2 Timoti
1
1Mi Pol mi raitim dispela pas. Mi aposel bilong Krais Jisas. Long laik bilong God mi aposel. Na dispela i pas long promis bilong laip bilong manmeri i bilip long Krais Jisas.
2Mi salim dispela pas long yu Timoti. Yu pikinini bilong mi na mi lavim yu.
Papa God wantaim Krais Jisas, BIKPELA bilong yumi, i ken i mekim grasia long yu na mekim marimari long yu na mekim bel isi long yu.
Lukautim trupela tok God i givim yu.
3Mi save tok tenkyu long God long yu. Ol tumbuna papa bilong mi i bin mekim wok bilong dispela God na mi tu mi mekim wok bilong Em, na wok bilong mi i gutpela na i no gat asua. Olgeta taim long nait na de mi save holim tingting long yu long prea. 4Mi holim tingting long aiwara bilong yu, na mi gat bikpela laik long lukim yu gen, bai mi ken i amamas. 5Mi holim tingting long trupela bilip bilong yu, em i wankain bilip i kamap pastaim long bubu mama bilong yu, Lois, na i kamap long mama bilong yu, Yunis, na mi save olsem i kamap pinis long yu. 6Long dispela as mi laik kirapim tingting bilong yu. God i bin givim strong long yu bilong mekim wok bilong Em, em i strong i stap long yu taim mi putim han antap long yu. Mi laik yu kirapim moa dispela strong bilong mekim wok bilong God. 7Long wanem, God i no givim strong long yumi bilong yumi ken i pret. Nogat. Em i givim strong bilong strongim yumi long wok bilong Em, na bilong strongim yumi long lavim, na bilong strongim yumi long bosim gut olgeta samting bilong laip bilong yumi.
8Olsem na, yu no ken i sem long gutpela toktok bilong BIKPELA bilong yumi, na yu no ken i sem long mi, kalabusman bilong Em. Nogat. Long strong bilong God yu ken i amamas long karim hevi bilong gutnius wantaim mi. 9Em i bin sevim yumi na singautim yumi, bai yumi i stap holi manmeri bilong Em. Na Em i no skelim gutpela pasin bilong yumi na Em i sevim yumi na singautim yumi. Nogat. Long laik bilong Em yet na long grasia bilong Em, Em i sevim na singautim yumi. Long bipo tru, taim dispela graun i no kamap yet, Em i bin mekim grasia long yumi i pas long Krais Jisas. 10Nau yumi bin lukim dispela grasia taim Krais Jisas Bilong Sevim yumi i kamap ples klia. Em i rausim dai, na long gutnius Em i putim laip, laip i stap oltaim oltaim, long ples klia. 11Long dispela gutnius God i bin makim mi prisa na aposel na tisa. 12Long dispela samting tasol mi kisim hevi. Tasol mi no sem. Long wanem, mi save pinis long Em, Em mi bilip long Em. Mi save olsem, Em inap tru long lukautim gut trupela tok Em i bin putim long han bilong mi, na trupela tok bai i stap gut i go i go inap long bikpela De bilong Krais i kamap. 13Timoti, yu mas holim gut trupela toktok yu bin kisim long maus bilong mi. Long bilip na lavim i pas long Krais Jisas yu mas holim gut trupela toktok. 14Long strong bilong Holi Spirit i stap insait long yumi, yu mas lukautim gut trupela toktok God i bin givim yu bilong lukautim.
15Yu save pinis, olgeta manmeri bilong provins Esia i lusim mi pinis. Figelus na Hermogenes i lusim mi tu. 16Mi laik BIKPELA i marimari long femili bilong Onesiforus. Long wanem, planti taim Onesiforus i bin strongim bel bilong mi, na em i no sem long sen bilong mi, 17na taim em i kamap pinis long taun Rom em i hat wok long painim na lukim mi. 18Mi laik BIKPELA i soim marimari bilong Em long Onesiforus long bikpela De bilong Krais. Yupela olgeta i save pinis long gutpela wok em i bin mekim taim em i stap long taun Efesus.
