Efesus 2:11-13.
Ating, yumi manmeri long dispela graun, yumi manmeri bilong lusim tingting. Long Efesus 2:11-13 Pol i tokim ol manmeri bilong sios bilong taun Efesus long holim tingting long bipo laip bilong ol. Em i tok olsem “Yupela holim tingting – bipo yupela stap longwe long God, tasol nau God i bin bringim yupela i kam.” Pol i mekim dispela kain toktok bikos ol manmeri long sios i stap long taun Efesus ol ken i lusim tingting.
Na yumi tu yumi inap lusim tingting. Olsem na, em i gutpela long yumi harim toktok gen na yumi trai hat long holim tingting. Pol i laik ol manmeri long sios Efesus i holim tingting gen – na em i laik yumi tu i holim tingting gen – God i laik yumi mas holim tingting.
Orait, Pol i laik (God i laik) yumi mas holim tingting long 2-pela samting. Na fes samting i olsem….
1. Pastaim, taim yumi no bilip, orait yumi i stap longwe long God.
Lukim na yumi ritim lain 11-12.
Ol manmeri i stap long sios long taun Efesus ol i Jentail manmeri. Dispela i minim olsem ol i no bon insait long ol lain Israel na Juda. Jentail em i nem bilong ol manmeri i no bon insait long ol lain Juda na Israel. Na ol manmeri i stap long sios long taun Efesus planti bilong ol i Jentail manmeri. Ol i no bilong ol lain Juda na Israel na ol i no bihainim pasin bilong ol. Em olsem na ol i no bin kisim mak bilong ol lain Juda na Israel – ol i no bin katim skin bilong ol. Katim skin em i wanpela bikpela mak bilong ol manmeri i bon insait long ol lain Juda na Israel. Em olsem na, ol lain Juda na Israel i save sutim tok long ol Jentail manmeri olsem, “Yupela manmeri i no katim skin.” Em olsem na tupela i stap separet separet.
Na yumi tu, yumi Jentail manmeri – yumi no bon insait long ol lain Juda na Israel. Long dispela samting yumi stap olsem ol manmeri bilong taun Efesus.
Na Pol i tok wanem long ol dispela lain long sios bilong taun Efesus? Em i tok olsem, yupela holim tingting long dispela samting – taim yupela no bilip – taim yupela no bin tanim bel na yupela no bilipim na trastim God long kisim bek yupela long feitful baim bek wok bilong Jisas long diwai kros – orait long dispela taim….
- “Yupela stap separet long Krais.”
Taim ol i no tanim bel na ol i no bilipim na trastim God long kisim bek ol long feitful baim bek wok bilong Jisas, orait ol i no save long Krais na ol i no save long wok bilong Krais – ol i stap separet long Krais na dispela i minim olsem ol i stap separet long trupela laip na ol i no save long rot bilong trupela laip.
Jisas Krais Em wanpela Em i rot bilong nupela laip. Jisas yet i bin tok olsem, “Mi yet Mi rot, na Mi as bilong Tok i tru, na Mi as bilong laip. Em i no gat wanpela man inap i go long Papa long narapela rot. Nogat. Long Mi tasol.” (Jon 14:6.) Em olsem na, manmeri i no bilipim na trastim God long kisim bek ol long wok bilong Krais, orait, ol i stap separet long Krais na ol i stap separet long trupela laip. Ol i no stap long rot bilong kisim laip. Nogat. Ol i stap long narapela rot na ol i wokabaut long rot bilong i dai tasol.
- “Yupela stap autsait long kingdom bilong ol Israel na autsait long ol promis bilong kontrak.”
Na dispela i minim olsem, ol i stap autsait long femili bilong God na autsait long olgeta blesim God i bin promisim ol lain bilong Em. God i mekim kontrak promis long ol Israel olsem, “Bai Mi i stap God bilong yupela na yupela bai i stap ol manmeri bilong Mi, na bai Mi blesim yupela na fogivim olgeta sin bilong yupela.” (Jeremaia 31:31-34 na Hibru 8:8-12.) Taim ol lain Efesus i stap separet long Krais na ol i no bilipim na trastim God long kisim bek ol long feitful wok bilong Krais, orait ol i stap autsait long kontrak promis bilong God na ol i stap autsait long femili bilong God na autsait long olgeta blesim God i bin promisim ol lain bilong Em.
- “Yupela no gat wanpela gutpela samting yupela wetim na i laik kamap bihain.”
Na dispela i minim olsem, ol i no ken i tingim olsem ol bai i stap wantaim God long heven na sindaun wantaim God long olgeta blesim bilong heven, nogat. Ol lain Israel ol i save tingim kontrak promis bilong God na ol i wetim taim we ol bai sindaun wantaim God insait long olgeta blesim bilong heven. Em olsem na taim ol Efesus ol i no save long Jisas na ol i no save long wok bilong Jisas long diwai kros na ol i stap separet long Krais, orait ol i stap autsait long ol kontrak promis bilong God na ol i no gat as long tingim ol bai lukim wanpela gutpela samting long bihain. Nogat. Ol bai lukim hevi na bagarap long hel tasol.
- “God i no stap wantaim yupela”
Taim ol Efesus ol i no save long feitful wok bilong Krais na ol i no bilipim na trastim God long kisim bek ol long feitful wok bilong Krais, orait God i no stap wantaim ol.
Em olsem na, taim ol manmeri bilong sios Efesus ol i no tanim bel yet, na ol i no save long feitful wok bilong Jisas yet, na ol i no bilipim na trastim wok bilong Jisas yet, na ol i no stap aninit na bihainim Jisas yet, long dispela taim ol i stap separet long Krais, na ol i stap autsait long femili bilong God, na ol i stap autsait long olgeta blesim God i bin promisim ol manmeri bilong Em, na ol i no inap lukim wanpela gutpela samting long bihain, na God i no stap wantaim ol.
Bipo, yumi olgeta i bin i stap olsem. Yumi i bilipim na trastim feitful wok bilong Jisas nau, orait bipo yumi bin i stap olsem. Na yupela i no tanim bel na bilipim na trastim feitful wok bilong Jisas yet, orait nau yupela i stap yet olsem.
Planti manmeri i kam sindaun long sios na i pas long sios na i stap lotu manmeri, tasol planti ol i no save long feitful baim bek wok bilong Jisas na ol i no tanim bel na bilipim na trastim God long kisim bek ol long feitful wok bilong Jisas tasol. Olsem na, yupela i no save long feitful wok bilong Jisas na yupela i no tanim bel yet na trastim God long kisim bek yupela long feitful wok bilong Jisas yet, orait yupela mas klia olsem, yupela i stap separet long Krais, na yupela i stap autsait long olgeta blesim bilong ol manmeri bilong God, na yupela no gat wanpela gutpela samting i ken i kamap long yupela long bihain, na God i no stap wantaim yupela.
Yu no ken i tingting olsem, “Mi save kam na harim lotu, olsem na, ating mi stap nau long olgeta blesim bilong God – ating mi no inap bagarap long bihain – ating mi no inap fesim hevi long bihain taim mi dai.” Yu no ken i kisim dispela kain tingting. Nogat.
Plis harim gut. God i tok klia long lain 11-12 – God i no stap wantaim manmeri i no save long feitful wok bilong Jisas na ol i no tanim bel na bilipim na trastim God long kisim bek ol long feitful wok bilong Jisas. Sapos yu no save long feitful wok bilong Jisas na yu no trastim feitful wok bilong Jisas , orait yu no inap i stap orait taim yu dai. Bai yu fesim hevi. Bai yu bagarap. Long wanem, yu stap separet long Krais na yu stap autsait long femili bilong God na autsait long olgeta blesim bilong God na yu no inap lukim heven na God i no stap wantaim yu.
Em olsem na bai yu bagarap long hel. Hel em i ples we ol manmeri i no save long feitful wok bilong Jisas, na ol i dai, ol bai i stap separet long Krais na separet long God na separet long olgeta gutpela blesim bilong God oltaim oltaim i go i go olgeta.
Olsem na, mi laik givim woning long yu nau – plis, yu no ken i sindaun nating long lotu. Yu no ken i lukluk tasol long mipela i bilipim na trastim feitful wok bilong Jisas. Yu no ken i paul long tingting bilong yu na yu tingim olsem, “Mi kam harim lotu, em inap.” Nogat. Yu no ken i mekim olsem. Plis, yu mas tanim bel na bilipim na trastim feitful wok Jisas i bin mekim – trastim God long kisim bek yu long wok bilong Jisas tasol – na yu stap aninit tru long Jisas Krais na bihainim Em tasol.
Na tu, mi laik tanim dispela tok i go long narapela sait liklik. Yumi save pinis olsem, manmeri i no save long feitful wok bilong Jisas, orait ol i stap separet long Krais, na ol i stap separet long femili bilong God, na ol i stap separet long ol blesim God i bin promisim ol manmeri bilong Em, na ol i no inap lukim wanpela gutpela blesim bilong heven long bihain, na God i no stap wantaim ol. Em olsem na, long dispela as tasol ol i no ken i kisim baptais na ol i no ken i prea insait long sios miting bilong yumi na ol i no ken i kamap lida bilong sios.
Ol i welkam long kam – plis harim gut – ol i welkam long kam na sindaun wantaim yumi na harim trupela tok bilong God wantaim yumi, tasol sapos ol no save long feitful wok bilong Jisas na ol i no tanim bel na trastim Jisas, orait God i no stap wantaim ol na ol i mas i stap nating tasol. Olsem na, yumi no ken i tok maski na larim ol i kisim baptais na mekim prea insait long sios miting na kamap lida. Nogat. Ol i mas i stap nating tasol na sindaun harim tok bilong God tasol.
Orait, em inap. Pol i laik yumi i mas holim tingting olsem, pastaim, taim yumi no save long feitful wok bilong Jisas na yumi no bilipim na trastim Em yet, orait yumi bin i stap longwe tru long God.
Namba 2 samting Pol i laik yumi mas holim tingting i olsem….
2. Blut bilong Krais i bringim yumi i kam long God.
Yumi tok pinis olsem, “Pastaim, taim yumi no save long feitful wok bilong Jisas na yumi no bilipim na trastim Em, orait yumi i stap longwe long God.” Em olsem na, sapos yumi i stap longwe long God, orait wanem samting i ken i kisim yumi i kam long God? Hau na bai yumi kam long God? God i ken i kisim bek yumi long wanem samting? Yumi ken i go insait long femili bilong God olsem wanem? Sapos yumi i stap longwe long God, orait wanem samting i ken i kisim yumi i kam long God?
Lukim lain 13….
“Bipo yupela i stap longwe tru. Tasol nau, long wok bilong Krais yupela i stap klostu. Blut bilong Krais i bin bringim yupela i kam long God.”
Yu save, pastaim, ol manmeri i stap long sios bilong taun Efesus, pastaim ol i stap longwe long God na ol i stap separet long Krais na ol i stap separet long olgeta blesim bilong heven na God i no stap wantaim ol. Tasol nau nogat. Long wanem? Wok Jisas Krais i bin mekim bilong ol, dispela wok bilong Krais i bin bringim ol i kam long God. Blut bilong Krais i bin bringim ol i kam long God. Wok bilong Jisas Krais long diwai kros i bin bringim ol i kam long God.
Na mi tokim yupela, dispela rot em i no senis. Blut bilong Jisas tasol i bringim ol manmeri long Efesus i kam. Na blut bilong Jisas i bringim yumi i kam, em yumi i save long feitful wok bilong Jisas na i bilipim na trastim Em na i bilipim na trastim God long kisim bek yumi long feitful wok bilong Jisas. Na blut bilong Jisas tasol i ken i bringim yupela i no kam yet, i kam.
Long dispela taim nau yumi stap long em i gat planti manmeri i tingting olsem, “Yumi no stap longwe long God. Yumi no separet tumas long Krais – yumi manmeri yumi spesol long ai bilong God. Na sapos yumi lavim God na lavim ol manmeri na harim lotu, em nau, yumi kam klostu long God. Lotu pasin i save kisim mipela i kam long God. Pasin bilong baptais na pasin bilong lukautim de Sabat i bringim yumi i kam insait long olgeta blesim bilong heven.” Planti manmeri i holim dispela kain tingting.
Yu save, ol i senisim nabaut tok bilong God. Ol i senisim nabaut ol samting God i tokim yumi insait long Baibel. Harim. God i no bin senisim Tok bilong Em. Nogat tru. Samting i bin kisim ol lain Efesus i kam long God, em dispela seim samting i kisim yumi i kam long God, na em i dispela seim samting i ken i bringim yupela i no kam yet i kam long God. Na dispela samting em i blut – em i wok – bilong Jisas Krais.
Harim tok i stap long Hibru 13:8….
Jisas Krais i stap wankain tasol long asde na long nau tu na long olgeta taim bihain.
Yu save, Jisas i no save senis. Wok bilong Jisas i no save senis. Samting God i save yusim bilong bringim longwe manmeri i kam long Em yet i no senis.
Na harim tok i stap long 1 Peter 1:24….
Olgeta manmeri ol i no save stap longpela taim long graun. Ol i save pinis hariap olsem gras. Na biknem bilong ol i save pundaun olsem ol flaua nabaut. Gras i save drai, na ol flaua i save pundaun. Tasol Tok bilong BIKPELA i save stap oltaim oltaim.
Planti manmeri bai hamarim yupela long planti kainkain toktok. Tasol tok bilong ol i olsem ol flaua nabaut – em bai i drai na pundaun. Tasol tok bilong God bai i stap oltaim oltaim. Em olsem na yumi mas holim tingting long tok God i givim yumi. Yumi mas holim tingting olsem….
Pastaim, taim yumi no save long feitful wok bilong Jisas na yumi no tanim bel na bilipim na trastim feitful wok bilong Jisas na yumi no i stap aninit long Em na bihainim Em, orait long dispela taim yumi i stap separet long Krais, na yumi i stap autsait long femili bilong God na autsait long ol promis bilong God, na yumi no inap lukim ol gutpela blesim bilong heven, na God i no stap wantaim yumi……..Tasol, wok bilong Jisas, blut bilong Jisas i bringim yumi i kam long God. Blut bilong Krais i kisim yumi i kam. Wok bilong Krais long diwai kros i kisim yumi i kam long God na long olgeta blesim bilong heven.
Planti manmeri i ken i tok olsem, “Yupela lus lain tasol – yupela Satan lain tasol.” Tasol nogat tru. Olsem na, mi tokim yupela, holim tingting na amamas na tok tenkyu. Long wanem, blut bilong Jisas i kisim yumi i kam long God na yumi no separet moa long ol blesim bilong ol kontrak promis bilong God.
Em tasol.
