi i no ken i pundaunim brata bilong mi.
