Aposel
Pol i stap long ailan Malta.
28
1Orait na mipela olgeta i kamap long nambis na i stap gut. Na mipela painimaut olsem mipela i stap long ailan Malta. 2Ol as ples manmeri i mekim gutpela pasin tru long mipela. Em i ren na i kol tumas na ol i mekim paia na welkamim mipela. 3Pol i bungim sampela liklik diwai na em i putim long paia. Na wanpela snek nogut i hait long dispela paia na i kam aut na kaikaim han bilong Pol. 4Ol as ples manmeri i lukim snek i hangamap long han bilong Pol na ol i tok namel long ol yet olsem, “Tru tumas, dispela man em i bin kilim wanpela man i dai. Em i no dai long solwara, tasol god bilong stretim pasin nogut i laik kilim em i dai nau.” 5Tasol Pol i seksekim han bilong em na snek i pundaun long paia, na Pol i no kisim bagarap. 6Na ol i tingim olsem Pol bai solap na i dai o em bai pundaun hariap na i dai, na ol i wet i stap. Tasol ol i wet longpela taim na Pol i no bagarap. Olsem na ol i senisim tingting na ol i tok, “Em i wanpela god.”
7Na graun bilong hetman bilong ailan, nem bilong em Publius, i stap klostu, na em i kisim mipela na em i lukautim mipela gutpela tumas long 3-pela de. 8Na papa bilong Publius i gat sik na em i slip i stap. Em i skin hat na pekpek blut. Na Pol i visitim em na i prea, na em i putim han long em na oraitim em. 9Em i mekim olsem na ol arapela sikman bilong ailan ol i kam long mipela na Pol i oraitim ol. 10Na ol i gat bikpela amamas long mipela. Bihain, taim mipela laik kalap long sip na i go, ol i givim mipela olgeta samting mipela i nidim.
Pol i kamap long Rom.
11Bihain long 3-pela mun mipela kalap long wanpela sip na i go. Dispela sip i bin i stap long ailan na i wetim taim bilong bikpela kol i pinis. Em i sip bilong taun Aleksandria na long poret ol i bin sapim het bilong tupela pikinini god long em. 12Na mipela i go kamap long taun Sirakyus, na mipela i stap 3-pela de long dispela hap. 13Mipela lusim na mipela raun na i go kamap long taun Regium. Mipela i stap wanpela de tasol na win bilong saut i kirap na mipela i go. Na long 2-pela de mipela kamap long taun Puteoli. 14Long Puteoli mipela i bungim ol sampela brata na ol i invaitim mipela na mipela i stap 7-pela de wantaim ol. Na mipela wokabaut long rot i go long Rom. 15Na ol brata bilong Rom, taim ol i harim stori long mipela, ol i wokabaut i kam bungim mipela long Maket Bilong Apius na long Tripela Haus Pasindia. Taim Pol i lukim ol, em i tok tenkyu long God na em i kisim strong. 16Na taim mipela i kam insait long taun Rom, komanda i orait long Pol wanpela i stap long haus na wanpela soldia tasol i was long em.
Pol i stap long Rom.
17Na Pol i stap 3-pela de na em i singautim ol lida bilong ol lain Juda i stap long Rom. Ol i kam bung na Pol i tokim ol, “Ol brata, mi no bin mekim wanpela rong long ol lain manmeri bilong yumi na mi no mekim rong long ol kastem bilong tumbuna papa bilong yumi. Tasol ol i arestim mi long Jerusalem na putim mi i go long han bilong ol Rom. 18Taim ol Rom i skelim kot bilong mi, ol i laik larim mi i go fri. Long wanem, i no gat as bilong makim mi bilong i dai. 19Tasol ol Juda i komplen tumas na long dispela as mi bin tok long Sisar i harim kot bilong mi. Na mi, mi no gat sampela toktok bilong kotim ol lain bilong mi. 20Long dispela samting tasol mi singautim yupela. Mi laik lukim yupela na tokim yupela. Long wanem, mi bilip long hop bilong Israel na long dispela bilip tasol dispela sen i pasim mi.” 21Na ol i tokim Pol olsem, “Mipela no kisim wanpela pas bilong dispela hap Judia na i stori long yu. Na ol brata bilong Judia i kam long Rom, ol i no karim sampela tok nogut na ol i no mekim wanpela tok nogut long yu. 22Tasol mipela i laik harim tingting bilong yu long maus bilong yu yet. Long wanem, mipela save, long olgeta hap ol manmeri i mekim tok bilong egensim dispela bruk lain.”
23Na ol i makim wanpela de, na long dispela de ol planti bilong ol i kam long haus bilong Pol. Long moning i go apinun Pol i autim na eksplenim na skulim ol long olgeta samting bilong kingdom bilong God. Na em i yusim Buk Lo bilong Moses na Buk Profet tu bilong traim na senisim tingting bilong ol, bai ol i bilipim Jisas. 24Na sampela bilong ol i bilipim, tasol sampela ol i no bilipim. 25Ol i tok pait namel long ol yet na ol i laik lusim Pol na go. Tasol Pol i mekim wanpela las toktok, na em i tok, “Holi Spirit i tok stret taim Em i bin tokim ol tumbuna papa bilong yupela long maus bilong profet Aisaia. Em i tok,
26“ ‘Yu go long ol dispela manmeri na yu tokim ol olsem:
Tru, yupela bai harim, tasol yupela no inap klia,
na tru, yupela bai lukim, tasol yupela no inap save.
27Long wanem, bel bilong ol dispela manmeri i kamap strong,
na long ia bilong ol, ol i no harim gut,
na ai bilong ol, ol i pasim.
Long wanem, ol i no laik lukim long ai bilong ol
na harim long ia bilong ol
na kisim save long bel bilong ol
na tanim na kam, na bai Mi oraitim ol.’
(Aisaia 6:9-10)
28Em olsem na yupela mas save, dispela tok i tokaut long God i sevim manmeri, God i salim dispela tok i go long ol Jentail manmeri, na ol bai harim.”
30Orait na Pol i stap 2-pela yia long dispela haus na em i yusim mani bilong em yet bilong baim. Na em i welkamim olgeta manmeri i kam long em. 31Na em i autim tok bilong kingdom bilong God na em i skulim ol manmeri long olgeta samting bilong BIKPELA Jisas Krais, na em i autim strong na wanpela samting i no bin pasim em long autim tok.
