Buk Song

DEVIT I RAITIM DISPELA SONG. EM BILONG MAN I BOSIM MUSIK.

¹Mipela laik BIKPELA i harim prea bilong yu long dispela taim bilong trabel. *
Mipela laik nem bilong God bilong Jekop i raunim na lukautim yu.
²Mipela laik BIKPELA, long haus holi bilong Em, i salim helpim i go long yu
na long ples Saion Em i salim sapot bilong Em i go long yu.
³Mipela laik BIKPELA i holim tingting long olgeta ofa bilong yu
na Em i wanbel long ofa yu kukim long alta. Sila
⁴Mipela laik BIKPELA i kamapim olgeta samting yu tingting long mekim
na olgeta plen bilong yu i win.

⁵Mipela laik yumi kisim amamas na bikmaus long win bilong yu
na long nem bilong God bilong yumi, yumi sanapim ol fleg bilong yumi.
Mipela laik BIKPELA i fulfilim olgeta askim bilong yu.
⁶Nau mi klia olsem, BIKPELA i sevim man Em i bin makim;
Em bai harim prea bilong em long holi heven bilong Em
na long strong bilong han sut bilong Em, Em bai sevim em.
⁷Ol sampela lain ol i trastim ol karis bilong pait na ol sampela lain ol i trastim ol hos,
tasol mipela trastim nem bilong BIKPELA God bilong mipela.
⁸Ol dispela lain ol i pundaun na lus olgeta,
tasol mipela i kirap na sanap strong.

⁹BIKPELA, givim win long king bilong mipela!
Plis harim singaut bilong mipela.

* Long pait king i win na ol birua i lus.