Bilong harim (Audio)
Moning.
Taim yumi harim tok “blesim bilong God”, ating yumi tingting tasol long ol kainkain samting bilong dispela graun – ol kainkain samting olsem gutpela sindaun, o mani, o gutpela graun, o planti pikinini, o taim yumi no lukim trabel long rot, o yumi no kisim sik tumas, o kopi bilong yumi i karim hevi kopi. Ating yumi tingim olsem, ol dispela kainkain samting em i blesim bilong God.
Aposel Pita em i stori long blesim bilong God. Yumi lukim long Aposel 3:17-26….
17Ol brata bilong mi, mi save, yupela wantaim ol lida man bilong yupela, yupela no save gut na yupela mekim ol dispela pasin. 18Tasol, long maus bilong ol profet, God i bin tokaut longtaim pinis olsem, Krais bai safa, na long dispela pasin yupela i bin mekim, God i fulfilim dispela tok bilong Em. 19Em olsem na, yupela tanim bel na kam bek gen long God, na Em bai rausim olgeta sin bilong yupela, 20na bai yupela i kisim gutpela win taim yupela i lukim BIKPELA. BIKPELA bai salim Krais bilong yupela i kam, na dispela Krais Em i Jisas. 21Em mas i stap long heven pastaim na wetim taim God bai mekim olgeta samting i kamap nupela. Long bipo, long maus bilong ol holi profet bilong Em, God i bin promisim ol dispela samting. 22Moses i bin tok olsem, ‘BIKPELA God bai kirapim wanpela profet olsem mi long namel long ol brata bilong yupela. Yupela mas harim olgeta tok bilong em long olgeta samting. 23Na olgeta man i no laik harim tok bilong dispela profet, bai God i rausim ol na ol bai i stap autsait olgeta long lain bilong Israel.’ (Lo 18:15 na 18-19) 24Na olgeta profet, Samuel wantaim ol i kamap bihain long em, olgeta i bin tokaut long dispela taim nau i kamap pinis. 25Yupela i pikinini bilong ol dispela profet na yupela i pikinini bilong kontrak God i bin mekim long ol tumbuna papa bilong yupela. God i bin tokim Abraham olsem, ‘Long rot bilong ol lain pikinini bilong yu, ol lain manmeri bilong dispela graun bai kisim blesim.’ (Jenesis 22:18 na 26:4) 26God i kirapim pinis wokman bilong Em, na i salim Em i kam pastaim long yupela, bilong blesim yupela olsem, long tanim yupela olgeta wanwan, bai yupela i no bihainim moa pasin nogut bilong yupela.
Blesim bilong God.
Pita i tokim ol manmeri olsem, “God i kirapim pinis wokman bilong Em, na Em i salim Em i kam pastaim long yupela, bilong blesim yupela….” (lain 26). Pastaim God i salim Jisas i kam long ol manmeri Juda (ol lain Israel), bilong blesim ol. Na dispela blesim i wanem kain samting? Ating yumi ken i tingim olsem, taim Jisas i stretim lek bilong lek nogut man (Aposel 3:1-16), orait dispela em i blesim bilong God. Tasol toktok bilong Pita i no go long dispela samting. Nogat. Tok bilong em i go long narapela samting olgeta.
Ol lain Juda (ol lain Israel) ol i bin kilim Jisas i dai, tasol God i bin kirapim Em long matmat na Em i stap laip. Na God i salim Jisas i kam gen long ol long rot bilong gutnius ol aposel i autim. God i mekim olsem bilong “tanim yupela olgeta wanwan, bai yupela i no bihainim moa pasin nogut bilong yupela.” (lain 26). Em olsem na dispela em i blesim Pita i tokaut long en. Taim God i givim gutnius bilong feitful wok bilong Jisas long ol, bilong givim sanis long ol bilong tanim bel na lusim pasin nogut na bihainim Jisas, orait God i blesim ol. Dispela em i blesim bilong God. Dispela em i nambawan blesim bilong God.
Nambawan blesim bilong God.
Na olsem wanem dispela em i nambawan blesim bilong God? Lukim lain 17-20. Pita i tokim ol olsem, “….yupela tanim bel na kam bek gen long God. Na Em bai rausim olgeta sin bilong yupela…” Taim yumi harim trupela tok i tokaut long God i kisim bek sin manmeri long feitful wok bilong Jisas long diwai kros, na yumi tanim bel na bilipim na trastim God long fogivim sin bilong yumi (kisim bek yumi) long feitful wok bilong Jisas tasol, orait God bai rausim olgeta sin bilong yumi! Long dispela as gutnius bilong feitful wok bilong Jisas tasol em i nambawan blesim bilong God.
Taim manmeri i tanim bel na lusim pasin bilong givim baksait long Jisas, orait God bai rausim olgeta sin bilong ol. Tru tumas, ol manmeri i kilim Jisas i dai, sapos ol i tanim bel long pasin nogut bilong ol (pasin bilong givim baksait long Jisas), orait God bai rausim sin bilong ol!
Tasol i gat narapela samting moa. Sapos ol i tanim bel long pasin bilong givim baksait long feitful wok bilong Jisas, ol i tanim bel long givim baksait long Jisas, orait long De bilong BIKPELA, long De bilong bikpela kot bilong BIKPELA, orait ol i no inap lukim belhat bilong God, ol i no inap fesim pe bilong sin bilong ol. Nogat. Ol bai sindaun gutpela na kisim gutpela win, gutpela malolo!
Tasol i gat sampela samting moa! Lukim lain 21. Sapos ol i tanim bel long pasin bilong givim baksait long feitful wok bilong Jisas, ol i tanim bel long givim baksait long Jisas, orait ol bai sindaun wantaim Jisas long nupela heven na nupela graun!
God i salim Jisas i kam long ol Juda (ol lain Israel) pastaim, na bihain God i salim Jisas i kam long yumi ol narapela lain manmeri. Pastaim ol lain Israel ol i harim gutnius i tokaut long God i kisim bek sin manmeri long feitful wok bilong Jisas long diwai kros tasol, na bihain yumi tu yumi harim dispela gutnius i tokaut long God i kisim bek sin manmeri long feitful wok bilong Jisas long diwai kros tasol.
Ol brata na sista, ating blesim yumi laik kisim tumas em i ol samting bilong dispela graun tasol, na yumi no tingim olsem, gutnius i tokaut long God i kisim bek sinmanmeri long feitful wok bilong Jisas tasol em i nambawan blesim bilong God. Yumi tingim olsem, God i stap bilong givim ol kago samting long yumi na yumi sindaun gutpela long ples bilong yumi. Yumi tingim olsem, gutnius bilong God i stap bilong kamapim ol kago samting long yumi na yumi sindaun gutpela long ples, na yumi no tingim olsem, gutnius i stap bilong tanim yumi wanwan na yumi no bihainim moa pasin nogut bilong yumi – i stap bilong givim laip long yumi.
Blesim bilong God i no nupela samting.
Blesim bilong God long feitful wok bilong Jisas em i no nupela samting. Olgeta profet i bin tokaut long Jisas bai kam, na long feitful wok bilong Jisas “ol lain manmeri bilong dispela graun bai kisim blesim.” (lain 22-25). (Ol tok i tokaut long God i kisim bek sinmanmeri long rot bilong baptais o long rot bilong Sabat o long rot bilong gutpela pasin o long rot bilong misin pasin, ol dispela tok i nupela tok!). Na God i salim Jisas i kam long yupela, long yumi, long rot bilong gutnius bilong feitful wok bilong Jisas, “bilong blesim yupela olsem, long tanim yupela olgeta wanwan, bai yupela i no bihainim moa pasin nogut bilong yupela” – bai yupela, yumi, no bihainim moa ol pasin bilong tumbuna bilong yumi na yumi no bihainim moa ol pasin bilong ples.
Em olsem na, maski yumi tok baksait na yumi daunim man i karim tok bilong feitful wok bilong Jisas i kam long yumi. Yumi tok tenkyu long God i salim Jisas i kam long yumi long rot bilong gutnius i tokaut long God i kisim bek sinmanmeri long feitful wok bilong Jisas tasol. Tok tenkyu na litimapim nem bilong God! Amamas na tok tenkyu long God! Kalap kalap na tok tenkyu long God!
Glenn.
Sapos yu laik save moa long dispela tok, orait yu lukim Aposel 3:17-26 long Autim Tok long www.pngbibleresources.org.
