Buk Song

Devit i Raitim Dispela Song. Em Bilong Man i Bosim Musik Na i Gat Ol Musik Samting i Gat String. Yusim Inap Long Sheminith.

¹BIKPELA, plis Yu no ken i krosim mi taim Yu belhat yet,
plis Yu no ken i stretim mi taim bel bilong Yu i paia yet.
²BIKPELA plis mekim marimari long mi, long wanem, klostu mi laik feint.
BIKPELA, plis oraitim mi, long wanem, mi pilim bikpela hevi long olgeta hap bodi bilong mi.
³Na dip insait long laip bilong mi tu, mi pilim bikpela hevi stret.
Hamas taim yet, BIKPELA, hamas taim yet?

⁴BIKPELA, plis kam na sevim mi.
Long rot bilong feitful lavim bilong Yu, plis sevim mi.
⁵Long wanem, taim man em i dai pinis em i no holim tingting long Yu.
Long matmat husat bai litimapim nem bilong Yu?

⁶Mi singaut singaut na strong bilong mi i pinis olgeta.
Olgeta nait aiwara bilong mi i wasim bet bilong mi.
Krai krai bilong mi i kamapim raunwara long metres bilong mi.
⁷Ai bilong mi i solap na mi no lukim gut wanpela samting,
long wanem, mi gat planti birua na mi karim bikpela hevi.

⁸Yupela i mekim pasin nogut, yupela klia long mi.
Long wanem, BIKPELA i harim pinis krai krai bilong mi.
⁹Mi singaut long BIKPELA na Em i harim;
BIKPELA i wanbel long prea bilong mi.
¹⁰Olgeta birua bilong mi bai sem na kisim bikpela hevi.
Wantu ol bai tanim na kisim bikpela sem tru.