Ol Provep

¹Olsem sno long taim bilong san na ren long taim bilong haves,
i no gutpela long ful i kisim ona.
²Olsem liklik pisin i save go kam olgeta taim na i no sindaun i stap,
giaman tok ol i sutim long man i no gat rong i no inap sindaun i stap.
³Wip i stap bilong ol hos, na maus ain i stap bilong ol donki,
na kanda i stap bilong paitim baksait bilong ol ful.
⁴Yu no ken i bekim toktok bilong ful long wankain toktok ful i mekim,
long wanem, yu bai i stap olsem em.
⁵Yu mas bekim toktok bilong ful long tok i sut stret long longlong pasin bilong em,
long wanem, nogut em i tingim olsem em i wanpela saveman.
⁶Sapos yu makim wanpela ful bilong karim wanpela tok i go,
orait dispela i olsem yu katim na rausim lek bilong yu, o yu dringim marasin nogut.
⁷Olsem lek bilong man i paralais i no gat strong,
provep long maus bilong ful i no gat strong.
⁸Pasin bilong givim ona long ful,
i olsem pasin man i mekim taim em i laik sutim ston long katapila tasol em i pasim ston long rop.
⁹Provep long maus bilong ful,
i olsem rop i gat nil long han bilong man i spak.
¹⁰Man i givim wok long wanpela ful o long wanpela man nating,
i olsem man i taitim banara na i sutim ol spia nabaut na bagarapim planti manmeri.
¹¹Olsem dok i save go bek na kaikaim traut bilong em,
ol ful i save go bek long longlong pasin bilong ol.
¹²Yu lukim wanpela man i tingim olsem em i man i gat trupela save, a?
Sanis bilong stretim ol ful i winim sanis bilong stretim dispela kain man.

¹³Lesman i tok, “Wanpela laion i stap autsait!
Laion i stap long rot!”
¹⁴Olsem dua i tanim long hins bilong em,
lesman i save tanim long bet bilong em.
¹⁵Lesman i save putim han bilong em long dis,
tasol em i les tumas long apim kaikai i kam long maus bilong em.
¹⁶Long ai bilong em yet lesman i tingim olsem, save bilong em
i winim save bilong 7-pela man i mekim gutpela toktok.

¹⁷Man i hariap i go insait long trabel i no trabel bilong em yet,
i olsem man i holim wanpela weldok long tupela ia bilong em.
^18-19Man i trikim neba bilong em na bihain em i tok, “Mi tok fani tasol,”
i olsem wanpela longlong man i tromoi spia bilong i dai.
²⁰Sapos i no gat paiawut, orait paia bai i dai,
na wankain olsem, sapos i no gat tok baksait, orait kros bai i dai.
²¹Olsem sakol i kirapim sit bilong paia, na diwai i kirapim paia i lait,
man bilong kros kros i save kirapim trabel.
²²Tok baksait i olsem wanpela switpela kaikai,
em i holim tru bel bilong manmeri.
²³Maus i mekim naispela toktok, tasol bel i gat tingting nogut,
i olsem dis ol i wokim long graun na karamapim long pipia bilong silva.
²⁴Man bilong hetim, long maus bilong em, em i haitim em yet,
tasol long bel bilong em, em i gat giaman i stap.
²⁵Taim em mekim naispela toktok, yu no ken i trastim em,
long wanem, 7-pela tingting nogut tru i pulap long bel bilong em.
²⁶Em i yusim naispela toktok bilong karamapim hetim pasin bilong em,
tasol pasin nogut bilong em bai i stap ples klia long ai bilong kongregesen.
²⁷Man i wokim hul, em yet bai pundaun insait long em,
na man i tantanim ston, dispela ston bai tanim na krungutim em yet.
²⁸Man bilong tok giaman, em i hetim manmeri em i giamanim,
tasol tok gris bilong em i bagarapim em.