Buk Song

Devit i Raitim Dispela Song. Em Bilong Man i Bosim Musik.

¹Mi save trastim BIKPELA long lukautim mi;
hau na bai yupela tokim mi olsem,
“Ranawe i go long maunten olsem ol pisin.
²Lukim, ol man nogut i taitim banara bilong ol.
Ol i redim ol spia na wetim tudak,
bai ol i ken i tromoi spia i go long man i save bihainim gutpela tingting.
³Taim ol manmeri i lusim strongpela graun
ol stretpela manmeri bilong God i ken i mekim wanem?”

⁴BIKPELA i stap long holi tempel bilong Em;
BIKPELA Em i king na Em i stap long heven.
Em i save lukim pasin bilong ol pikinini bilong ol man;
ai bilong Em i skelim olgeta pasin bilong ol.
⁵BIKPELA i save traim ol stretpela manmeri bilong Em.
Tasol, ol man nogut wantaim ol man i laikim pasin bilong kros pait
BIKPELA i hetim ol tru.
⁶Long ol, Em bai kapsaitim hatpela sit bilong paia na hatpela paia bilong salfa;
ol bai dringim hatpela win tasol.
⁷Long wanem, BIKPELA Em i stretpela olgeta;
Em i laikim tru pasin bilong stretim ol samting i no stret.
Manmeri i bihainim Em tru, bai ol i lukim fes bilong Em.