Aposel

Jisas i promisim Holi Spirit.

1

¹Tiofilus, long fes buk mi bin raitim, mi bin tokaut long stat bilong wok na tisim bilong Jisas.  ²Na mi bin stori i go inap long taim God i kisim Em i go antap long heven.  Long dispela taim Jisas i bin givim tok long ol aposel bilong Em, em ol man Em i bin makim, na long strong bilong Holi Spirit Em i tokim ol long wanem kain wok ol i ken i mekim.  ³Pastaim Em i kisim pen na Em i dai, na bihain Em i kamap long ai bilong ol aposel na Em i mekim planti samting, bai ol i ken i save tru olsem Em i stap laip.  Long 40-pela de ol i lukim Em na Em i tokim ol long ol samting bilong kingdom bilong God.

⁴Na taim Jisas i stap wantaim ol aposel Em i tokim ol olsem, “Yupela no ken i lusim Jerusalem.  Nogat.  Yupela mas wetim promis bilong Papa.  Bipo Mi bin tokim yupela long dispela samting.  ⁵Long wanem, Jon i baptaisim ol manmeri long wara, tasol long liklik taim bai yupela i kisim baptais long Holi Spirit.”

Jisas i go antap long heven.

⁶Em olsem na taim ol aposel i bung wantaim, ol i askim Jisas olsem, “Bikpela, nau bai Yu kirapim gen kingdom bilong Israel, a?” ⁷Na Jisas i tokim ol olsem, “Dispela samting i no samting bilong yupela na bai yupela i save long taim na long de Papa i makim. Nogat. Em yet i bosim ol dispela samting. ⁸Tasol yupela bai kisim pawa taim Holi Spirit i kam long yupela, na yupela bai i stap witnis bilong Mi long Jerusalem, na long olgeta hap bilong distrik Judia na Samaria, na long olgeta 4-kona bilong dispela graun.” ⁹Na taim Jisas i pinisim dispela toktok God i kisim Em i go antap, na ol aposel i lukluk i stap, na wanpela klaut i karamapim Em na ol i no lukim Em moa. ¹⁰Na taim ol lukluk i go antap yet, wantu 2-pela man i gat waitpela klos i sanap wantaim ol. ¹¹Na tupela i tok, “Yupela ol man bilong Galili, long wanem as yupela sanap na lukluk i go antap long skai? Dispela Jisas, Em i lusim yupela na i go antap long heven, Em bai kam bek gen wankain olsem yupela i lukim Em i go long heven.”

Matias i kisim namba na wok bilong Judas.

¹²Em olsem na ol aposel i lusim maunten Oliv na ol i go bek long Jerusalem. Maunten Oliv i stap klostu long Jerusalem olsem mak bilong wokabaut bilong de Sabat. ¹³Taim ol i kamap pinis long Jerusalem ol i go long antap rum ol i save stap long em. Nem bilong ol i olsem, Pita na Jon na Jems na Andru, na Filip na Tomas, na Bartomyu na Matyu, na Jems pikinini bilong Alfius, na Saimon bilong ol lain Selot, na Judas pikinini bilong Jems. ¹⁴Ol dispela man i wanbel i stap na ol i pas wantaim bilong mekim prea. Ol meri, na Maria mama bilong Jisas, na ol brata bilong Jisas, ol i stap wantaim ol na ol i wanbel na mekim prea wantaim.

¹⁵Long dispela taim Pita i sanap namel long ol brata na em i mekim tok. Ol i kamap olsem 120 manmeri. ¹⁶Na Pita i tok, “Ol brata, Tok bilong God i kamap tru. Long maus bilong Devit Holi Spirit i bin tokaut long Judas i stiaim ol man i kam arestim Jisas. ¹⁷Judas em i wanpela bilong mipela na em i bin mekim wok wantaim mipela.” ¹⁸Dispela man Judas i baim wanpela hap graun long mani bilong sin bilong em, na long dispela graun em i pundaun na bel bilong em i bruk na olgeta insait bilong em i kam aut. ¹⁹Na ol manmeri bilong Jerusalem, long tok ples bilong ol, ol i kolim dispela graun Akeldama, na minim bilong em i olsem, “Graun bilong Blut”. ²⁰Na Pita i tok, “Long Buk Song i gat dispela kain tok i stap,

“ ‘Ples bilong em i mas i stap nating, na wanpela man i no ken i sindaun long em.’

(Buk Song 69:25)

Na dispela tok i stap tu,

“ ‘Narapela man i mas kisim namba na wok bilong em.’

(Buk Song 109:8)

²¹“Em olsem na mipela mas makim wanpela man i bin raun wantaim mipela olgeta taim Bikpela Jisas i go kam namel long mipela, ²²long taim Jon i baptaisim ol manmeri i kam long taim Jisas i lusim mipela na i go antap long heven. Mipela mas makim em na em mas i stap witnis wantaim mipela.” ²³Pita i tok pinis na ol i sanapim 2-pela man. Wanpela man em i Josep, na ol narapela nem bilong em i Barsabas na Jastus. Na narapela man ol i sanapim em i Matias. ²⁴Na ol i mekim prea na ol i prea olsem, “Bikpela, yu save pinis long bel bilong olgeta man, soim mipela wanem bilong dispela 2-pela man yu bin makim ²⁵bilong kisim ples bilong Judas na mekim wok aposel. Long wanem, Judas i bin lusim dispela wok na i go kisim ples bilong em yet.” ²⁶Na ol i mekim pasin bilong makim man na nem bilong Matias i kamap. Em olsem na Matias i kamap wanpela aposel wantaim ol narapela 11-pela aposel.