Aposel

Sol i tanim bel.

9

¹Tasol Sol i tretim ol disaipel bilong BIKPELA i go yet na em i laik kilim ol i dai. Em i go long namba wan hetpris ² na em i askim em long raitim pas long ol hetman bilong ol haus lotu bilong ol Juda i stap long taun Damaskus. Na sapos Sol i lukim man o meri i pas wantaim Rot, orait pas bilong namba wan hetpris i givim orait long em i ken i arestim ol na kisim ol i kam long Jerusalem. ³Orait Sol i wokabaut long rot i go long Damaskus, na taim em i kamap klostu long siti, wantu bikpela lait bilong heven i sut i kam daun na i raunim em. ⁴Na em i pundaun long graun na em i harim wanpela maus i tokim em olsem, “Sol, Sol, long wanem as yu wok long bagarapim Mi?” ⁵Na Sol i tok, “BIKPELA, yu husat?” Na Em i tok, “Mi Jisas, dispela Jisas yu wok long bagarapim. ⁶Tasol yu kirap na go insait long taun, na wanpela man bai tokim yu long samting yu mas mekim.” ⁷Ol man i kam wantaim Sol, ol i sanap i stap na i no gat toktok. Ol i harim maus, tasol ol i no lukim man. ⁸Na Sol em i sanap na em i opim ai bilong em, tasol em i no lukim wanpela samting. Em olsem na ol i holim han bilong em na lidim em i go insait long taun Damaskus. ⁹Na long 3-pela de Sol i aipas i stap, na em i no kaikai na em i no dring.

¹⁰Na wanpela disaipel i stap long Damaskus, nem bilong em Ananaias. Long visin BIKPELA i tokim em olsem, “Ananaias.” Na Ananaias i bekim olsem, “BIKPELA, mi stap.” ¹¹Na BIKPELA i tokim em olsem, “Yu kirap na yu go long wanpela rot, nem bilong em Stretpela, na long haus bilong Judas bai yu lukim wanpela man bilong taun Tarsus, nem bilong em Sol, na em i prea i stap. ¹²Long visin em i bin lukim wanpela man, nem bilong em Ananaias, i kam na i putim han long em, bai em i ken i lukluk gen.” ¹³Tasol Ananaias i bekim dispela tok olsem, “BIKPELA, mi bin harim stori bilong planti manmeri long dispela man long ol pasin nogut em i mekim long ol lain bilong yu long Jerusalem. ¹⁴Na ol hetpris i givim orait long em i ken i arestim olgeta manmeri i singaut long nem bilong Yu long hia long dispela taun.” ¹⁵Tasol BIKPELA i tokim em olsem, “Yu go. Mi bin makim em, bai em i stap wanpela tul bilong Mi bilong karim nem bilong Mi i go long ol Jentail manmeri na long ol king na long ol lain Israel. ¹⁶Na bai Mi soim em hamas em bai safa bilong nem bilong Mi.” ¹⁷Em olsem na Ananaias i go na em i kamap long haus na i go insait. Em i putim han bilong em long Sol na em i tok, “Brata Sol, BIKPELA Jisas i bin kamap long yu taim yu wokabaut long rot i kam, na Em i salim mi i kam, bai yu ken i lukluk gen na bai Holi Spirit i pulap long yu.” ¹⁸Na wantu samting olsem grile i lusim ai bilong em na em i lukluk gen. Na em i kirap na kisim baptais. ¹⁹Na em i kaikai na kisim strong.

Sol i tokaut long Jisas long haus lotu bilong ol Juda.

Na Sol i stap sampela de wantaim ol disaipel long taun Damaskus. ²⁰Na em i hariap na i go long haus lotu bilong ol Juda na em i tokaut long Jisas na em i tok, “Jisas Em i Pikinini bilong God.” ²¹Na ol manmeri i harim tok bilong em, ol i kirap nogut na ol i tok, “Em olsem wanem? Em i dispela man i bin mekim bikpela trabel long Jerusalem long ol manmeri i singaut long nem bilong Jisas. Na em i kam hia long dispela taun bilong arestim ol na kisim ol i go long ol hetpris.” ²²Tasol Sol i kisim strong moa yet, na tok em i mekim i soim olsem, Jisas Em i Krais. Na tok bilong em i winim ol Juda manmeri i stap long taun Damaskus.

Sol i ranawe long Damaskus.

²³Orait, ol planti de i go pinis, na ol Juda i kamapim plen bilong kilim Sol i dai. ²⁴Tasol Sol i kisim save long plen bilong ol. Long nait na long de ol i was long olgeta dua bilong banis bilong taun, bai ol i ken i holim em na kilim em. ²⁵Tasol long tudak ol disaipel i kisim Sol i go long wanpela windo long banis ston, na em i sindaun long bikpela basket na ol i lusim em i go daun autsait long banis.

Sol i stap long Jerusalem.

²⁶Na taim Sol i kamap long Jerusalem, orait em i laik i stap wantaim ol disaipel. Tasol ol i pret long em. Long wanem, ol i tubel long Sol i kamap disaipel o nogat. ²⁷Tasol Barnabas i kisim Sol i go long ol aposel. Na em i tokim ol klia long Sol i bin lukim BIKPELA long rot, na BIKPELA i bin toktok long em, na Sol i bin strong long autim tok long nem bilong Jisas long taun Damaskus. ²⁸Em olsem na Sol i go kam namel long ol aposel long Jerusalem na em i strong long autim tok long nem bilong Jisas. ²⁹Em i toktok wantaim na tok pait wantaim ol Juda i tokples Grik. Tasol ol i wok long painim wei bilong kilim em i dai. ³⁰Na taim ol brata i harim dispela tok, ol i kisim Sol i go daun long taun Sisaria na ol i salim em i go long taun Tarsus.

³¹Em olsem na long dispela taim olgeta sios long distrik Judia na Galili na Samaria i kisim malolo long trabel, na ol i kamap strong. Na sios i pret long BIKPELA na i wokabaut long wei bilong Em na i wokabaut long strong bilong Holi Spirit, na namba bilong ol manmeri bilong sios i kamap planti moa.

Ainias i kamap orait.

³²Orait na Pita i go kam long ol sios, na em i go daun tu long lain bilong God i stap long taun Lida. ³³Na em i lukim wanpela man, nem bilong em Ainias. Lek bilong em i dai pinis na long 8-pela yia em i slip i stap tasol long bet. ³⁴Na Pita i tokim em olsem, “Ainias, Jisas Krais i oraitim yu. Yu kirap na stretim bet bilong yu.” Na wantu em i kirap. ³⁵Na olgeta manmeri bilong taun Lida na hap Saron i lukim em, na olgeta i tanim na bihainim BIKPELA.

Dorkas i kirap bek.

³⁶Na long taun Jopa wanpela disaipel i stap, nem bilong em Tabita. Long tokples Grik ol i kolim em Dorkas. Dispela meri i save mekim gutpela pasin na em i save givim helpim long manmeri i nidim sampela helpim. ³⁷Long dispela taim em i kisim sik na em i dai. Ol i wasim bodi bilong em na slipim em long wanpela rum antap. ³⁸Na taun Lida i stap klostu long taun Jopa. Na ol disaipel bilong Jopa i harim olsem Pita i stap long Lida, na ol i salim tupela man i go long em bilong askim em long kam hariap. ³⁹Em olsem na Pita i kirap na i go wantaim tupela man. Na taim em i kamap long haus ol i kisim em i go long rum antap. Olgeta wido meri i krai i stap na ol i soim Pita ol klos Dorkas i bin samapim taim em i stap wantaim ol. ⁴⁰Tasol Pita i rausim ol i go autsait, na em i brukim skru na em i prea. Na em i tanim na lukim bodi na em i tok, “Tabita, yu kirap.” Na em i opim ai bilong em, na taim em i lukim Pita em i kirap liklik. ⁴¹Na Pita i holim han bilong em na i sanapim em. Na em i singautim ol manmeri bilong God wantaim ol wido meri na em i soim ol Dorkas i stap laip. ⁴²Na stori bilong dispela samting i go nabaut long olgeta hap bilong Jopa, na planti manmeri ol i bilip long BIKPELA. ⁴³Na Pita i stap planti de long Jopa wantaim wanpela man i save wokim skin bilong abus, nem bilong em Saimon.