Aposel 4:13-22.
Bilong harim (Audio)
Wanpela taim ol sampela manmeri long ples ol i sanapim mi long kot bilong ol. Em i no kot trutru olsem Viles Kot o Distrik Kot. Nogat. Ol i sanapim mi long kot nating bilong ol yet bilong semim mi na bilong daunim mi. Long wanem, ol i les long harim gutnius bilong feitful wok bilong Jisas. Ol i tingim olsem, gutnius i tokaut long God i kisim bek sinmanmeri long feitful wok bilong Jisas tasol em i giaman tok. Em olsem na ol i sanapim mi bilong semim mi na bilong kapsaitim tok mi autim.
Long Aposel 4:1-12 yumi lukim stori bilong ol bikman bilong lotu ol i sanapim Pita na Jon long kot. Long wanem, tupela i tokaut long Jisas. Tupela i mekim tok olsem, Jisas Em i As Ston bilong kingdom (femili) bilong God, Jisas Em i nambawan samting bilong kingdom bilong God, na God i kisim bek sin manmeri long feitful wok bilong Jisas tasol. God i no givim narapela nem long yumi manmeri bilong dispela graun, God i no givim nem bilong narapela man long yumi manmeri bilong dispela graun, na bai yumi kisim laip long Em. Nogat. Long nem bilong Jisas tasol. Pita na Jon i autim dispela kain tok na ol bikman bilong lotu Juda ol i les long harim na ol i belhat long tupela. Em olsem na ol i arestim tupela na sanapim tupela long kot bilong ol.
Pastaim, Pita na Jon tupela i wokabaut i go long tempel. (Yumi bin lukim dispela stori long Aposel 3:1-26.) Na wanpela lek nogut man i sindaun i stap na em i wok long singaut bilong kisim mani. Tasol Pita i tokim lek nogut man olsem, “Mi nogat mani bilong givim yu, tasol mi gat narapela samting bilong givim yu.” Na i no Pita i gat narapela samting bilong givim em, nogat, em i Jisas i gat samting bilong givim em. Em olsem na long han bilong Pita Jisas i oraitim lek bilong lek nogut man.
Na ol planti manmeri ol i lukim lek nogut man i kalap kalap na ol i ran i kam. Long wanem, ol i laik save olsem, lek nogut man i kalap olsem wanem. Na Pita i tok klia long ol olsem, “Yupela no ken i tingim olsem, long strong bilong mitupela yet, o long lotu pasin bilong mitupela yet, dispela lek nogut man i wokabaut. Nogat. Long nem (namba) bilong Jisas tasol dispela lek nogut man i orait na em i wokabaut. Dispela man Jisas, yupela i bin kilim i dai na God i kirapim, orait em i dispela man i oraitim lek bilong lek nogut man.”
Pita i skruim tok na em i tokim ol long God i givim sanis long ol bilong tanim bel long pasin bilong ol bilong givim baksait long Jisas. Na sapos ol i tanim bel na bilipim na trastim Jisas, orait God bai fogivim ol. Long rot bilong feitful wok bilong Jisas long diwai kros God bai fogivim sin bilong ol na kisim bek ol. Na long De bilong BIKPELA, ol i no inap lukim belhat bilong God. Nogat. Ol bai kisim win na sindaun gutpela long nupela heven na nupela graun wantaim Jisas.
Orait, na long Aposel 4:1-12 yumi lukim stori bilong ol hetman na ol bikman bilong lotu Juda na ol tisa bilong lo (bilong Moses) na ol hetpris na ol pris bilong em, ol i belhat na ol i les long harim ol dispela kain tok. Em olsem na ol i tokim ol sikuriti bilong tempel na ol i arestim Pita na Jon na tromoi tupela long sel (kalabus). Long neks de ol i sanapim tupela long kot.
Na Pita, long strong bilong Holi Spirit, em i tokim ol olsem, “Yupela bin skelim Jisas na yupela tingim olsem Jisas Em i man nogut na Em i samting nating, na yupela kilim Em i dai long diwai kros. Yupela tromoi Jisas. Tasol yupela tromoi As Ston bilong kingdom bilong God. Yupela tromoi nambawan samting bilong kingdom bilong God. Yupela tromoi Jisas, As Ston bilong kingdom bilong God, orait yupela tromoi rot bilong yupela bilong i go insait long kingdom bilong God.”
Pita i pinisim dispela tok bilong em olsem, “Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em.” BIKPELA God Em i no makim narapela rot bilong kisim bek sinmanmeri na ol i stap laip insait long kingdom (femili) bilong Em. Nogat. Long rot bilong feitful wok bilong Jisas tasol. Sinmanmeri i no inap kisim laip long narapela samting. Nogat. Long Jisas tasol – long feitful wok bilong Jisas tasol sinmanmeri i ken i kisim laip na i stap insait long kingdom (femili) bilong God.
Long Aposel 4:13-22 Luk (man i raitim Buk Aposel) em i skruim stori bilong kot bilong Pita na Jon. Na bilong helpim yumi skelim mi makim 3-pela askim….
- Pita na Jon tupela i wanem kain man?
- Ol bikman bilong lotu i mekim wanem long tok bilong feitful wok bilong Jisas?
- Pita na Jon tupela i mekim wanem long tok bilong ol bikman bilong lotu?
1. Pita na Jon tupela i wanem kain man?
Lukim lain 13. Ol hetman na ol bikman na ol tisa bilong lo (bilong Moses) na ol hetpris na ol narapela pris bilong hetpris, olgeta ol i kirap nogut long Pita na Jon. Ol i saprais long tupela. Long wanem, tupela i no bin skul na tupela i man nating, tasol tupela no pret na tupela mekim ol gutpela toktok long ai bilong ol bikman bilong lotu, na toktok bilong tupela i klia olgeta.
Ol bikman bilong lotu ol i bin skul long olgeta kain skul bilong ol na ol i saveman stret. Tasol Pita na Jon tupela no skul olsem ol. Em olsem tasol Pita na Jon tupela i no pret long sanap long ai bilong ol dispela saveman, na tupela i skulim ol long ol planti samting bilong kingdom bilong God. Em olsem na ol bikman bilong lotu ol i saprais na ol i kirap nogut tru long tupela.
Na ol bikman bilong lotu ol i save olsem, Pita na Jon tupela i raun wantaim Jisas, tasol Jisas tu Em i no kisim skul olsem ol bikman bilong lotu. Em olsem, tasol ol i no gat toktok bilong egensim na daunim Pita na Jon. Long wanem, na ol i save olsem, tupela i bin wokim mirakel trutru na lek nogut man i orait.
Na olsem wanem Pita na Jon tupela i no pret na tupela i mekim ol gutpela toktok na putim ol samting bilong kingdom bilong God long ples klia? Lukim Aposel 4:8. Holi Spirit i pulap long Pita na Pita i toktok. Long strong bilong Holi Spirit tupela i no pret na tupela i mekim ol gutpela toktok na tupela i putim ol bikpela samting bilong kingdom bilong God long ples klia.
Tru tumas Pita na Jon tupela i no skul liklik na tupela i man nating, tasol tupela i no pret na tupela i mekim gutpela toktok bilong kingdom bilong God. Dispela em i mak bilong wok bilong Holi Spirit long laip bilong tupela. Holi Spirit i stiaim tupela. Long strong bilong Holi Spirit tasol tupela i mekim gutpela toktok na putim ol gutpela samting, ol trupela samting, bilong kingdom bilong God long ples klia. Bipo, taim Jisas i no dai yet long diwai kros, orait Em i bin tokim ol aposel olsem (lukim Jon 16:13)….
13Taim Spirit bilong tok tru (Holi Spirit) i kam, Em bai i stiaim tingting bilong yupela na bai yupela i save long olgeta tok i tru.
Em olsem na yumi ken save olsem, Holi Spirit i pas long tupela, long wanem, tupela i mekim trupela toktok na putim ol trupela samting bilong kingdom bilong God long ples klia. Sapos Holi Spirit i no stap long tupela, orait tupela i no inap i sanap strong na mekim trupela tok bilong kingdom bilong God olsem.
Ol brata na sista, Holi Spirit i ken i helpim yumi tu olsem. Em i ken i stiaim tingting bilong yumi i go long olgeta tok i tru. Holi Spirit i ken i opim ai na ia na bel bilong yumi na yumi ken i save long trupela tok bilong kingdom bilong God. Na Holi Spirit i ken i helpim yumi sanap strong na tokaut klia long ol trupela samting bilong kingdom bilong God – Em i ken i helpim yumi sanap strong na tokaut klia long God i fogivim sin bilong yumi na kisim bek yumi long feitful wok bilong Jisas tasol.
Dispela em i wok bilong Holi Spirit long olgeta manmeri bilong God. Pastaim Em i opim ai na ia na bel bilong ol na ol i ken i save long trupela tok bilong feitful wok bilong Jisas. Na Em bai helpim ol tokaut klia long trupela tok bilong kingdom bilong God – trupela tok i putim ples klia olsem, manmeri i tanim bel na i bilipim na trastim Jisas, orait God bai fogivim sin bilong ol na kisim bek ol long feitful wok bilong Jisas tasol, na long De bilong BIKPELA ol bai kisim gutpela win, ol i no inap lukim belhat bilong God, na ol bai sindaun gutpela wantaim Jisas long nupela heven na nupela graun. Holi Spirit i save helpim olgeta manmeri bilong God bilong autim dispela tok long ol frens bilong ol na ol wanlain bilong ol.
Em olsem na sapos ol bikman bilong lotu i autim tok, na tok bilong ol i no pas long trupela tok bilong kingdom bilong God, i no pas olgeta long trupela tok i tokaut long God i fogivim na kisim bek sinmanmeri long feitful wok bilong Jisas tasol, orait yumi ken i save olsem, Holi Spirit i no pas long ol na i no stiaim tok bilong ol. Maski ol tok, “Holi Spirit i pulap long mi”, na maski ol i tok olsem, “Mi kisim skul long Baibel Skul”, sapos ol i tokaut long ol narapela rot na long ol narapela samting na tok, “Dispela em i rot bilong God i kisim bek sinmanmeri,” orait yumi no ken i harim o bihainim tok bilong ol.
Wok bilong Holi Spirit em i wok bilong putim trupela tok bilong kingdom bilong God long ples klia. Wankain olsem Pita na Jon, yumi manmeri nating yumi ken i save long trupela tok bilong kingdom bilong God. Long wanem, Holi Spirit i ken i skulim yumi long em na givim strong long yumi bilong tokaut klia.
2. Ol bikman bilong lotu i mekim wanem long tok bilong feitful wok bilong Jisas?
Lukim lain 14-18. Taim Pita na Jon i oraitim lek nogut man, orait tupela i wokim bikpela sain long ai bilong ol manmeri. Na ol bikman bilong lotu ol i lukim na ol i save, na ol i no painim wanpela samting bilong egensim na daunim dispela samting. Ol i no gat rot bilong tok olsem, “Dispela i no tru.” Long wanem, sain i stap long ples klia na ol bikman bilong lotu ol i lukim na ol i save olsem em i trupela samting.
Na ol i mekim wanem? Ol i pasim tok na wok wantaim bilong sailensim Pita na Jon na bilong karamapim tok bilong tupela. Ol i laik stopim tupela na tupela no ken i mekim toktok moa long ol trupela samting bilong As Ston bilong kingdom bilong God. Em olsem na ol i tretim tupela (lukim lain 18-22). Ol i laik tupela i lusim tok bilong Jisas. Na ol i laik paitim na bagarapim tupela, tasol ol i pret long ol manmeri i kisim belhat.
Ol bikman bilong lotu ol i save olsem, Pita na Jon i wokim trupela sain, na tupela i mekim trupela toktok. Em olsem na, long wanem as ol i no bilipim na trastim na amamas?
Lukim lain 16-17. Ating ol bikman bilong lotu ol i no laik samting i kamap bilong senisim ol samting bilong ol. Ol i pret long ol manmeri i lusim ol na ol i bihainim Jisas na bilipim na trastim Jisas. Ol i laik i stap bikman long lotu bilong ol yet na ol manmeri ol i bihainim ol. Na long tingting bilong ol, dispela samting i winim ol samting i tru na ol tok i tru. Ol i no tingting olsem, “Mipela mas bihainim ol samting i tru.” Nogat. Ol i tingting tasol long biknem bilong ol na sindaun bilong ol yet. Long dispela rot ol i lusim samting i tru.
Ol planti manmeri ol i harim tok bilong Pita na Jon, na planti bilong ol, ol i bilipim na trastim na bihainim tok bilong tupela (lukim Aposel 4:4). Em olsem na klostu 5000 man i tanim bel na ol i bilipim na trastim na bihainim Jisas. Ol bikman bilong lotu ol i lukim na ol i save, na ol i tingim namba na biknem bilong ol yet na ol i belhat long Pita na Jon. Ol i no laik pas long samting i tru. Nogat. Ol i tingting tasol long biknem na namba bilong ol yet – ol i laik lukautim biknem na namba bilong ol yet tasol.
Ating pasin bilong ol dispela bikman bilong lotu em i kamap long ples bilong yumi tu. Ol sampela bikman na lidaman bilong ol sampela lotu bilong P.N.G., ol i no tingting long trupela tok. Nogat. Ol i tingting tasol long biknem na namba bilong ol yet. Olsem na taim ol i harim trupela tok bilong feitful wok bilong Jisas, ol i no skelim olsem, “Dispela tok i tru o nogat.” Nogat. Ol i tingim olsem, “Nogut dispela tok i kapsaitim biknem na namba bilong mipela.” Em olsem na ol i wok long sailensim trupela tok bilong feitful wok bilong Jisas. Na ol i laik bagarapim ol man i autim trupela tok i tokaut long God i kisim bek sinmanmeri long feitful wok bilong Jisas tasol. Ol i laik bagarapim man i mekim tok olsem, “Jisas wanpela tasol Em i rot bilong sinmanmeri i go insait long kingdom (femili) bilong God, na ol narapela samting olsem baptais na Sabat na gutpela pasin na lotu pasin i no rot.”
Sapos em i fes taim long yu harim dispela tok bilong God i fogivim sin na kisim bek sinmanmeri long feitful wok bilong Jisas tasol, orait nogut yu i stap olsem ol bipo bikman bilong lotu. Nogut yu no skelim na painimaut olsem, tok i tru o nogat. Na nogut yu les long senisim bilip bilong yu na lotu bilong yu, na yu no skelim tok bilong painimaut olsem, tok i tru o nogat. Nogut yu les long senisim laip bilong yu, na yu les long skelim na bihainim trupela tok bilong feitful wok bilong Jisas.
3. Pita na Jon tupela i mekim wanem long tok bilong ol bikman bilong lotu.
Lukim lain 19-20. Pita na Jon i bekim tok bilong ol bikman bilong lotu, na tupela i sutim askim long ol olsem, “Wanem pasin i gutpela long ai bilong God? Mitupela i harim tok bilong yupela o mitupela i harim tok bilong God? Yupela skelim.” Ol bikman bilong lotu ol i mas skelim bilong ol yet. Tasol Pita na Jon i skelim pinis, na tupela i mekim kain tok olsem, “Tasol mitupela, mitupela bai harim na bihainim tok bilong God, na mitupela bai witnisim Jisas i go yet olsem Jisas i tokim mitupela long mekim.”
Ol bikman bilong lotu ol i belhat long dispela tok bilong Pita na Jon, na ol i tretim tupela moa (lain 21). Long wanem, ol i laik sailensim tupela, tasol tupela bai autim tok bilong God i go yet. Na tu, tok bilong Pita na Jon i putim ol long ples klia. Ol i save olsem, i no gutpela long harim na bihainim tok bilong man, na i gutpela tru long harim na bihainim tok bilong God. Em olsem tasol ol i les long Pita na Jon i harim na bihainim tok bilong God. Long wanem, ol i laik tupela i harim na bihainim tok bilong ol! Na ol i laik ol manmeri i harim na bihainim tok bilong ol tasol!
Pita na Jon i witnisim pinis Jisas i kirap bek long matmat na Em i stap laip. Jisas Em i king bilong kingdom bilong God, na Jisas Em i rot bilong sinmanmeri i go insait long kingdom bilong God – God i kisim bek sinmanmeri long rot bilong feitful wok bilong Jisas tasol na i no gat narapela rot. Em olsem na Pita na Jon i save pinis olsem, i gutpela tru long harim na bihainim tok bilong Jisas tasol.
Yumi skelim 3-pela kwesten pinis. Nau mi laik askim wanpela kwesten long yu, Yu bai mekim wanem?
Ol brata na sista, yu save harim na bihainim tok bilong ol man tasol, tok bilong ol bikman bilong misin tasol, o yu harim na bihainim tok bilong God, tok bilong Jisas tasol, o nogat? Yu pret long lusim tok bilong ol man na bihainim tok bilong Jisas tasol, o nogat? Yu sem tumas long ai bilong ol manmeri bilong lusim samting i no tru na harim na bihainim trupela tok bilong feitful wok bilong Jisas, o nogat?
Yu mas skelim bel bilong yu na yu wokim disisen bilong yu yet. Bai yu harim na bihainim tok bilong ol man, o bai yu harim na bihainim tok bilong Jisas tasol? Bai yu bihainim pasin bilong ol bikman i kotim Pita na Jon, o bai yu sanap strong olsem tupela na harim na bihainim tok bilong Jisas, As Ston bilong kingdom bilong God?
Em tasol.
