Buk Song

DEVIT, WOKBOI BILONG BIKPELA, I RAITIM DISPELA SONG. EM BILONG MAN I BOSIM MUSIK. DAVID EM I RAITIM NA SINGIM DISPELA SONG LONG BIKPELA TAIM BIKPELA I SEVIM EM LONG HAN BILONG OL BIRUA BILONG EM NA LONG HAN BILONG SOL.
DAVID EM I TOK:

¹Mi lavim Yu, BIKPELA, Yu strong bilong mi.
²BIKPELA Em i ston bilong mi, na Em i strongpela ples hait bilong mi, na Em i strongpela man bilong sevim mi.
Em i God bilong mi, na Em i ston bilong mi, na long Em mi i stap seif.
Em i difens bilong mi, na Em i pawa bilong sevim bilong mi, Em i strongpela banis bilong mi.
³ BIKPELA i gat namba bilong kisim biknem; mi singaut long Em,
na Em i sevim mi long han bilong ol birua bilong mi.

⁴Ol rop bilong dai em i bin banisim mi;
bikpela tait bilong bagarap em i kapsait na i winim mi.
⁵Ol rop bilong matmat i raunim na pasim mi;
ol trep bilong dai em i kamap long mi na mi fesim.
⁶Mi bel hevi i stap na mi singaut long BIKPELA;
mi kraikrai long God bilong mi bilong kisim helpim.
Long tempel bilong Em, Em i harim nek bilong mi;
kraikrai bilong mi i kam long Em long ia bilong Em.

⁷Graun em i guria na seksek,
na as ston bilong ol maunten i seksek,
ol maunten i guria, long wanem, BIKPELA Em i belhat.
⁸Smok em i kamaut long nus bilong Em,
na paia bilong pinisim olgeta samting i kamaut long maus bilong Em;
hatpela sit bilong paia i lait na i kamaut long en.
⁹Em i brukim skai antap tru na Em i kam daun;
na aninit long lek bilong Em i gat ol blekpela klaut i stap.
¹⁰Em i kalap long serabem na Em i flai;
Em i raun i go kam long han bilong win.
¹¹Em i mekim tudak i karamapim Em na i raunim Em;
blekpela klaut i hevi long ren i karamapim na raunim Em.
¹²Long lait bilong Em ol blekpela klaut i kamaut na i ran i go, na
ais na laitning i sut i go daun.
¹³BIKPELA i mekim bikpela nois long heven;
nek bilong God Antap Tru em i pairap namel long ais na laitning i sut i go kam.
¹⁴Em i sutim spia bilong Em na ol birua i ran i go nabaut,
long bikpela sut bilong laitning Em i ranim ol.
¹⁵Long belhat bilong Yu, BIKPELA,
long strongpela win i kam long nus bilong Yu,
Yu mekim solwara i drai na ol baret bilong solwara na as ston bilong dispela graun i kamap ples klia.

¹⁶BIKPELA i stap antap na Em i putim han i kam daun na Em i holimpas mi;
Em i pulim mi i kamaut long wara i dip tumas.
¹⁷Em i reskiuim mi long han bilong strongpela birua bilong mi na long han bilong manmeri i hetim mi,
long wanem, ol i strong tumas na i winim mi.
¹⁸Taim trabel na hevi i kamap long mi, ol i egensim mi,
tasol BIKPELA Em i sapot bilong mi.
¹⁹Em i kisim mi i kamaut long trabel na hevi na Em i putim mi long gutpela hap;
Em i reskiuim mi bikos Em i belgut long mi.

²⁰BIKPELA i mekim wok long mi inap long stretpela pasin bilong mi;
han bilong mi klin na Em i wokim ol gutpela samting long mi.
²¹Long wanem, mi bihainim rot bilong BIKPELA;
mi no mekim pasin nogut bilong tanim na lusim God bilong mi.
²²Olgeta lo bilong Em i stiaim laip bilong mi;
mi no bin tanim na lusim toktok bilong God.
²³Mi no gat asua long ai bilong Em
na mi lukaut gut na mi abrusim sin.
²⁴BIKPELA i wokim ol gutpela samting long mi inap long stretpela pasin bilong mi,
han bilong mi klin long ai bilong Em na Em i wokim ol gutpela samting long mi.

²⁵Manmeri i feitful, ol bai save long feitful bilong Yu, BIKPELA,
na manmeri i stretpela, ol bai save long stretpela bilong Yu.
²⁶Manmeri i klin, ol bai save long klin Yu,
Tasol, manmeri i wel tumas, Yu bai wel tumas long ol.
²⁷Yu save helpim manmeri i daunim ol yet,
tasol Yu save semim manmeri i apim ol yet.
²⁸BIKPELA, Yu yet Yu paia bilong lam bilong mi;
God bilong mi, Yu save mekim tudak bilong mi i kamap tulait.
²⁹Sapos helpim bilong Yu i stap wantaim mi, mi ken i winim ol ami;
sapos God bilong mi i stap wantaim mi, mi ken i kalap long strongpela banis bilong birua.

³⁰Olgeta samting bilong dispela God i gutpela na stretpela olgeta;
olgeta tok bilong BIKPELA i tru tumas;
Em save raunim na difenim olgeta manmeri i trastim Em long lukautim ol.
³¹Wanpela God tasol i stap na Em i BIKPELA.
Na wanpela Ston tasol i stap na Em i God bilong mipela.
³²Em i God tasol i givim strong long mi na
i mekim mi wokabaut long pasin i gutpela na stretpela.
³³Em i mekim lek bilong mi i stap strong olsem wanpela dia;
Em i mekim mi i sanap gut na mi no pundaun long rot bilong ol bikpela maunten.
³⁴Em i trenim han bilong mi bai mi ken i winim pait;
han bilong mi i ken i taitim strongpela bunara ol i wokim long brons.
³⁵BIKPELA, helpim na sevim bilong Yu i raunim mi na i stap defens bilong mi,
na han sut bilong Yu i holim mi na mi sanap;
helpim bilong Yu i givim namba long mi.
³⁶Yu bin stretim rot bilong lek bilong mi,
na mi wokabaut gut na mi no wel na pundaun.

³⁷Mi ranim ol birua bilong mi na mi holimpas ol,
na mi no tanim bek, nogat, mi distroim ol pastaim.
³⁸Mi krungutim ol bai ol i no inap kirap gen;
ol i pundaun aninit long lek bilong mi.
³⁹God, Yu bin strongim mi na mi winim pait;
Yu daunim ol birua bilong mi long lek bilong mi.
⁴⁰Yu mekim ol birua bilong mi i pret na ol i laik ranawe;
na mi distroim ol dispela lain i hetim mi.
⁴¹Ol i singaut bilong kisim helpim,
tasol wanpela helpim bilong ol i no stap;
ol i singaut long BIKPELA,
tasol Em i no bekim singaut bilong ol.
⁴²Mi smasim ol i go liklik tru olsem das bilong win,
na mi krungutim ol olsem graun malumalu long rot.

⁴³Yu bin sevim mi long kisim trabel long han bilong ol manmeri;
Yu mekim mi i stap bikman bilong ol lain manmeri nabaut;
manmeri mi no save long ol, nau ol i stap aninit long mi.
⁴⁴Taim ol manmeri i harim stori long mi, ol i bihainim mi;
ol longwe manmeri ol i pret pret na i kam long mi.
⁴⁵Strong bilong ol i lusim ol;
ol i lusim strongpela banis bilong ol na guria guria i kam.

⁴⁶BIKPELA i stap! Givim biknem long Ston bilong mi!
Litimapim nem long God, Sevya bilong mi!
⁴⁷Em i God bilong bekim ol birua bilong mi,
Em i daunim ol lain manmeri aninit long lek bilong mi,
⁴⁸Em i sevim mi long han bilong ol birua.
Tru tumas, Yu bin litimapim mi bilong winim ol birua bilong mi,
Yu bin kisim bek mi long han bilong ol man i laik solapim mi.
⁴⁹Em olsem na bai mi litimapim nem bilong Yu, BIKPELA, namel long ol lain manmeri nabaut; bai mi singim ol song bilong givim biknem long Yu.
⁵⁰BIKPELA i putim ol birua i go long han bilong king bilong Em na em i winim ol nogut tru;
Em i soim feitful lavim i no save pinis long man Em i bin makim, long Devit na long ol lain bilong em bilong oltaim.