Aposel
Pita i go long Kornilius.
10
1Long taun Sisaria wanpela man i stap, nem bilong em Kornilius. Em i kepten bilong 100 soldia ol i kolim Itali regimen. 2Em i trupela man bilong lotuim God, na wantaim olgeta femili bilong em, em i pret long God. Em i save givim mani long manmeri i nidim sampela helpim. Na olgeta taim em i prea long God. 3Wanpela de, long 3 klok long apinun, em i lukim visin. Long visin em i lukim wanpela ensel bilong God i kam insait long haus na i tok, “Kornilius.” 4Na Kornilius i lukim em na i pret nogut tru na i tok, “BIKPELA, Yu laikim wanem samting?” Na ensel i tok, “Prea bilong yu na helpim bilong yu i stap olsem wanpela ofa na God i lukim. 5Nau yu mas salim sampela man i go long taun Jopa bilong kisim wanpela man i kam, nem bilong em Saimon na i gat narapela nem Pita. 6Em i stap long haus bilong wanpela man i save wokim skin bilong abus, nem bilong em Saimon, na haus bilong em i stap klostu long solwara.” 7Na taim ensel i lusim em, orait Kornilius i singautim 2-pela wokboi na wanpela soldia. Dispela soldia em trupela man bilong lotuim God na i save stap wantaim Kornilius bilong helpim em. 8Na Kornilius i tokim ol long olgeta samting ensel i bin tok, na em i salim ol i go long Jopa.
Pita i lukim visin.
9Long neks de, taim ol i wokabaut yet long rot na i kamap klostu long taun Jopa, Pita i go antap long haus bilong mekim prea, na i klostu 12 klok. 10Pita em i hangre na i laik kaikai, tasol taim ol i wok long redim kaikai em i lukim wanpela visin. 11Long visin em i lukim heven i op, na samting olsem wanpela bikpela laplap i kam daun, i olsem samting i holim 4-pela kona na i slekim em i kam daun long graun. 12Long laplap i gat ol kainkain animal, na ol kainkain palai na snek, na ol kainkain pisin i stap long em. 13Na wanpela maus i tokim Pita, “Pita, yu kirap na yu kilim na kaikai.” 14Tasol Pita i tok, “BIKPELA, nogat, mi no save kaikai samting i no holi na i no klin.” 15Na maus i toktok gen namba tu taim na i tokim Pita olsem, “Samting God i mekim klinpela yu no ken i tok em i no holi.” 16Na 3-pela taim dispela samting i kamap olsem, na laplap i go antap olgeta long heven.
17Na Pita i stap na em i tingting planti long as na minim bilong visin em i bin lukim. Em i tingting yet na ol man Kornilius i bin salim, ol i askim na painim haus bilong Saimon na ol i kamap long dua bilong banis bilong haus. 18Na ol i singaut, “Saimon, narapela nem bilong em Pita, i stap o nogat?” 19Na taim Pita i tingting yet long visin em i bin lukim, orait Holi Spirit i tokim em olsem, “Pita, 3-pela man i kam painim yu. 20Yu kirap na yu go daun na yu bihainim ol. Yu no ken i tingting planti. Long wanem, Mi bin salim ol i kam long yu.” 21Na Pita i go daun long ol na em i tok, “Mi dispela man yupela laik lukim. Yupela kam long wanem samting?” 22Na ol i tok, “Kornilius i salim mipela i kam. Em i kepten bilong 100 soldia, na em i wanpela gutpela man na i save pret long God. Olgeta manmeri Juda ol i rispektim em moa. Na wanpela Holi ensel i tokim em long salim mipela i kam long yu, bai em i ken i harim sampela tok bilong yu.” 23Orait, Pita em i invaitim ol i kam insait long haus na em i lukautim ol.
Long neks de Pita i kirap na em i go wantaim ol. Na sampela brata i stap long Jopa i go wantaim em. 24Na long neks de gen ol i kamap long taun Sisaria. Kornilius i bin singautim ol femili na frens bilong em na ol i wetim ol i stap. 25Na taim Pita i laik go insait long haus, orait Kornilius i kam pundaun long lek bilong Pita na em i lotu long em. 26Na Pita i apim em na i tokim em olsem, “Yu sanap, mi man olsem yu tasol.” 27Na taim Pita i toktok wantaim em, em i go insait, na em i lukim planti manmeri i bung i stap. 28Na Pita i tokim ol olsem, “Yupela save pinis, i tambu long wanpela man Juda i sindaun wantaim o visitim ol manmeri bilong narapela lain. Tasol God i soim mi pinis mi no ken i tok wanpela man i no holi na i no klin. 29Em olsem na taim ol i singaut long mi, orait mi no gat toktok na mi kam tasol. Nau mi laik askim yupela, long wanem as yupela singautim mi?”
30Na Kornilius i tok, “Long 4-pela de bipo, long 3 klok, em olsem taim nau yumi i stap long em, mi stap long haus bilong mi na mi mekim prea. Na wanpela man i sanap long ai bilong mi na klos bilong em i lait olgeta. 31Na em i tok, ‘Kornilius, God i harim prea bilong yu, na helpim bilong yu i stap ples klia long ai bilong Em. 32Em olsem na yu salim sampela man i go long taun Jopa bilong singautim wanpela man, nem bilong em Saimon na i gat narapela nem Pita. Em i stap long haus bilong wanpela man i save wokim skin bilong abus, nem bilong em Saimon, na haus bilong em i stap klostu long solwara.’ 33Em olsem na wantu mi salim ol i go bilong singautim yu, na yu gutpela man na yu kam. Na long dispela as nau mipela olgeta i bung i stap long ai bilong God bilong harim olgeta tok BIKPELA i tokim yu long mekim.”
Ol Jentail manmeri i harim gutnius.
34Em olsem na Pita i opim maus bilong em na i tok, “Tru tumas, nau mi save, God i no save fevoritim wanpela lain manmeri. Nogat. 35Em i ken i kisim manmeri bilong olgeta lain manmeri sapos ol i pret long Em na i mekim pasin i rait long mekim. 36Yupela save long tok God i salim i kam long ol lain Israel, em i gutnius i tokaut long pis i kamap long wok bilong Jisas Krais. Na Jisas Krais Em i BIKPELA bilong olgeta samting. 37Yupela save long ol samting i bin kamap long hap bilong Judia, na i stat long distrik Galili, bihain long Jon i autim tok bilong kisim baptais. 38God i kapsaitim Holi Spirit na pawa long Jisas bilong taun Nasaret bilong makim Em. Na Em i go nabaut na Em i mekim ol gutpela pasin na Em i oraitim ol man Satan i holim. Long wanem, God i stap wantaim Em. 39Na mipela i bin witnisim olgeta samting Em i bin mekim long kantri bilong ol lain Juda na long Jerusalem. Ol i bin hangamapim Em long wanpela diwai na kilim Em i dai. 40Tasol, long 3-pela de God i kirapim Em gen na i stap ples klia. 41Em i no i stap ples klia long ai bilong olgeta manmeri. Nogat. Em i stap ples klia long ai bilong mipela God i bin makim bilong witnisim Em. Em i kirap na mipela i bin kaikai na dring wantaim Em. 42Na Jisas i tokim mipela olsem, ‘Yupela autim tok long ol manmeri na yupela tok klia olsem, God i makim Jisas na Em i stap jas bilong man i gat laip na bilong man i dai pinis.’ 43Olgeta profet i tokaut long Em, na ol i tok olsem, ‘Olgeta manmeri i bilipim na trastim Em, bai God i fogivim sin bilong ol long nem bilong Em.’ ”
Holi Spirit i kam daun long ol Jentail.
44Na taim Pita i autim dispela tok yet, orait Holi Spirit i kam daun long olgeta manmeri i harim tok. 45Na ol bilipman i bin kam wantaim Pita, ol i man bilong lain bilong katim skin, ol i kirap nogut bikos presen bilong Holi Spirit i bin kapsait long ol Jentail manmeri tu. 46Long wanem, ol i harim ol i yusim tok ples bilong ol narapela manmeri bilong litimapim nem bilong God. Orait, Pita i tokaut olsem, 47“Husat i ken i sotim wara bilong baptaisim ol dispela manmeri? Ol i kisim Holi Spirit olsem mipela i bin kisim.” 48Em olsem na Pita i tokim ol long kisim baptais long nem bilong Jisas Krais. Na ol i askim Pita long em i stap wantaim ol sampela de moa.
