Aposel

Herot i kilim Jems na i kalabusim Pita.

12

¹Long dispela taim king Herot i wok long bagarapim ol sampela manmeri bilong sios. ²Long sod em i kilim i dai Jems brata bilong Jon. ³Na taim em i lukim dispela pasin bilong em i amamasim ol lain Juda, orait em i arestim Pita tu. Na em i taim bilong Bret i No Gat Yis. ⁴Orait, em i holim Pita pinis na em i kalabusim em, na em i makim 4-pela grup soldia i gat 4-pela soldia i stap long em, bilong wokim sikuriti long em. Herot i tingting long kisim Pita i kam long ai bilong ol manmeri bihain long taim Abrusim. ⁵Em olsem na Pita i stap long kalabus. Tasol sios i mekim strongpela prea long God long helpim em.

Ensel i lusim Pita lo kalabus.

⁶Orait na long de Herot i laik kisim Pita i kam long ai bilong ol manmeri, long nait, Pita i slip i stap namel long 2-pela soldia, na em i pas long tupela long 2-pela sen, na 2-pela soldia i sanap i stap sikuriti long dua bilong kalabus. ⁷Na wantu wanpela ensel bilong BIKPELA i kamap na em i sanap klostu long Pita, na lait i pulap insait long sel. Em i paitim banis bilong Pita na i kirapim em, na em i tok, “Hariap na kirap.” Na sen i lusim han bilong Pita na i pundaun. ⁸Na ensel i tokim em olsem, “Pasim klos bilong yu na su bilong yu.” Na Pita i mekim olsem. Na ensel i tok, “Pasim longpela kolsiot bilong yu na bihainim mi.” ⁹Na Pita i bihainim em i go autsait. Tasol Pita em i no save dispela samting ensel i mekim em i trupela samting i kamap na em i tingim olsem em i lukim visin. ¹⁰Na taim tupela i abrusim ol fes soldia na ol sekon soldia i save sikuriti long ol dua, tupela i kamap long dua bilong i go insait long taun. Na dispela dua, em yet i op na i larim tupela i go insait long taun na tupela i wokabaut long wanpela rot. Na wantu ensel i lusim Pita. ¹¹Na taim tingting bilong Pita i kamap klia, em i tok olsem, “Nau mi save tru. BIKPELA i salim wanpela ensel bilong Em i kam bilong rausim mi long Herot na bilong sevim mi long ol samting ol Juda manmeri i laik Herot i mekim long mi.”

¹²Taim Pita i kisim dispela tingting pinis, orait em i go long haus bilong Maria, mama bilong Jon narapela nem bilong em Mak. Long haus ol planti manmeri i bung i stap na ol i mekim prea. ¹³Na taim Pita i noknok long dua, wanpela wokmeri, nem bilong Roda, i kam bilong opim dua. ¹⁴Tasol taim em i save olsem nek em i harim em i nek bilong Pita, em i amamas, tasol em i no opim dua. Nogat. Em i ran i go na i tokim ol manmeri, “Pita i sanap long dua.” ¹⁵Na ol i tokim Roda olsem, “Yu longlong.” Tasol em i strong na i tok, “Tru tumas Pita i sanap long dua.” Na ol tu ol i strong na i tok, “Em i ensel bilong em tasol.” ¹⁶Tasol Pita i noknok i go yet, na taim ol i opim dua na lukim em, ol i kirap nogut. ¹⁷Tasol Pita i litimapim han bilong em bilong ol i mas pasim maus. Na em i tokim ol long olgeta samting BIKPELA i mekim bilong rausim em long kalabus. Na em i tok, “Yupela go autim dispela tok long Jems na long ol brata.” Na em i lusim ol na em i go long narapela hap.

¹⁸Orait na taim san i kamap i gat bikpela nois i kamap namel long ol soldia. Long wanem, Pita i lus pinis. ¹⁹Na Herot i wok long painim Pita tasol em i no lukim. Olsem na em i kotim ol soldia i sikuriti long dua bilong kalabus na em i tok, “Kilim ol i dai.” Na Herot i lusim distrik Judia na em i go daun long taun Sisaria na i stap sampela taim long dispela hap.

Herot i dai pinis.

²⁰Na Herot i gat bikpela kros long ol manmeri bilong taun Tair na Saidon. Em olsem na ol i pasim toktok na ol i laik bungim Herot na mekim wanbel wantaim em. Long wanem, ol i save baim kaikai long distrik Herot i save bosim. Na ol i bin kisim sapot bilong Blastus, em man bilong bosim haus bilong Herot. ²¹Long de Herot i bin makim, em i pasim klos bilas bilong king na em i sindaun long sia king na em i mekim bikpela toktok long ol. ²²Na olgeta manmeri i mekim bikmaus olsem, “Mipela no harim maus bilong man, nogat, mipela harim maus bilong wanpela god.” ²³Na wantu wanpela ensel bilong BIKPELA i paitim em na i pundaun. Long wanem, em i no givim biknem long God. Na ol liklik snek i kaikaim em na em i dai pinis.

²⁴Tasol tok bilong God i gat strong na i ran i go moa yet.

²⁵Na Barnabas na Sol i pinisim wok bilong tupela long Jerusalem na tupela i go bek gen long taun Antiok. Na tupela i kisim Jon narapela nem bilong em Mak, i go wantaim.