1 Timoti
Wanem kain man i ken i kamap pasta bilong sios?
3
1Wanpela tok i stap, na dispela tok yu ken i trastim. Na dispela tok i olsem, sapos wanpela man i laik kamap lida bilong sios, orait em i laikim gutpela wok. 2Orait na, man i ken i kamap lida bilong sios em mas i stap gutpela man na i no gat wanpela rong i stap we ol manmeri i tok baksait long em, na em i man bilong wanpela meri tasol, na em i man bilong sindaun isi, na em i stiaim gut tingting na pasin bilong em yet, na em i stap stret long olgeta samting, na em i amamas long mekim gutpela long ol manmeri i no wantok bilong em, na em i wanpela gutpela tisa, 3na em i no pas long ol strongpela dring bilong spak, na em i no man bilong bel hat hariap na solapim narapela manmeri, nogat, em i man bilong bel isi na mekim gutpela long narapela manmeri, na em i no tingting long mekim tok pait olgeta taim, na em i no lavim mani. 4Em i bosim na lukautim femili bilong em gutpela, na pikinini bilong em i harim na bihainim tok bilong em, na ol i rispektim em. 5Yu save, sapos em i no bosim na lukautim femili bilong em gutpela, orait hau na bai em i lukautim sios bilong God gutpela? 6Nupela man bilong bilip i no ken i kamap lida bilong sios. Long wanem, nogut em i apim em yet long tingting bilong em yet na em i pundaun na kisim hevi olsem Satan bai kisim. 7Na man i laik kamap lida bilong sios em mas i gat gutpela nem namel long ol manmeri i stap autsait long sios. Long wanem, sapos em i no gat gutpela nem olsem, orait Satan bai yusim dispela samting bilong mekim sem long em.
Wanem kain man i ken i kamap dikon bilong sios?
8Na wankain olsem, ol man i laik kamap dikon ol mas i stap gutpela man long ai bilong ol manmeri, na ol i no man bilong tupela maus, na ol i no pas long ol strongpela dring bilong spak, na ol i no mekim pasin nogut bilong pulim mani. 9Na ol i holim strong ol trupela tok i dip tumas bilong bilip na ol i holim gutpela tingting long bihainim pasin i stret. 10Pastaim yupela mas glasim gut ol man i laik kamap dikon. Na sapos ol i no gat wanpela samting i rong long laip bilong ol, orait ol i ken i kamap dikon na mekim wok. 11Na wankain olsem long ol meri bilong dikon. Ol i mas i stap gutpela meri long ai bilong ol manmeri, na ol i no meri bilong tok baksait long narapela manmeri, na ol i sindaun isi, na ol i feitful long olgeta samting. 12Ol man i laik kamap dikon ol i man bilong wanpela meri tasol, na ol i bosim na lukautim gutpela olgeta femili bilong em i stap insait long banis bilong em. 13Em olsem na ol dikon i mekim gutpela wok ol bai kisim gutpela nem na ol bai sanap strong long bilip bilong Krais Jisas.
Strongpela graun na pos bilong trupela tok.
14Mi laik kam long yu hariap, tasol mi raitim dispela stia tok nau long yu. Long wanem, 15sapos sampela samting i pasin rot bilong mi, orait yu ken i lukim dispela tok bilong mi na yu ken i klia long pasin ol hauslain bilong God i mas mekim. Na hauslain bilong God em i sios bilong dispela trupela God i gat laip. Na sios bilong God em i olsem strongpela graun na strongpela pos bilong holim trupela tok. 16Tru tumas, ol samting bilong wei bilong God i bikpela samting stret. Na dispela samting i olsem,
Em i bin kisim bodi na kamap ples klia,
na Holi Spirit i bin soim olsem, Em i Pikinini bilong God,
na ol ensel i bin lukim Em,
na ol man i bin tokaut long Em long olgeta kantri nabaut,
na planti manmeri bilong dispela graun i bin bilipim na trastim Em,
na Em i bin i go antap long heven.
