Aposel

Sip i kisim Pol i go long Rom.

27

¹Na taim ol i pasim tok pinis long mipela i go long kantri Itali long sip, orait ol i putim Pol wantaim ol narapela kalabusman long han bilong wanpela kepten, nem bilong em Julius, na em i kepten bilong 100 soldia ol i kolim Sisar regimen. ²Na mipela i kalap long wanpela sip bilong taun Adramitium. Dispela sip i laik i go long ol wan wan taun long nambis bilong provins Esia. Aristarkus bilong taun Tesalonaika long provins Masedonia em i go wantaim mipela. Orait, mipela i kalap pinis na sip em i go. ³Long neks de mipela i kamap long taun Saidon. Julius i mekim gutpela pasin long Pol na em i larim Pol i stap wantaim ol frens bilong em bai ol i ken i lukautim em. ⁴Na mipela lusim Saidon, na win em i no helpim mipela gut, olsem na mipela i raun i go not long ailan Saiprus. ⁵Na taim mipela i brukim bikpela solwara mipela abrusim provins Silisia na Pamfilia na mipela i go kamap long taun Maira bilong provins Lisia. ⁶Long Maira kepten bilong 100 soldia i makim narapela sip, em wanpela sip bilong taun Aleksandria i laik i go long kantri Itali, na em i kisim mipela i go long em. ⁷Na dispela sip i go isi isi tasol na i hatwok na bihain long sampela de mipela i kamap klostu long taun Nidus. Tasol win i no larim mipela i go moa long dispela rot, olsem na mipela lusim na i raun i go saut long ailan Krit klostu long hap Salmone. ⁸Na sip i hatwok i go na mipela i raun i go klostu long nambis bilong Krit na i go kamap long wanpela ples ol i kolim Gutpela Pasis na em i klostu long taun Lasea.

⁹Na planti de i lus pinis, na wokabaut bilong sip long solwara i densaras tumas bikos gutpela taim em i ekspaia pinis. Na taim bilong Tambuim Kaikai i pinis tu. Em olsem na Pol i tokim ol, ¹⁰“Ol bikman, mi skelim na mi tingim olsem, sapos yumi kalap long sip na i go, yumi bai kisim bagarap tasol, na planti samting bai lus, ol kago wantaim sip, na laip bilong yumi tu.” ¹¹Tasol kepten bilong 100 soldia em i no harim tok bilong Pol na em i harim tok bilong draiva na oana bilong sip tasol. ¹²Na pasis sip i stap long em, em i no gutpela ples bilong sip i stap long taim bilong bikpela kol. Em olsem na ol i tok, “Yumi go, na yumi traim na kamap long taun Finiks, na yumi stap long dispela hap na wetim taim bilong bikpela kol i pinis. Finiks em i wanpela gutpela pasis bilong ailan Krit.

Bikpela win i kirapim solwara.

¹³Na taim wanpela gutpela liklik win i kamap, ol i tingim olsem dispela win bai helpim ol i go kamap long taun Finiks. Em olsem na ol i kamapim anka bilong sip na sip i raun i go klostu long nambis bilong ailan Krit. ¹⁴Tasol i no longpela taim na wanpela bikpela win i kirap, em ol i kolim win not-is, na dispela win i strong tumas i kam daun long ailan Krit. ¹⁵Na dispela win i sakim sip na sip i no inap winim, olsem na mipela i larim sip i go long laik bilong win tasol. ¹⁶Na dispela win i karim mipela i go saut long hapsait bilong wanpela liklik ailan, nem bilong em Kauda, na win i slek liklik, tasol mipela i hat wok yet long stretim laip-bot. ¹⁷Taim mipela i pulim laip-bot i kam antap pinis, orait ol i pasim ol rop aninit long sip bilong strongim em. Na ol i pret as bilong sip bai bamim wesan bilong ples Sairtis, olsem na ol i tromoi anka samting long wara, na ol i larim sip i ran olsem. ¹⁸Na win na ren na solwara i wok long bagarapim sip. Olsem na long neks de ol i stat na tromoi ol kago. ¹⁹Long de namba 3, long han bilong ol yet, ol i tromoi olgeta rop na sel na ol samting bilong sip. ²⁰Bikpela win na ren nogut tru i sakim mipela na planti de mipela no lukim san o ol sta. Em olsem na mipela givap na mipela tingim olsem mipela i lus pinis.

²¹Na longpela taim tumas ol i no kaikai. Na Pol i sanap namel long ol na em i tok, “Yupela ol man, sapos yupela i bin harim tok bilong mi na yupela no lusim ailan Krit, orait yumi no inap kisim dispela bagarap na ol samting i lus. ²²Tasol mi laik yupela mas i stap strong. Long wanem, wanpela bilong yupela i no inap lusim laip bilong em. Sip tasol bai bagarap. ²³Long biknait yet wanpela ensel bilong God i sanap long ai bilong mi. Dispela God, mi bilong Em na mi lotuim Em. ²⁴Na ensel i tok, ‘Pol, yu no ken i pret. Yu mas sanap long ai bilong Sisar. Na harim, God i givim yu pinis olgeta man i stap wantaim yu long sip na ol bai stap laip.’ ²⁵Yupela ol man yupela kisim strong. Mi bilipim na trastim God long mekim ol samting olsem ensel i bin tokim mi. ²⁶Tasol sip bilong yumi i mas bamim wesan bilong wanpela ailan.”

²⁷Taim 14-pela nait i kam i go pinis, na win i sakim mipela i go yet long bikpela solwara Mediterenian, long biknait ol boskru i tingim sip i kamap klostu long wanpela ailan. ²⁸Em olsem na ol i tromoi meta, na dip bilong wara em i 40 mita. Na sip i go liklik moa na ol i tromoi meta gen, na dip bilong wara em i 30 mita. ²⁹Mipela pret as bilong sip bai bamim ol bikpela ston, olsem na long stan bilong sip ol i tromoi 4-pela anka i go daun long wara, na ol i prea na wetim san i kamap. ³⁰Na ol boskru i laik ranawe long sip. Olsem na ol i putim laip-bot i go daun long wara, na ol i giaman long ol i laik putim aut ol sampela anka long poret bilong sip. ³¹Tasol Pol i tokim kepten bilong 100 soldia na ol soldia tu, “Sapos ol boskru i lusim sip, orait yupela i no inap i stap laip.” ³²Olsem na ol soldia i katim rop bilong laip-bot na em i lus nating long solwara.

³³Klostu san i laik kamap, na Pol i tokim ol long kaikaim sampela kaikai. Em i tok, “Nau em i de namba 14 yupela i gat dispela bikpela wari, na yupela no kaikai na i stap nating. ³⁴Long dispela as mi laik tokim yupela long kaikaim sampela kaikai. Yupela i nidim kaikai bilong strongim yupela. Long wanem, wanpela bilong yupela i no inap kisim bagarap liklik, yupela olgeta bai i stap gut.” ³⁵Na taim Pol i mekim dispela tok pinis, orait em i kisim sampela bret, na em i tok tenkyu long God long ai bilong olgeta, na em i brukim bret na em i kaikai. ³⁶Na dispela i strongim ol na ol tu i kaikai. ³⁷Mipela ol man i stap long sip mipela 276 man olgeta. ³⁸Na taim ol i kaikai inap pinis ol i tromoi olgeta kago wit long solwara na sip i no ken i hevi tumas.

Sip i bagarap.

³⁹Taim san i kamap ol boskru i lukim ailan, tasol ol i no save em i wanem ailan. Tasol ol i lukim wanpela pasis i gat nambis. Em olsem na ol i traim na stiaim sip i go long nambis. ⁴⁰Na ol i katim rop bilong ol anka na larim anka i stap long solwara. Long seim taim ol i lusim ol rop i pasim stia bilong sip. Na ol i apim wanpela liklik sel bilong kisim win, na sip i ran i go olsem long nambis. ⁴¹Tasol, as bilong sip i go bamim wanpela wesan na i pas strong. Poret bilong sip i stak olgeta long wesan, na bikpela solwara i smasim stan bilong sip na sip em i bruk. ⁴²Na ol soldia i laik kilim ol kalabusman, long wanem, nogut ol i swim i go long nambis na ranawe. ⁴³Tasol kepten bilong ol soldia i laik sevim laip bilong Pol na em i tok nogat. Na em i givim oda, “Yu husat i ken i swim, yupela go paslain na yupela swim i go long nambis. ⁴⁴Na yupela i no fit long swim, yupela holim ol hap diwai nabaut tasol na yupela i go.” Long dispela pasin olgeta i go kamap long nambis na i stap gut.