Aposel

Ananaias na Safaira.

5

¹Tasol narapela man Ananaias, wantaim Safaira meri bilong em, em i bin salim wanpela hap graun na kisim mani, ²na em i haitim hap mani na putim i stap bilong em yet, na meri bilong em i orait long dispela pasin. Em olsem na Ananaias em i karim hap mani tasol i kam long ol aposel. ³Tasol Pita em i tok, “Ananaias, olsem wanem Satan i pulimapim tingting bilong yu long giamanim Holi Spirit na yu haitim hap mani na putim i stap bilong yu yet? ⁴Taim graun i stap yet long han bilong yu, orait em i graun bilong yu yet. Na taim yu salim graun bilong yu na kisim mani, orait dispela mani em i mani bilong yu yet. Em olsem na, long wanem as yu kisim tingting nogut na yu giaman long dispela mani? Harim. Yu no mekim giaman long ol man. Nogat. Yu mekim giaman long God.” ⁵Taim Ananaias i harim dispela tok em i pundaun na em i dai pinis. Na bikpela pret i kamap long olgeta manmeri i harim stori bilong ol dispela samting. ⁶Ol yangpela man ol kirap na ol i pasim bodi bilong Ananaias long laplap na ol i kisim em i go na planim em.

⁷Long 3-pela aua bihain, meri bilong Ananaias em i kam, tasol em i no save long dispela samting i kamap long man bilong em. ⁸Na Pita i askim em, “Dispela mani Ananaias i bin givim mipela, em i olgeta mani bilong graun bilong yupela o sampela mani moa i stap?” Na meri i tok, “Yes, em i olgeta mani bilong graun bilong mipela.” ⁹Tasol Pita i tokim em, “Olsem wanem yu bin tok pas wantaim man bilong yu bilong traim Spirit bilong BIKPELA? Lukim! Ol man i bin planim man bilong yu, ol i kam nau long dua, na ol bai karim yu tu i go.” ¹⁰Na wantu meri em i pundaun klostu long lek bilong Pita na em i dai pinis. Ol yangpela man ol i kam insait na lukim meri em i dai pinis na ol i kisim em i go na planim em klostu long man bilong em. ¹¹Na bikpela pret i kamap long olgeta manmeri bilong sios na long ol manmeri i harim stori bilong ol dispela samting.

Ol sain na mirakel i kamap.

¹²Na ol aposel i wokim ol planti sain na mirakel namel long ol manmeri. Na olgeta manmeri bilong sios ol i save bung wantaim long veranda bilong Solomon. ¹³Ol narapela manmeri ol i amamas long ol, tasol ol i pret tumas long kam bung wantaim ol. ¹⁴Na planti manmeri moa yet i bilip long BIKPELA. Ol planti man na ol planti meri ol i kam insait long lain bilong BIKPELA. ¹⁵Em olsem na ol manmeri i karim ol sikman i go autsait long rot na ol i slipim ol long ol kainkain bet na laplap, bai sado bilong Pita i ken i tasim ol. ¹⁶Na ol manmeri bilong olgeta taun nabaut long Jerusalem ol tu i kam bung, na ol i kisim sikman i kam wantaim ol man i gat spirit nogut, na olgeta i kamap orait.

Ol i arestim ol aposel, na bihain ol i friim ol.

¹⁷Tasol namba wan hetpris na ol man i stap wantaim em, em ol man bilong lain Sadyusi, ol i jelas nogut tru, ¹⁸na ol i arestim ol aposel na putim ol long kalabus. ¹⁹Tasol, long nait wanpela ensel bilong BIKPELA i opim dua bilong kalabus na i kisim ol i kam autsait, na em i tok, ²⁰“Yupela go na sanap insait long tempel, na yupela autim tok long ol manmeri long olgeta samting bilong nupela laip.” ²¹Ol i harim pinis, na long moning taim tru ol i go insait long tempel na autim tok.

Orait, namba wan hetpris na ol man i stap wantaim em, ol i singautim ol kaunsil na olgeta hetman bilong Israel na ol i bung i stap. Na ol i salim tok long haus kalabus bilong kisim ol aposel i kam. ²²Ol sikuriti i go long haus kalabus, tasol ol aposel i no stap, na ol i go bek na ol i tok olsem, ²³“Mipela i lukim dua bilong haus kalabus i lok i stap, na ol sikuriti i was long dua. Tasol taim mipela i opim dua ol man i no stap.” ²⁴Taim bosman bilong ol sikuriti bilong tempel na ol hetpris i harim dispela toktok, ol i tanim het na tingting planti olsem, “Wanem samting bai i kamap nau?” ²⁵Na wanpela man i kam na i tokim ol, “Harim, ol dispela man yupela i putim long kalabus, ol i sanap insait long tempel na skulim ol manmeri.” ²⁶Na bosman bilong ol sikuriti bilong tempel wantaim ol sikuriti ol i go na kisim ol aposel i kam. Na ol i no yusim fos tumas, long wanem, ol i pret long ol manmeri i stonim ol.

²⁷Na ol i kisim ol aposel i kam na sanapim ol long kaunsil. Na namba wan hetpris i tokim ol olsem, ²⁸“Mipela i bin tambuim yupela long autim tok long nem bilong dispela man, tasol yupela i bin pulapim ol Jerusalem long tisim bilong yupela, na yupela i makim mipela i as bilong dispela man i dai.” ²⁹Na Pita wantaim ol aposel i bekim tok olsem, “Mipela mas bihainim tok bilong God tasol. Mipela no ken i bihainim tok bilong ol man. ³⁰God bilong ol tumbuna papa bilong mipela i kirapim na salim Jisas i kam, tasol yupela i hangamapim Em long diwai na kilim Em i dai. ³¹God i litimapim Em na putim Em long han sut bilong Em bilong soim olsem Em i Hetman na Man bilong Sevim manmeri, bai Em i givim tanim bel long ol Israel na fogivim sin bilong ol. ³²Na mipela i witnisim ol dispela samting, na Holi Spirit tu Em i witnis, na God i bin givim Holi Spirit long ol manmeri i bihainim tok bilong Em.

³³Orait, taim ol kaunsil i harim dispela tok, ol i belhat nogut tru na ol i laik kilim ol i dai. ³⁴Tasol wanpela man bilong kaunsil, nem bilong em Gamaliel, em i sanap. Em i wanpela Farisi na tisa bilong lo, na ol manmeri i givim biknem long em. Na em i tokim ol long rausim ol aposel i go autsait. ³⁵Na em i tokim ol kaunsil olsem, “Yupela ol man bilong Israel, yupela mas tingting gut pastaim long pasin yupela i laik mekim long ol. ³⁶Long wanem, bipo wanpela man, nem bilong em Teudas, em i bin kirap na em i tingim olsem em i wanpela bikpela man stret, na ol sampela manmeri olsem 400 samting i bihainim em. Ol i bin kilim em i dai na ol man i bihainim em ol i ranawe nabaut na wok bilong em i lus nating. ³⁷Na bihain long dispela man, long taim bilong gavman i kisim nem bilong ol manmeri, narapela man i kirap, nem bilong em Judas bilong distrik Galili. Na em i bin pulim ol sampela manmeri i bihainim em. Na em tu em i dai na ol manmeri i bihainim em ol i ranawe nabaut. ³⁸Em olsem na mi laik tokim yupela olsem, ol dispela man nau yumi holim, orait yumi larim ol i stap. Long wanem, sapos ol man tasol i as bilong dispela samting ol i mekim, orait dispela samting bilong ol bai pinis nating. ³⁹Tasol sapos God Em i as bilong dispela samting bilong ol, orait yupela no inap winim ol. Nogut pasin yupela i mekim i egensim God.” Em olsem na ol i harim tok bilong em. ⁴⁰Na ol i singautim ol aposel i kam insait gen. Na ol i paitim ol na tambuim ol long autim tok long nem bilong Jisas. Na ol i lusim ol i go. ⁴¹Na ol aposel i lusim ol kaunsil na ol i go. Na ol i amamas. Long wanem, God i orait long ol i ken i kisim sem long nem bilong Jisas. ⁴²Na long olgeta de, long tempel na long haus tu haus, ol i no lusim wok bilong skulim na autim tok olsem, Jisas Em i Krais.