Buk Song

Devit i Raitim Dispela Song. Em Bilong Man i Bosim Musik Na i Gat Ol Musik Samting i Gat String.

¹God, Yu yet Yu stretpela pasin bilong mi,
plis harim prea bilong mi taim mi singaut long Yu.
Taim mi stap insait long hevi Yu bin givim bel isi long mi.
Plis mekim grasia long mi na harim prea bilong mi.

²Yupela ol man, hamas taim bai yupela wok long daunim gutpela nem bilong mi na mekim mi sem?
Hamas taim bai yupela laikim ol tok i no gat as bilong em i stap,
na hamas taim bai yupela bihainim ol giaman tok?Sila
³Tasol yupela mas save olsem, BIKPELA i bin makim ol manmeri i bihainim wei bilong God na ol i bilong Em stret;
BIKPELA i save harim mi taim mi singaut long Em.

⁴Yupela ken i bel hat, tasol yupela no ken i mekim sin.
Taim yupela slip long bet bilong yupela,
orait, long bel bilong yupela, yupela skelim gut na yupela pasim maus.Sila
⁵Yupela mas mekim ofa i stretpela,
na putim trastim bilong yupela i go long BIKPELA.

⁶Planti manmeri i tok olsem, “Mipela laik lukim ol gutpela samting.
BIKPELA, mekim lait bilong fes bilong Yu i kamap long mipela.”
⁷Taim kaikai na wain i kamap planti long gaden, mi save kisim bikpela amamas.
Tasol, amamas Yu bin putim long bel bilong mi em i winim tru dispela amamas.

⁸Taim mi laik slip, bai mi bel isi na slip;
mi bai bel isi na slip bikos BIKPELA Yu tasol Yu lukautim mi.