Buk Song

DEVIT I RAITIM DISPELA SONG.

¹BIKPELA, long Yu mi litimapim laip bilong mi,
²God bilong mi, mi save trastim Yu.
Plis, Yu no ken i larim mi na mi kisim sem,
na Yu no ken i larim ol birua i winim mi na amamas.
³Tru tumas, manmeri i trastim Yu ol i no inap sem, nogat,
tasol ol manmeri i bikhet long Yu ol bai sem nogut tru.

⁴BIKPELA, lainim mi long olgeta samting bilong Yu,
skulim mi long rot bilong Yu.
⁵Lidim mi na tisim mi long trupela tok bilong Yu,
long wanem, Yu God bilong sevim mi,
na long han bilong Yu mi putim laip bilong mi.

⁶BIKPELA, plis holim tingting long ol bikpela marimari na feitful lavim bilong Yu,
long wanem, marimari na feitful lavim bilong Yu i stap long bipo tru na i kam i kam olsem.
⁷Plis, Yu no ken i holim tingting long ol sin bilong mi taim mi stap yangpela man na long ol pasin nogut bilong mi.
BIKPELA, plis bihainim feitful lavim bilong Yu na Yu tingim mi,
bilong Yu kisim oana i pas long gutpela bilong Yu.

⁸BIKPELA Em i gutpela na stretpela,
long dispela as Em i save skulim mipela sinmanmeri long rot bilong Em.
⁹Em i lidim manmeri i daunim ol yet long pasin i stretpela,
na Em i tisim ol long rot bilong Em.
¹⁰Olgeta samting BIKPELA i mekim Em i mekim long feitful lavim bilong Em
long manmeri i bihainim tok bilong kontrak bilong Em.

¹¹BIKPELA, sin bilong mi i bikpela tru, plis fogivim sin bilong mi,
bilong Yu kisim oana i pas long nem bilong Yu.

¹²Na man i pret long BIKPELA em i olsem wanem?
BIKPELA bai skulim dispela man long rot em i ken i bihainim.
¹³Laip bilong em bai i stap gutpela tru,
na ol pikinini bilong em bai sindaun gutpela long graun.
¹⁴BIKPELA i mekim tok bilong Em klia long manmeri i pret long Em,
na Em i soim ol samting bilong kontrak bilong Em long ol.

¹⁵Olgeta taim ai bilong mi i lukluk i go long BIKPELA,
long wanem, Em bai sevim mi long umben bilong ol birua.

¹⁶BIKPELA, plis tanim pes bilong Yu i kam long mi na mekim grasia long mi,
long wanem, mi stap wanpis na mi kisim bikpela hevi.
¹⁷Ol hevi long bel bilong mi i kamap planti tumas;
plis friim mi long ol hevi bilong mi.
¹⁸Lukim ol hevi na ol trabel i holimpas mi,
na fogivim mi long ol sin bilong mi.

¹⁹Lukim, ol birua bilong mi i kamap planti moa
na hetim bilong ol i bikpela tumas bilong bagarapim mi.
²⁰Plis lukautim laip bilong mi, na sevim mi!
Mi trastim Yu bilong lukautim mi,
plis, Yu no ken i larim mi na mi kisim sem.
²¹Mi laik trupela pasin na stretpela tingting i raunim mi,
long wanem, hop bilong mi i stap long Yu.

²²God, plis sevim Israel,
sevim ol long ol trabel na hevi bilong ol!