Buk Song

Prea Bilong Devit.

¹BIKPELA, plis harim singaut i stretpela;
plis harim krai bilong mi.
Plis putim ia bilong Yu long prea bilong mi, long maus i no gat giaman.
²Mi laik Yu wokim disisen long mi na ol manmeri i klia mi no gat rong.
Larim ai bilong Yu i lukim stretpela pasin.

³Yu traim bel bilong mi, na long nait Yu skelim mi.
Yu sekim mi, na Yu no inap painim samting nogut.
Mi bin wokim disisen olsem, maus bilong mi i no ken i mekim sin.
⁴Mi no bihainim pasin bilong ol manmeri bilong dispela graun;
mi bihainim tok bilong Yu
na mi abrusim pasin bilong ol man bilong mekim trabel.
⁵Lek bilong mi i pas olgeta long rot bilong Yu,
na wanpela taim lek bilong mi i no wel.

⁶Mi singaut long Yu, God, long wanem, Yu save harim singaut bilong mi;
tanim ia bilong Yu i kam long mi, na harim prea bilong mi.
⁷Plis soim gutpela feitful lavim bilong Yu,
Yu God bilong Sevim ol manmeri i trastim Yu long lukautim ol;
long han sut bilong Yu, Yu sevim ol long birua bilong ol.

⁸Holim mi long lavim tru bilong Yu;
haitim mi long sado bilong wing bilong Yu,
⁹bai ol man nogut i laik mekim trabel long mi
na ol birua i laik kilim mi i dai na i raunim mi, ol i no ken i lukim mi.

¹⁰Ol i pasim bel bilong ol na ol i no tingting long marimari;
long maus bilong ol, ol i mekim bikhet toktok.
¹¹Ol i lukim lek mak bilong mi na ol i raunim mi;
long ai bilong ol, ol i was bilong pundaunim mi long graun.
¹²Ol i olsem wanpela laion i laik tumas long brukim skin;
i olsem wanpela yangpela laion i hait na i was i stap.

¹³BIKPELA, plis kirap. Kotim ol, na mekim ol i pundaun.
Yusim sod bilong Yu bilong sevim mi long ol man nogut.
¹⁴Bikpela, long han bilong Yu, plis sevim mi,
sevim mi long ol man bilong dispela graun, em ol man i no inap lukim gutpela samting long bihain.
Yu save pulimapim ol long ol planti gutpela samting,
na ol i karim planti pikinini bilong ol,
na bihain, ol bai lusim olgeta samting bilong ol long han bilong ol liklik pikinini bilong ol.

¹⁵Tasol mi, long stretpela rot bai mi lukluk yet long fes bilong Yu;
taim mi wekap, bai mi amamas long lukim Yu.