Aposel
Sol i wok long bagarapim sios.
8
1Na Sol i wanbel olgeta long kilim Stiven.
Long de ol i kilim Stiven ol i stat long bagarapim sios bilong Jerusalem, na ol planti manmeri bilong sios i ranawe nabaut long olgeta hap bilong distrik Judia na Samaria. Tasol ol aposel i stap long Jerusalem. 2Sampela gutpela man ol i planim Stiven na ol i mekim bikpela sori long em. 3Tasol Sol i wok long bagarapim sios. Em i go insait long ol wan wan haus na em i pulim ol man na ol meri i go na putim ol long kalabus.
Filip i tokaut long Krais long Samaria.
4Na ol manmeri i ranawe nabaut, wanem hap ol i go long em, ol i autim tok bilong God. 5Filip i go daun long wanpela taun bilong distrik Samaria na em i tokaut long Krais long ol. 6Na taim ol planti manmeri i harim tok bilong Filip na ol i lukim ol sain em i wokim, orait ol i wanbel na ol i harim gut tok bilong em. 7Long wanem, ol spirit nogut ol i bikmaus na i lusim ol planti man i gat spirit nogut, na planti manmeri lek bilong ol i dai pinis na planti manmeri i lek nogut, ol i kamap orait. 8Em olsem na bikpela amamas i kamap long dispela taun.
Saimon bilong mekim mejik em i bilip.
9Tasol, wanpela man i stap long dispela taun, nem bilong em Saimon. Em i save mekim mejik na ol manmeri bilong distrik Samaria i save kalap nogut. Na em i save tok, “Mi bikpela man.” 10Na ol bikpela man na ol manmeri nating, olgeta i bihainim em na ol i tok olsem, “Dispela man em i bikpela pawa bilong God.” 11Ol i bihainim em bikos longpela taim em i bin mekim mejik na ol i kalap nogut long mejik bilong em. 12Tasol, taim Filip i autim gutnius bilong kingdom bilong God na bilong nem bilong Jisas Krais, ol i bilip na ol i kisim baptais, ol man na ol meri wantaim. 13Na Saimon tu em i bilip, na taim em i kisim baptais pinis, orait em i raun wantaim Filip. Na Saimon i lukim Filip i mekim ol kainkain sain na mirakel, na em i kalap nogut.
14Ol aposel i stap long Jerusalem na taim ol i harim tok olsem ol Samaria i kisim tok bilong God, orait ol i salim Pita na Jon i go long ol. 15Tupela i kamap long ol na tupela i prea long ol i ken i kisim Holi Spirit. 16Long wanem, Holi Spirit i no kam daun yet long ol. Tasol ol i bin kisim baptais long nem bilong Bikpela Jisas. 17Na tupela i putim han long ol na ol i kisim Holi Spirit. 18Na taim Saimon i lukim tupela aposel i putim han long ol na ol i kisim Holi Spirit, orait em i kisim mani i kam long tupela na em i tok, 19“Givim dispela pawa long mi, bai mi ken i putim han long manmeri na ol i kisim Holi Spirit.” 20Na Pita i tokim em olsem, “Mani bilong yu i ken i bagarap wantaim yu. Long wanem, yu tingim olsem yu ken i baim presen bilong God long mani! 21Bel bilong yu i no stret long ai bilong God. Olsem na, yu no inap kisim liklik hap na yu no inap serim dispela samting. 22Em olsem na, tanim bel long dispela pasin nogut bilong yu, na prea long BIKPELA na traim, bai em i fogivim dispela tingting i stap long bel bilong yu o nogat. 23Long wanem, mi lukim yu i stap bel nogut tru long dispela samting na yu kalabus long pasin nogut.” 24Na Saimon i bekim tok olsem, “Prea long Bikpela long mi. Nogut dispela samting yu tok long em i kamap long mi.”
25Orait, taim tupela aposel i autim tok bilong BIKPELA pinis na tupela i tokaut pinis long ol samting tupela i bin witnisim, orait tupela i go bek gen long Jerusalem. Long rot tupela i autim gutnius long ol planti hauslain bilong ol Samaria.
Filip i mitim wanpela man Itiopia.
26Na wanpela ensel bilong BIKPELA i tokim Filip olsem, “Yu kirap na yu go saut long rot i lusim Jerusalem na i go daun long taun Gasa.” Dispela rot i stap long ples drai i no gat man. 27Orait Filip i kirap na em i go. Na em i mitim wanpela man Itiopia. Em i wanpela yunuk, na em i bikpela man bilong gavman bilong Kandasi, kwin bilong Itiopia, na em i bosman bilong mani bilong Kandasi. Em i bin kam long Jerusalem bilong lotu 28na em i laik go bek gen long Itiopia. Em i sindaun long karis bilong em na i ritim buk bilong profet Aisaia. 29Na Holi Spirit i tokim Filip, “Yu go klostu na yu pas wantaim karis.” 30Olsem na Filip i ran i go klostu long karis na em i harim dispela man i ritim buk bilong profet Aisaia. Na Filip i askim em, “Yu save long as bilong dispela tok yu ritim o nogat?” 31Na man i bekim tok olsem, “Hau na bai mi save? Sapos wanpela man i skulim mi, orait mi ken i save.” Em olsem na em i askim Filip long kam sindaun long karis wantaim em. 32Na Tok bilong God em i ritim i olsem,
“Olsem wanpela sipsip, ol i lidim em i go bilong kilim em i dai.
Na wankain olsem pikinini sipsip i no save krai taim ol i katim gras bilong em,
orait em i no opim maus bilong em.
33Em i kisim sem tru na ol i no mekim stretpela kot long em.
Wanpela man i no inap kauntim pikinini bilong em.
Long wanem, ol i pinisim laip bilong em
na em i no stap moa long dispela graun.”
(Aisaia 53:7, 8)
34Na dispela yunuk i tokim Filip olsem, “Mi askim yu, profet i tokaut long husat? Em i tokaut long em yet o em i tokaut long narapela man?” 35Orait Filip i toktok, na em i stat long dispela Tok bilong God na em i autim gutnius i tokaut long Jisas. 36Ol i go yet long rot na ol i kamap long wanpela wara. Na yunuk i tok, “Lukim, wara i stap! Na wanem samting i ken i stopim mi long kisim baptais?” 38Na em i tokim draiva long stopim karis. Na Filip wantaim yunuk i go daun long wara na Filip i baptaisim em. 39Na taim tupela i lusim wara, Spirit bilong BIKPELA i karim Filip i go, na yunuk i no lukim Filip moa. Na em i amamas na i bihainim rot bilong em i go. 40Tasol Filip i kamap long taun Asotas. Na em i wokabaut i go na em autim gutnius long olgeta taun i go inap long em i kamap long taun Sisaria.
