Aposel

Pol i go long Jerusalem.

21

¹Na mipela lusim ol na mipela kalap long sip na i sut stret i go long ailan Kos. Long neks de mipela i go kamap long ailan Rodes. Mipela i lusim Rodes na i go kamap long taun Patara. ²Long Patara mipela lukim wanpela sip i laik i go long distrik Fonisia, na mipela kalap long dispela sip na i go. ³Mipela lukim ailan Saiprus long han kais, na mipela abrusim na i go kamap long provins Siria. Na sip i lusim mipela long taun Tair, long wanem, sip i gat wok long lusim kago long dispela taun. ⁴Na mipela i go painim ol sampela disaipel na mipela i lukim na mipela i stap 7-pela de wantaim ol. Na Holi Spirit i bin tokim ol, na ol i tokim Pol, “Yu no ken i go long Jerusalem.” ⁵Orait na 7-pela de i pinis na mipela i lusim ol. Na olgeta disaipel wantaim ol meri na pikinini bilong ol i go lusim mipela autsait long taun. Long nambis mipela olgeta i brukim skru na mipela prea wantaim. ⁶Na mipela olgeta i tok gutbai, na mipela kalap long sip na ol i go bek long haus bilong ol.

⁷Orait na mipela i lusim Tair na i go kamap long taun Tolemes. Na mipela bungim ol brata na mipela i stap wanpela de wantaim ol. ⁸Long neks de mipela lusim Tolemes na mipela i go kamap long taun Sisaria. Na mipela i go long haus bilong Filip na mipela i stap wantaim em. Filip i mekim wok evanselis na em i wanpela bilong ol 7-pela. ⁹Em i gat 4-pela pikinini meri na ol i no marit. Na ol i save mekim tok profet. ¹⁰Mipela i stap sampela de pinis na wanpela profet, nem bilong em Agabus, i lusim distrik Judia na i kam daun long Sisaria. ¹¹Na em i kam long mipela, na em i kisim let bilong Pol na em i pasim lek na han bilong em yet long let bilong Pol. Na em i tok, “Holi Spirit i tok, ‘Long Jerusalem ol man Juda bai mekim olsem long papa bilong dispela let na ol bai givim em i go long han bilong ol Jentail.’ ” ¹²Taim mipela i harim dispela tok, mipela wantaim ol manmeri i stap wantaim mipela i tokim Pol olsem, “Plis, yu no ken i go long Jerusalem.” ¹³Na Pol i bekim tok, “Bilong wanem yupela i krai krai na i mekim bel bilong mi hevi tu? Mi redi pinis na ol i ken i kalabusim mi. Na mi redi tu long i dai long Jerusalem bilong difenim nem bilong BIKPELA Jisas.” ¹⁴Taim mipela i lukim Pol i no inap senisim tingting, orait mipela i lusim na mipela tok, “Laik bilong Bikpela tasol i mas kamap.”

¹⁵Sampela de i go pinis na mipela i redim ol samting na mipela i go antap long Jerusalem. ¹⁶Na ol sampela disaipel bilong taun Sisaria i go wantaim mipela. Ol i kisim mipela i go long haus bilong Nason, wanpela man bilong ailan Saiprus na em i wanpela bipo disaipel. Na mipela i stap long haus bilong em.

Pol i visitim Jems.

¹⁷Taim mipela kamap long Jerusalem ol brata i amamas na i kisim mipela. ¹⁸Long neks de Pol i go wantaim mipela long Jems. Na olgeta elda bilong sios i bung wantaim Jems. ¹⁹Pol i tok gude long ol pastaim na em i tokim ol long olgeta wan wan samting God i bin mekim namel long ol Jentail long wok bilong em. ²⁰Taim ol i harim tok bilong Pol ol i litimapim nem bilong God. Na ol i tok, “Brata, yu save, ol planti tausen manmeri Juda ol i bilip, na ol i strong moa long bihainim ol samting bilong lo. ²¹Ol i bin harim tok win olsem, ol manmeri Juda i sindaun wantaim ol Jentail manmeri yu save skulim ol long lusim lo bilong Moses. Ol i harim olsem, yu save tokim ol dispela manmeri na ol i no ken i katim skin bilong pikinini bilong ol na ol i no ken i bihainim ol kastem pasin bilong mipela. ²²Olsem na, bai yumi mekim wanem? Ol bai save olsem yu kam pinis. ²³Orait, yu mas harim tok bilong mipela. Mipela i gat 4-pela man i stap aninit long wanpela promis. ²⁴Kisim ol dispela man na yu bihainim pasin bilong mekim klin wantaim ol, na yu baim abus bilong ofa bilong ol, na bai ol i ken i rausim gras bilong ol long resa. Sapos yu mekim olsem, orait olgeta manmeri bai save olsem, ol tok ol i bin harim long yu i no tru na yu save bihainim ol samting bilong lo. ²⁵Tasol, long sait bilong ol Jentail manmeri i bilip, mipela i bin kamapim disisen na mipela i bin salim tok long ol olsem, “Yupela no ken i kaikaim kaikai ol man i bin ofaim long ol aidol, na yupela no ken i kaikaim blut, na yupela no ken i kaikaim abus ol man i pasim nek bilong kilim i dai, na yupela lusim ol pasin i pamuk pasin.” ²⁶Em olsem na long neks de Pol i kisim dispela 4-pela man na olgeta i bihainim pasin bilong mekim ol klin, na ol i go insait long tempel na tokim ol pris long wanem de ol bai fulfilim ol dispela pasin na bai ol i kam na mekim ofa bilong ol wan wan.

Ol i arestim Pol long tempel.

²⁷Na taim dispela 7-pela de klostu i laik pinis, ol man Juda bilong provins Esia i lukim Pol insait long tempel, na ol i kirapim ol manmeri na ol i holim Pol. ²⁸Na ol i bikmaus, “Yupela ol man Israel, helpim mipela! Dispela man hia, em i man i save skulim olgeta man long olgeta hap long daunim lain bilong mipela na daunim lo bilong mipela na daunim dispela tempel. Na tu, em i bin kisim ol man Grik i kam insait long tempel na i mekim dispela holi ples i kamap doti.” ²⁹Ol i sutim dispela tok long Pol bikos ol i bin lukim Pol i raun long taun wantaim Trofimus, em wanpela man bilong taun Efesus, na ol i tingim Pol i bin kisim em i kam raun insait long tempel tu. ³⁰Em olsem na olgeta manmeri bilong taun i kirap nogut na ol i ran i kam wantaim na ol i holim Pol na ol i pulim em i go autsait long tempel, na wantu ol man i pasim dua bilong tempel. ³¹Na ol i laik kilim Pol na ol i wok long paitim em. Tasol komanda bilong ami bilong Rom i harim tok olsem, ol Jerusalem i kirapim bikpela pait. ³²Na wantu em i kisim ol soldia na ol kepten bilong ol 100 soldia na em i ran i go daun long ol. Na taim ol manmeri i lukim komanda wantaim ol soldia, ol i lusim Pol na ol i no paitim em moa. ³³Na komanda i kamap long Pol na em i arestim em. Em i givim oda long pasim Pol long 2-pela sen. Na em i askim ol manmeri, “Dispela man em i husat na em i bin mekim wanem?” ³⁴Sampela bilong ol manmeri i bikmaus wanpela tok, na sampela bilong ol i bikmaus narapela tok. Ol i mekim planti toktok tumas na Komanda i no kisim trupela tok. Olsem na, em i givim oda long kisim Pol i go insait long haus ami. ³⁵Ol manmeri i kirap nogut na ol i subim subim tumas na ol soldia, taim ol i kamap long lata bilong haus, ol i karim Pol i go antap. ³⁶Long wanem, ol planti manmeri i bihainim ol i go na ol i bikmaus olsem, “Kilim em i dai.”

Pol i toktok long ol manmeri.

³⁷Na ol soldia i laik kisim Pol i go insait long haus bilong ami, tasol Pol i tokim komanda, “Sapos i orait, mi laik mekim liklik toktok long yu.” Na komanda i tok, “Yu save long tokples Grik, a? ³⁸Mi tingim yu man Isip i bin kirapim pait long gavman na yu bin kisim ol 4000 man, em ol man bilong kilim man i dai, na yu bin kisim ol i go bung long ples i no gat man.” ³⁹Na Pol i tok, “Nogat. Mi man Juda. Mi sitisen bilong taun Tarsus, long provins Silisia. Taun bilong mi i gat nem. Plis, mi laik toktok long ol manmeri pastaim.” ⁴⁰Na komanda i tok i orait na Pol i sanap long lata na em i litimapim han bilong em. Na taim olgeta manmeri i pasim maus, orait Pol i toktok long ol long tokples Hibru. Na em i tok,