1 Timoti
Pasin sios i mas mekim.
2
1Orait, nambawan samting yupela mas mekim i olsem, yupela mas mekim prea bilong olgeta manmeri na askim God long helpim ol na tok tenkyu long God long ol. 2Yupela ken i mekim prea bilong ol king na bilong olgeta man i gat wok bilong bosim manmeri. Yupela mas mekim olsem bilong yumi ken i sindaun gutpela na yumi no ken i lukim trabel, na bai yumi fri long bihainim ol gutpela wei bilong God na yumi fri long bihainim pasin God i laikim. 3Na pasin bilong mekim prea long olgeta manmeri em i gutpela, na God Bilong Sevim yumi, Em i amamas long dispela pasin. 4God i gat laik long olgeta manmeri i mas kam insait long laip na ol i mas kisim save long trupela tok. 5Long wanem, wanpela God tasol i stap na wanpela namel man i stap namel long God na manmeri. Na dispela namel man em i Krais Jisas. 6Em i givim Em yet na i stap olsem pe bilong baim na pinisim pe bilong sin bilong ol manmeri. Na long rait taim dispela samting i bin kamap ples klia. 7Na bilong dispela samting God i bin makim mi bilong putim dispela tok long ples klia na bilong mekim wok aposel. Mi mekim trupela tok, mi no giaman. Em i bin makim mi bilong tisim trupela bilip long ol lain Jentail.
8Long olgeta hap mi laik ol man i mas mekim prea. Ol i mas litimapim han i holi na mekim prea. Ol i no ken i kros na tok pait. 9Na mi laik ol meri i mas werim klos i gutpela bilong ol meri i ken i werim. Ol i no ken i werim klos bilong apim ol yet. Nogat. Ol i mas skelim gut na werim klos i gutpela bilong ol meri. Na ol i no ken i tanim gras bilong ol, na ol i no ken i werim gol o bis o klos i dia tumas. Nogat. 10Ol i mas mekim gutpela pasin na dispela i bilas bilong ol meri i laik lotuim God. 11Na meri i mas amamas long daunim em yet na i stap isi na kisim tok bilong God. 12Mi no orait long meri i ken i autim tok, na mi no orait long meri i kamap bos bilong man. Nogat. Em mas i stap isi. 13Long wanem, God i bin wokim Adam pastaim na bihain Em i bin wokim Iv. 14Na Adam i no pundaun long tok giaman. Nogat. Iv tasol i pundaun long tok giaman na i kamap sin meri. 15Tasol meri i gat wok long femili bilong em. Ol i mas holim bilip i go i go, na mekim pasin bilong lavim i go i go, na mekim pasin i holi i go i go.
