Aposel
Pol i laik Sisar i harim kot.
25
1Na taim Festus i kam pinis long provins, em i stap 3-pela de na em i lusim taun Sisaria na i go long Jerusalem. 2Na ol hetpris na ol bikman bilong ol Juda ol i putim ples klia olgeta toktok bilong ol bilong kotim Pol. Na ol i askim Festus 3long amamasim ol na salim Pol i kam long Jerusalem. Long wanem, ol i laik hait na kilim Pol i dai long rot. 4Na Festus i tok, “Pol i kalabus i stap long Sisaria na long liklik taim tasol bai mi go daun long Sisaria. 5Olsem na, ol man bilong yupela i gat namba ol i ken i go daun wantaim mi. Na sapos dispela man i gat rong, orait ol i ken i putim tok bilong ol i kam ples klia long kot.”
6Na Festus i stap 8-pela o 10-pela de moa long Jerusalem na em i go daun long taun Sisaria. Long neks de em i kisim sia bilong em long kot na em i givim oda long kisim Pol i kam. 7Taim Pol i kam pinis, ol Juda, em ol Juda i bin lusim Jerusalem na i kam, ol i raunim em na ol i mekim planti strongpela tok bilong kotim Pol. Tasol ol i no inap soim tok bilong ol i tru. 8Na Pol i difenim em yet na em i tok, “Mi no bin mekim wanpela rong long lo bilong ol Juda o long tempel o long Sisar.” 9Tasol, Festus i laik amamasim ol Juda na em i tokim Pol, “Yu laik i go long Jerusalem na mi harim kot bilong yu long dispela hap o nogat?” 10Tasol Pol i tok, “Mi sanap nau long wanpela kot bilong Sisar na dispela kot em i rait kot bilong harim kot bilong mi. Mi no bin mekim wanpela rong long ol Juda na yupela save pinis. 11Na sapos mi gat rong na mi mekim wanpela pasin we lo i ken i makim mi bilong i dai, orait mi no inap traim na abrusim dispela dai. Tasol, sapos toktok bilong ol bilong kotim mi i no gat as bilong em i stap, orait i no gat wanpela man i ken i putim mi i go long han bilong ol. Mi laik Sisar i harim kot bilong mi.” 12Na Festus i toktok wantaim ol kaunsil pastaim, na em i tok, “Yu laik Sisar i harim kot bilong yu, orait bai yu go long Sisar.”
Pol i sanap long Agripa na Bernis.
13Na bihain liklik King Agripa, wantaim susa bilong em Bernis, tupela i kamap long taun Sisaria bilong mekim tok amamas long Festus. 14Tupela i stap planti de, olsem na Festus i tokim King Agripa long olgeta toktok long kot bilong Pol. Na em i tok, “Feliks i bin larim wanpela man i stap long kalabus. 15Na taim mi go long Jerusalem ol hetpris na ol bikman bilong ol Juda ol i putim ples klia olgeta toktok bilong ol bilong kotim em, na ol i askim mi long makim em bilong i dai. 16Mi bin tokim ol, ‘Em i no kastem pasin bilong mipela Rom long kilim man nating. Man i gat kot em i mas sanap long ai bilong ol man i kotim em na em i gat sanis bilong bekim toktok na difenim em yet.’ 17Em olsem na taim ol i kam long hia mi no skruim taim. Long neks de mi kisim sia bilong mi long kot na mi givim oda long kisim Pol i kam. 18Na taim ol man i kotim em ol i sanap, mi tingim ol bai putim ples klia ol sampela pasin nogut bilong em, tasol nogat. 19Ol i kotim em long ol sampela samting bilong lotu bilong ol, na ol i toktok long wanpela man i dai pinis, nem bilong Em Jisas, tasol Pol i tok Em i stap laip. 20Mi laik painimaut as bilong dispela toktok, tasol mi paul na mi no inap. Olsem na mi askim Pol, ‘Yu laik i go long Jerusalem na stretim kot bilong yu long dispela hap o nogat?’ 21Tasol em i no laik na em i tok em i gat laik long i stap long kalabus na Sisar i harim kot bilong em. Olsem na mi givim oda long kalabusim em i stap pastaim na mi ken i salim em i go long Sisar.” 22Na Agripa i tokim Festus, “Mi laik harim tok bilong dispela man.” Na Festus i tok, “Tumora yu ken i harim.”
23Em olsem na long neks de Agripa na Bernis i wokim bikpela bilas na i kam. Na tupela wantaim ol komanda bilong ami na ol bikman bilong taun ol i go insait long haus bung. Na taim Festus i givim oda pinis, orait ol i kisim Pol i kam. 24Na Festus i tok, “King Agripa, na yupela olgeta man i stap wantaim mipela, yupela i lukim dispela man. Olgeta lain manmeri bilong Juda, long Jerusalem na long hia tu, ol i askim mi, na ol i mekim bikmaus olsem, ‘Em i no ken i stap laip.’ 25Tasol mi skelim em na mi no tingim em i gat rong we mi ken i makim em bilong i dai. Em yet i tok long mi salim em i go long Sisar, na mi mekim disisen na mi laik salim em i go. 26Tasol mi no klia gut long wanem samting bilong em mi ken i raitim long pas i go long Bikpela bilong mi. Long dispela as mi kisim em i kam long yupela, na i kam long yu King Agripa, bai yumi skelim em na mi ken i save na raitim toktok long pas. 27Long wanem, i no gutpela long mi salim kalabus man i go na mi no raitim pas na tokaut klia long as bilong kot bilong em.
