1 Timoti
Sampela manmeri bai lusim trupela bilip.
4
1Na Holi Spirit i tokaut klia olsem, bihain sampela manmeri bai lusim trupela bilip na ol bai bihainim ol spirit bilong giaman na ol bai bihainim skul bilong ol spirit nogut. 2Ol manmeri i karim dispela kain skul i kam, ol i manmeri bilong mekim tok giaman, na pasin bilong ol i no pas wantaim tok bilong ol, na gutpela tingting long bihainim pasin i stret i no save sutim bel bilong ol. Long wanem, ol i pasim bel bilong ol. 3Ol bai tambuim marit, na ol bai tambuim wan wan kaikai, em ol kaikai God i bin wokim bilong kirapim tenkyu long bel bilong yumi i bilip na i klia long trupela tok. 4Olgeta samting God i bin wokim i gutpela na yumi ken i tok tenkyu long God. Na yumi no ken i tambuim wanpela samting God i givim yumi. 5Long wanem, tok bilong God na prea bai helpim yumi yusim olgeta samting long rait we.
Gutpela wokman bilong Krais Jisas.
6Na sapos yu putim ol dispela toktok long ples klia long ol brata na susa bilong sios, orait yu bai i stap gutpela wokman bilong Krais Jisas, na gutpela wokman bilong ol trupela bilip yu bin kisim taim yu stap yangpela yet, na gutpela wokman bilong ol gutpela skul yu bin kisim na yu save bihainim. 7Yu mas givim baksait long ol giaman toktok na ol paul toktok. Na yu mas trenim yu yet long bihainim ol gutpela wei bilong God. 8Trening bilong pilai i ken i helpim bodi bilong yu. Tasol, trening bilong bihainim ol gutpela wei bilong God bai helpim yu long olgeta samting. Dispela trening i gutpela bilong helpim yu nau, na em i gutpela bilong helpim yu long laip bilong bihain tu. 9Wanpela tok i stap, na dispela tok yu ken i trastim na yu ken i kisim na holim gut. Na dispela tok i olsem, 10mipela hat wok tru na mipela resis strong, long wanem, mipela i putim hop bilong mipela i go long trupela God i gat laip, Em i God Bilong Sevim ol manmeri, na tru tumas Em i God Bilong Sevim ol manmeri i bilip.
11Yu mas autim strong ol dispela tok na skulim ol long ol dispela samting. 12Yu yangpela man, tasol yu no ken i larim wanpela man i daunim yu bilong dispela samting. Yu mas bihainim God gutpela na ol manmeri i bilip i ken i luksave long yu na ol i ken i klia long wei bilong bihainim God. Olsem na, long toktok bilong yu, na long wokabaut bilong yu, na long pasin bilong yu bilong lavim, na long bilip bilong yu, na long gutpela pasin bilong yu, yu mas soim ol long wei bilong bihainim God. 13Mi bai kam long yu. Tasol nau, yu mas wok hat long ritim Tok bilong God long ol manmeri bilong sios, na long autim tok bilong God bilong helpim ol, na long skulim ol long as bilong tok bilong God. 14God i bin givim strong long yu bilong mekim wok bilong Em, na yu no ken i slek long mekim dispela wok. Taim olgeta elda i bin putim han bilong ol long yu, wanpela man i bin mekim tok profet na em i bin tokaut long strong God bai givim yu. Long dispela taim God i bin givim strong long yu bilong mekim wok bilong Em. 15Yu mas bisi long dispela wok, na yu mas pas olgeta long ol dispela wok. Long wanem, olgeta manmeri i ken i luksave long wei yu save bihainim God. 16Yu mas lukaut gut long pasin bilong yu, na yu mas lukaut gut long trupela tok bilong bilip yu save autim. Na yu mas bihainim dispela i go i go. Long wanem, sapos yu bihainim dispela i go i go, orait yu bai sevim yu yet, na yu bai sevim ol manmeri i save harim tok bilong yu.
