Yumi mekim wanem
Mak 6:14-29.
Na i no gat kwesten mak, sapos yu save long Jisas, na yu save Jisas Em i God, na yu save long as bilong kam bilong Em, na yu save long pasin bilong bihainim Em, orait nau yu mas wokim disisen bilong yu.
1.. Yu ken i lusim rot nau yu wokabaut long em (tanim bel) na yu bihainim Jisas.
Tanim bel i minim olsem, yu lusim rot nau yu wokabaut long em, na yu tanim na yu wokabaut long rot bilong Jisas. Tanim bel i minim olsem, yu lusim pasin bilong givim baksait long Jisas na yu harim na bihainim tok bilong Em. Tanim bel i minim olsem, yu lusim independens pasin bilong yu na yu putim yu yet aninit long namba na bosim bilong Jisas. Tanim bel i minim olsem, yu lusim pasin bilong bihainim yu yet na yu bihainim Jisas olsem Jisas i tok.
Em olsem na, yu ken i wokim disisen bilong yu na tanim bel. Sapos nogat, orait ……
2.. Yu ken i stap nating na yu givim baksait long Jisas.
Pasin bilong yu i stap nating i wankain olsem pasin bilong yu i givim baksait long Jisas na yu tok nogat long Jisas. Sapos yu stap nating, orait dispela i olsem yu tok, “Mi no inap bilipim na trastim na bihainim Jisas.”
Mak, long buk bilong em, em i stori long wanpela man na em i gat sanis bilong tanim bel, tasol em i no tanim bel. Em i wokim disisen bilong em yet na em i no tanim bel.
Na man Mak i stori long em, em i wanpela king, na nem bilong em Herot.
Herot.
- Herot em i king bilong provins Galili. (Mak em i no tokim yumi, tasol Luk i tokim yumi long Luk 23:6-7.)
- Herot em i harim pinis ol stori bilong olgeta samting Jisas i mekim na em i harim toktok bilong ol manmeri long ol samting bilong Jisas. (Mak 6:14-15.)
- Na Herot i pret. Long wanem, Herot i wokim pati, na long pati Herot i wokim pasin nogut na em i kilim Jon bilong baptais bilong lukautim biknem bilong em long ai bilong ol sampela bikman. (Mak 6:16-29.)
Na Herot i les long tanim bel. Jon bilong baptais i bin tokim Herot long tanim bel, tasol Herot i no harim na bihainim tok bilong Jon. Yumi skelim rot bilong pundaun bilong Herot long Mak 6:17-29.
Pundaun bilong Herot.
1.. Herot i givim baksait long tok bilong God na em i bihainim laik bilong em yet.
Lukim lain 17-18.
Long Olpela Testamen God i tok pinis olsem, “Yu no ken i kisim meri bilong brata bilong yu.” (Wok Pris 20:21.*) Em olsem tasol Herot i givim baksait long tok bilong God, na em i bihainim laik bilong em yet, na em i kisim meri bilong brata bilong em na em i maritim em.
Long stadi namba 13 yumi bin tok olsem, pasin yumi mekim i soim bilip bilong yumi. Bilip bilong yumi i stiaim na bosim na kontrolim pasin bilong yumi. Em olsem na pasin bilong Herot i putim bilip bilong em long ples klia.
2.. Herot i harim Tok bilong God, tasol em i les long tanim bel na bihainim stretpela rot.
Lukim lain 19-20.
Herot i save pinis olsem Jon em i wanpela wokman bilong God. Na planti taim Jon i tokim Herot long tanim bel. Tasol Herot i les long tanim bel. Herodius i bel hat long Jon na em i laik kilim Jon i dai. Tasol Herot i harim tok bilong Jon i go yet. Em olsem na Herot i harim planti Tok bilong God long maus bilong Jon, na em i save olsem em i mas tanim bel, tasol em i no laik tanim bel na bihainim stretpela rot.
3.. Herot i save long stretpela pasin, tasol em i wokim disisen bilong em na em i bihainim pasin nogut.
Lukim lain 21-29.
Taim pikinini meri bilong Herodius i askim Herot bilong kisim het bilong Jon bilong baptais, orait Herot i gat 2-pela rot bilong em i stap. Wanpela rot i olsem, em i bihainim pasin i stret na tok nogat long Herodius. Na narapela rot i olsem, em i lukautim namba na nem bilong em yet na mekim pasin nogut na bihainim askim bilong Herodius. Em olsem na Herot i wokim disisen na em i bihainim rot namba 2 na em i kilim Jon i dai. Herot i gat sanis bilong tanim bel na bihainim gutpela rot, tasol em i no mekim olsem. Nogat. Em i bihainim rot nogut.
4.. Bihain, Herot i bungim Jisas, tasol Jisas Em i no toktok wantaim Herot.
Lukim Luk 23:9 wantaim Mak 8:35-38.
Ol birua i kisim Jisas i kam long Herot na Herot i askim Jisas long planti samting. Tasol Jisas i no bekim wanpela tok bilong Herot.
Long rot bilong Jon God i tokaut long Herot long tanim bel. Tasol Herot em i givim baksait long God na em i no tanim bel. Long wanem, em i laik lukautim namba na nem bilong em yet na em i laik i stap gutpela long ai bilong ol bikman. Em olsem na Herot em i no tanim bel, na long dispela as nau Jisas i givim baksait long Herot.
Yumi tu yumi gat 2-pela rot.
Long ol planti stadi bilong Buk Mak yumi lainim planti samting bilong ol samting bilong Jisas…..
- Yumi save pinis olsem, Jisas Em i Pikinini Bilong Man bilong visin bilong Daniel. Em i God olsem Papa Em i God na olsem Holi Spirit Em i God. Jisas Em i God i kam daun long dispela graun.
- Yumi save pinis olsem, Jisas Em i kam bilong lusim laip bilong Em bilong baim bek laip bilong ol planti sin manmeri olsem yu na mi.
- Yumi save pinis olsem, bihainim Jisas em i pasin bilong bilipim na trastim feitful baim bek wok bilong Jisas long diwai kros, na yumi harim na bihainim tok bilong Jisas long wokabaut na sindaun bilong yumi.
Na Jisas i tok klia olsem, “Yupela tanim bel na bilipim dispela gutnius.” (Lukim Mak 1:15.) Em olsem na yumi mas wokim disisen bilong yumi. Yumi ken i tanim bel o yumi ken i givim baksait long Jisas i go yet.
Planti manmeri ol i les long tanim bel.
Planti manmeri bilong dispela graun ol i laik abrusim pe bilong sin bilong ol na abrusim kalabus hel, na ol i laik kisim ol gutpela samting bilong heven. Ol i harim lotu, tasol ol i no laik tanim bel na bilipim na trastim feitful baim bek wok bilong Jisas na putim ol yet aninit long namba na bosim bilong Jisas.
Ating planti manmeri i stap olsem Herot. Ol i amamas long ol samting bilong Jisas, na ol i amamas long harim ol stori bilong Jisas, tasol ol i les long lusim rot bilong ol yet, na ol i laik sindaun long laik na save bilong ol yet tasol, na ol i laik bihainim ol samting bilong ples na ol samting bilong tumbuna bilong ol i go yet.
Ating sampela manmeri ol i les long lusim ol sampela pasin nogut. Ol i laik maritim narapela meri o ol i laik paul raun moa o ol i laik mekim ol narapela kain pasin nogut olsem. Olsem na, ol i les long tanim bel na bilipim na trastim na bihainim Jisas.
Ating sampela manmeri ol i sem tumas long tanim bel na bilipim na trastim feitful wok bilong Jisas na bihainim Em. Herot em i no laik kisim sem long ai bilong ol pren bilong em, olsem na, em i no tanim bel. Na wankain olsem, ol sampela manmeri ol i tingim olsem ol pren bilong ol bai lap long ol, olsem na ol i les long kisim sem long ai bilong ol pren na ol i no tanim bel. Ol i tingim olsem, tanim bel em i samting bilong ol wik manmeri, na ol i no laik i stap wik manmeri long ai bilong ol pren bilong ol.
Na sampela manmeri i tingim olsem, “Bihain bai mi tanim bel.” Tasol yumi mas tingim Herot. Bihain em i amamas long lukim na harim Jisas, tasol em i tuleit. Herot i askim planti askim long Jisas, tasol Jisas Em i no bekim em. Jisas Em i no toktok long Herot.
Yu no ken i tromoi laip bilong yu.
Mi no save long wanem as yu no tanim bel. Tasol mi mas tokim yu olsem, nogut yu tuleit. Nogut sanis bilong yu em i ekspaia. Olsem na, plis, nau yu mas tanim bel, na yu bilipim na trastim feitful wok bilong Jisas, na yu putim yu yet aninit long namba na bosim bilong Jisas long laip bilong yu.
Na sapos yu no tanim bel na yu stap olsem i go i go na yu dai na yu kamap long bikpela kot bilong Jisas, orait, sori tumas, bai yu harim tok bilong Jisas olsem, “Mi no save long yu, yu klia long Mi.”
Herot em i laik lukautim laip bilong em yet, tasol em i lusim laip bilong em. Nogut yu laik lukautim laip bilong yu na yu bihainim ol pasin bilong ples bilong yu na yu bihainim ol samting bilong tumbuna bilong yu na bihain yu lusim laip bilong yu. Nogut yu tromoi laip bilong yu bilong lukautim ol kastem wei bilong yu long ples.
Harim. Jisas Em i trupela man i kam i stap long dispela graun. Tru tumas Jisas Em i God i kam daun. Na tru tumas Jisas Em i lusim laip bilong Em bilong bai bek laip bilong ol sin manmeri i tanim bel na i bilipim na trastim feitful wok bilong Jisas long diwai kros, na i stap aninit long namba na bosim bilong Jisas long wokabaut na sindaun bilong ol.
Bai mi tok wanem long yu? Sapos yu no tanim bel yet, orait mi tokim yu nau olsem, “Tanim bel.” Yu no ken i stap olsem Herot. Nogat. Tanim bel nau na kisim laip long feitful baim bek wok bilong Jisas na putim yu yet aninit long namba na bosim bilong Jisas.
Yumi i tanim bel pinis.
Long yupela i tanim bel pinis, yupela i bilipim na trastim feitful baim bek wok bilong Jisas, yupela i stap pinis aninit long namba na bosim bilong Jisas long wokabaut na sindaun bilong yupela, orait mi mas tokim yupela olsem, yupela bihainim rait rot stret na bai yu lukim laip long heven wantaim Jisas.
Mi save olsem, planti lotu bilong ples i semim yupela na daunim yupela i bilipim na trastim feitful wok bilong Jisas. Na ol i wok long grisim yupela i go bek gen long rot bilong ol. Na ol i tok olsem, “Yupela bai lus.” Ol i tok olsem, tasol tok bilong Jisas i winim tok bilong ol. Yumi ken i trastim tok bilong Jisas. Long wanem, Jisas Em i God.
Jisas i tok olsem, “Mi no kam bilong mekim ol manmeri i stap wokboi bilong Mi. Nogat. Mi kam bilong mekim wok bilong helpim ol na bilong givim laip bilong Mi yet bilong baim bek ol dispela planti manmeri.” (Mak 10:45.) Tru tumas, Jisas i baim bek pinis manmeri i tanim bel na i bilipim na trastim baim bek wok bilong Em na i stap aninit long Em na bihainim Em.
Olsem na, yumi ken i sanap strong. Yumi no ken i seksek. Long wanem? Yumi kam long rait rot stet na bai yumi lukim laip long heven wantaim Jisas. Taim yumi lukim Jisas, orait Em i no inap sem long yumi. Long wanem, Em i bin lusim laip bilong Em bilong baim bek laip bilong yumi na Em bai welkamim yumi tasol.
Em tasol.
____________________
* Sapos wanpela brata i dai na em i no gat pikinini man i stap bilong karim lain bilong em, orait brata bilong em i mas maritim meri bilong brata i dai pinis na kamapim pikinini man bilong karim lain bilong brata i dai pinis. Lukim Lo 25:5. Na i luk olsem dispela lo i kapsaitim lo i stap long Wok Pris 20:21. Tasol nogat. Pasin bilong kamapim pikinini man bilong karim lain em i bikpela samting na i paslain. Long dispela wanpela as tasol brata i ken i maritim meri bilong brata bilong em. Herot em i no kisim Herodius bilong kamapim pikinini man bilong karim lain bilong brata bilong em. Nogat. Em i kisim nating meri bilong Filip, na long dispela as, Jon bilong baptais i tok Herot i gat rong.
