Buk Song

Dispela Song Em i Wanpela Shiggaion Bilong Devit. Devit i Bel Hevi Long Tok Bilong Wanpela Man, Nem Bilong Em Kus, Em Bilong Lain Benjamin, Na Em i Singim Dispela Song Long BIKPELA.

¹BIKPELA, Yu God bilong mi, na mi save trastim Yu long lukautim mi;
plis sevim mi na mi no ken i go long han bilong ol man i ranim mi,
²nogut ol i bagarapim mi olsem laion i save mekim,
nogut ol i brukim nabaut laip bilong mi na i no gat wanpela man i stap bilong helpim mi.

³BIKPELA, Yu God bilong mi, sapos mi bin mekim olsem ol i tok
na sampela rong i stap long han bilong mi,
⁴sapos mi bin mekim pasin nogut long man i stap bel isi wantaim mi,
o mi bin mekim save nating long birua bilong mi,
⁵orait, larim birua i ranim mi na holimpas mi,
na larim em i krungutim laip bilong mi long graun,
na larim gutpela nem bilong mi stap pipia long das.Sila

⁶BIKPELA, plis kirapim belhat bilong Yu;
plis kirap na mekim save long ol birua i mekim belhat bilong mi;
plis kirap bilong helpim mi, na mekim stretpela kot bilong Yu i kamap.
⁷Larim ol kongregesen bilong ol manmeri i kam bung long Yu,
na Yu bilong antap tru Yu harim kot bilong ol.

⁸BIKPELA tasol i save skelim ol manmeri;
BIKPELA, skelim mi inap long stretpela pasin mi bin mekim,
na skelim mi inap long stretpela tingting mi save bihainim.
⁹Plis pinisim pasin nogut bilong ol manmeri nogut,
na mekim ol stretpela manmeri bilong Yu i stap gutpela.
Yu God bilong skelim tingting na bel bilong olgeta manmeri;
Yu stretpela God tumas!
¹⁰Difens bilong mi em i God yet,
God i save helpim ol manmeri i save bihainim gutpela tingting.
¹¹God Em i stretpela jas,
na long olgeta de Em save belhat long sin pasin.

¹²Sapos ol man nogut ol i no tanim bel, orait God bai sapim bainat bilong Em,
na Em bai taitim banara bilong Em.
¹³Em i redim ol strongpela samting bilong kilim man nogut i dai,
Em i makim ol long spia i gat paia.
¹⁴Skelim man nogut. Em i save kamapim ol kainkain pasin nogut
na laip bilong em i pulap long mekim ol kainkain trabel
na em i save kamapim ol kainkain tok giaman.
¹⁵Em i save digim hul long graun,
tasol em yet i pundaun insait long em.
¹⁶Trabel em i kirapim i save tanim na kaikaim em yet.
Pasin nogut bilong em i bagarapim em yet.