Buk Song

Devit i Raitim Dispela Song. Em Bilong Man i Bosim Musik. Yusim Inap long Sheminith.

¹BIKPELA, plis helpim mipela. Ol gutpela manmeri i no stap moa;
ol feitful manmeri mi no save lukim.
²Olgeta manmeri ol i save mekim tok giaman long ol narapela manmeri;
ol i save mekim tok gris bilong trikim ol narapela manmeri.

³BIKPELA, mobeta Yu katim maus bilong ol manmeri i mekim tok gris,
na Yu kamautim tang bilong ol manmeri i save apim ol yet.
⁴Ol i tok olsem, “Long maus bilong mipela, mipela bai winim ol manmeri.
Maus bilong mipela em bilong mipela na husat i ken i bosim mipela long dispela?”

⁵Ol man i no gat strong ol i kisim bagarap
na ol man i rabis ol i save kisim hevi.
Long dispela as BIKPELA i tok olsem, “Nau bai Mi kirap.
Mi bai lukautim ol dispela manmeri, na ol man i mekim tok nogut long ol, ol i no inap bagarapim ol.”
⁶Tok bilong BIKPELA i stret olgeta,
wankain olsem silva ol i bin klinim 7-pela taim long paia.

⁷BIKPELA, mi save olsem, Yu bai lukautim mipela gut.
Yu bai lukautim mipela oltaim oltaim na ol dispela manmeri nogut i no inap bagarapim mipela.
⁸Taim ol komyuniti i tingim pasin nogut i gutpela,
orait, ol dispela manmeri nogut i save raun fri.