Buk Song

Devit i Raitim Dispela Song.

¹BIKPELA, husat i ken i stap long haus bilong Yu na lotu long Yu?
Husat i ken i sindaun long holi maunten bilong Yu bilong lotuim Yu?

²Man i no gat asua long laip bilong em,
na em i save mekim stretpela pasin,
na em i save mekim tok i tru olgeta taim,
³na em i no save tok baksait,
na em i no save mekim rong long ol narapela manmeri,
na em i no save sutim giaman tok long ol narapela manmeri,
⁴na em i save hetim pasin bilong ol manmeri nogut,
na em i laikim tru pasin bilong ol manmeri i aninit long BIKPELA,
na em i save bihainim tok promis bilong em yet, maski bihainim promis i givim hevi long em,
⁵na em i no putim pe bilong dinau antap tumas,
na em i no larim narapela man i braibim em bilong sutim tok giaman long man i no gat rong.
Man i stap olsem, orait em i ken i stap long haus bilong BIKPELA na lotuim Em.