Buk Song

DEVIT I RAITIM DISPELA SONG.

¹Givim biknem long BIKPELA, yupela ol ensel bilong heven, givim biknem long BIKPELA long glori na strong bilong Em.
²Givim biknem bilong BIKPELA long ol glori i pas long nem bilong Em.
Brukim skru long BIKPELA na litimapim nem long Em long holi pasin bilong Em, ol holi pasin i naispela tru.

³BIKPELA i toktok, na nek bilong Em i stap antap long solwara;*
God bilong glori i toktok, na nek bilong Em i pairap,
nek bilong BIKPELA i pairap na i winim nois bilong biksolwara.
⁴BIKPELA i toktok, na nek bilong Em i gat pawa;
nek bilong BIKPELA i gat bikpela namba stret.
⁵BIKPELA i toktok, na nek bilong Em i brukim ol diwai sida;
BIKPELA i brukim na mekim liklik ol diwai sida bilong Lebanon.
⁶Em i mekim maunten Lebanon i kalap olsem pikinini bulmakau,
na maunten Hermon i kalap olsem yangpela wel bulmakau.
⁷BIKPELA i toktok, na nek bilong Em i painim mak bilong en olsem paia bilong laitning.
⁸BIKPELA i toktok, na nek bilong Em i seksekim ples wesan;
BIKPELA i seksekim ples Wesan bilong Kades.
⁹BIKPELA i toktok, na nek bilong Em i mekim strongpela diwai i tanim,
na lip bilong ol diwai bilong bus i lus nating.
Na long holi tempel bilong Em olgeta i bikmaus olsem, “Glori bilong God i bikpela tru!”

¹⁰BIKPELA i bosim bikpela tait; ^**
BIKPELA i sindaun king bilong oltaim oltaim.
¹¹BIKPELA i save givim strong long ol manmeri bilong Em;
BIKPELA i save blesim ol lain bilong Em na givim bel isi long ol.

* Ating Devit i lukim stom i kam long solwara na dispela i kirapim tingting bilong em.
^** Lukim Jenesis 7:11-12.