Moning.
Planti manmeri i tok olsem, “Seten em i bosman bilong dispela graun – Seten i save bosim ol samting bilong dispela graun.” Tasol dispela i no tru. God yet i bosim na kontrolim olgeta samting. Em i gat plen bilong Em i stap na Em i bosim na kontrolim olgeta samting bilong kamapim olgeta samting Em i bin plenim.
Na God i save bosim na kontrolim olgeta samting. Em i no bosim na kontrolim wanwan samting tasol, nogat. Em i save bosim na kontrolim olgeta samting, na Em i save bosim na kontrolim olgeta samting inap long laik na plen bilong Em. God i bihainim plen bilong Em tasol na Em i bosim na kontrolim olgeta samting. Lukim Efesus 1:9-10.
9Na God i soim yumi as bilong plen bilong Em. Pastaim yumi no klia long olgeta samting God i laik mekim long Krais, tasol Em i soim yumi na nau yumi klia. God i bihainim amamas na laik bilong Em yet na Em i plenim ol dispela samting bilong Krais. 10Na dispela samting God i plenim bai kamap long wanpela gutpela taim God i makim pinis. Na dispela plen bilong God i olsem, olgeta samting bilong heven na bilong dispela graun bai kamap wanpela na i stap aninit long wanpela hetman tasol. Na dispela hetman Em i Krais.
Yumi no ken i lukluk tasol long ol samting bilong dispela graun na larim ol samting yumi lukim long ai bilong yumi i stiaim tingting bilong yumi. Nogat. God i gat plen bilong Em i stap na dispela plen bilong God i wok i go yet. Olsem na, yumi mas larim tok bilong God i stiaim tingting bilong yumi.
Taim yumi lukim ol samting bilong dispela graun, orait yumi lukim ol samting long antap skin tasol. Tasol long baksait bilong ol samting yumi lukim, orait plen bilong God i stap, na God i save bosim na kontrolim olgeta samting bilong kamapim olgeta samting bilong plen bilong Em. Yumi no ken i lusim tingting long dispela. Maski wanem samting i kamap, yumi mas klia olsem, plen bilong God i stap na dispela plen i wok i go yet. Plen bilong God i no lus na em i no pundaun. Nogat. Plen bilong Em i stap yet na i wok i go yet.
Na plen bilong God i olsem wanem?
As bilong plen bilong God i olsem, olgeta samting bilong heven na bilong dispela graun i no inap i stap tupela samting, nogat, tupela bai kamap wanpela na i stap aninit long wanpela hetman na dispela hetman Em i Jisas Krais.
God bai bungim ol samting bilong heven wantaim ol samting bilong dispela graun bilong kamapim wanpela nupela samting. Em bai kamapim wanpela nupela komyuniti we olgeta manmeri bilong dispela nupela komyuniti wantaim olgeta samting bai i stap aninit long wanpela hetman, Jisas Krais. Dispela em i bikpela plen bilong God.
Bihain, dispela graun nau yumi stap long en bai pinis wantaim ol kainkain komyuniti (hauslain) bilong dispela graun. Olgeta bai pinis na wanpela nupela samting bai kamap. Na long dispela nupela samting wanpela nupela komyuniti bai i stap, na olgeta manmeri long dispela nupela komyuniti wantaim olgeta samting bai i stap aninit tru long Jisas Krais.
Long dispela as tasol, God i bin makim ol planti planti manmeri na Em i pasim ol long Krais, na Krais i mekim wok bilong baim pe bilong sin bilong ol bilong God i fogivim ol, na God i adoptim ol na Em i mekim ol i kamap pikinini long femili bilong Em. Yu save, God Em i wokim ol dispela samting bilong kamapim wanpela nupela komyuniti, na bihain God bai bungim dispela nupela komyuniti wantaim olgeta samting long heven, na olgeta bai i stap wanpela tasol, na olgeta bai i stap aninit long Jisas tasol. Olgeta narapela samting bai pinis, na dispela nupela samting wantaim dispela nupela komyuniti bai i stap tasol.
God i wok long bihainim dispela plen bilong Em nau.
Yumi ken i witnisim dispela wok bilong God nau. God Em i no sindaun nating, nogat. Nau God i save wok long kisim na pasim ol kainkain manmeri long wanpela nupela komyuniti we ol i stap aninit tru long Krais. Yumi ken i lukim dispela plen bilong God nau. Yumi ken i lukim dispela wok bilong God nau.
Taim yumi lukim God i opim ai na ia na bel bilong ol sampela manmeri, na ol i tanim bel na ol i bilipim na trastim God long kisim bek ol long feitful wok Jisas i bin mekim long diwai kros, na ol i bihainim Em, orait yumi lukim God i wok long kamapim plen bilong Em bilong kamapim nupela komyuniti bilong Em. Na mi yet mi lukim God i mekim dispela wok long ol kainkain manmeri long ples na Em i pasim ol wantaim long wanpela nupela komyuniti.
Na bihain, God bai pasim sampela manmeri moa – ol sampela manmeri bilong ol narapela hauslain bilong PNG. Yu save, dispela em i plen bilong God – God i save wok long kisim ol wanwan manmeri na pasim ol long wanpela nupela komyuniti, na bihain God bai pasim ol dispela nupela komyuniti wantaim olgeta samting bilong heven, na olgeta bai i stap wanpela tasol na olgeta bai i stap aninit long Krais.
Nem bilong nupela komyuniti bilong God.
Na yu save long nem bilong dispela nupela komyuniti God i wok long kamapim o nogat? Nem bilong en em i sios. Nupela komyuniti God i wok long kamapim em i sios bilong God. Dispela nupela komyuniti God bai bungim long bihain em i sios bilong God.
Liklik komyuniti bilong nau em i hap bilong bikpela komyuniti bilong bihain. Taim God i kisim wanwan manmeri na kamautim ol long ol kainkain komyuniti bilong ol long dispela graun, na Em i pasim ol long nupela komyuniti bilong Em, orait Em i kamapim liklik bilong dispela bikpela komyuniti Em bai bungim long bihain. Sios komyuniti God i wok long kamapim long wanwan hap em i liklik bilong dispela bikpela sios komyuniti God bai kamapim long bihain.
Yumi mas bihainim nupela tingting.
Sios bilong God em i ol manmeri God i bin makim na pasim long Jisas na Jisas i kisim pe bilong sin bilong ol na Em i mekim ol i stap stretpela na holi long ai bilong God. Long dispela rot God i kisim bek ol – Em i adoptim ol na Em i mekim ol i stap pikinini bilong Em long femili bilong Em. Na Holi Spirit i opim ai na ia na bel bilong ol na Em i givim bilip long ol, bai ol i tanim bel na bilipim na trastim God long kisim bek ol long feitful wok bilong Jisas na ol i bihainim Em. Ol dispela manmeri tasol ol i nupela komyuniti bilong God – ol i sios bilong God – na ol narapela samting i yusim nem “sios” nogat.
Yumi mas kisim nupela tingting. Yumi mas save long plen bilong God bilong kisim bek ol wanwan kainkain manmeri bilong kamapim wanpela nupela komyuniti bilong Em we ol i lavim na bihainim na i stap aninit long Jisas Krais – yumi save long plen bilong God na yumi pas long en. Larim plen bilong Em i stiaim tingting bilong yumi na i stiaim wokabaut bilong yumi – na i stiaim tingting na bilip na wokabaut bilong nupela sios komyuniti. God i bosim na kontrolim olgeta samting bilong bihainim dispela plen bilong Em.
Glenn.
