Buk Song

Devit i Raitim Dispela Song. Em bilong Man i Bosim Musik.

¹Ol stupit manmeri i holim dispela kain tingting,
“I no gat God i stap.”
Ol i korap, na pasin bilong ol i nogut tru.
I no gat wanpela bilong ol i mekim gutpela pasin.

²BIKPELA bilong heven i save lukluk i go daun long ol pikinini bilong ol manmeri.
Em i wok long painim sampela manmeri i gat gutpela save,
sampela manmeri i bihainim God.

³Olgeta i bin givim baksait long God.
Olgeta wantaim ol i korap tasol.
I no gat wanpela manmeri i save mekim gutpela pasin.
Tru, i no gat wanpela.

⁴Ol manmeri i mekim pasin nogut,
ol manmeri i save pinisim ol lain bilong mi olsem ol i pinisim kaikai,
ol manmeri i no save bihainim BIKPELA,
ating ol dispela manmeri ol i no yusim het, a?

⁵Ol i stap, tasol pret i karamapim ol,
long wanem, God i stap wantaim komyuniti bilong ol stretpela manmeri bilong God.
⁶Yupela ol manmeri nogut, yupela save lap long pasin bilong ol rabisman,
tasol ol i save trastim BIKPELA long lukautim ol.

⁷Mi laikim tumas, Man bilong sevim Israel Em mas i kam long Saion.
Taim BIKPELA i friim ol lain bilong Em,
orait Jekop bai amamas
na Israel bai i stap belgut tru.