Yumi mekim wanem
Mak 10:32-45.
Yumi save pinis long planti samting bilong Jisas na nau yumi mas wokim disisen bilong yumi. Disisen bilong yumi i olsem,
- Yumi ken lusim rot nau yumi wokabaut long em (tanim bel) na yumi bihainim Jisas, o…
- Yumi ken stap nating na yumi givim baksait long Jisas.
Na yumi mas save olsem, pasin bilong harim lotu em i no wankain olsem pasin bilong tanim bel na bihainim Jisas. Nogat. Sapos yu wokim disisen bilong yu bilong harim lotu, orait yu mas save olsem, dispela disisen bilong yu i no olsem yu wokim disisen bilong tanim bel na pas long Jisas. Harim lotu em i narapela samting na tanim bel na bihainim Jisas em i narapela samting. Tupela i no wankain samting.
Mi mekim dispela tok, long wanem, mi no laik yu tingim olsem, “Mi stap gutpela,” tasol yu no i stap gutpela. Mi no ken i tokim yu olsem, “Yu no ken i wari, bai yu stap gutpela,” na bai yu i stap nogut. Long dispela as mi mas tok strong long yu olsem, pasin bilong harim lotu i no minim olsem yu bai i stap gutpela taim yu i dai o taim Jisas i kam.
Sapos yu laik i stap gutpela, orait yu mas tanim bel na bilipim na trastim feitful baim bek wok bilong Jisas, na yu putim yu yet aninit long namba na bosim bilong Jisas long wokabaut na sindaun bilong yu. Yu mas yusim tingting bilong yu na yu wokim disisen bilong yu na yu tanim bel na yu kam pas long olgeta samting bilong Jisas. Yu mas tingim baim bek wok bilong Jisas, na trastim God long kisim bek yu long feitful baim bek wok bilong Jisas tasol, na yu trastim wok bilong Jisas i baim olgeta pe bilong sin bilong yu bai God i kisim bek yu, na yu bihainim Jisas long olgeta samting long laip bilong yu.
Sapos yu laik i stap gutpela taim yu i dai o taim Jisas i kam, na yu laik i stap wantaim Jisas long Nupela Heven na Nupela Graun, orait yu mas wokim disisen bilong yu, na yu lusim rot nau yu wokabaut long em (tanim bel) na yu putim yu yet aninit long namba na bosim bilong Jisas long laip bilong yu (bihainim Jisas).
Yu mas wokim disisen. Bai yu tanim bel na bihainim Jisas o bai yu stap nating na wokabaut yet long rot bilong yu yet.
Nupela wokabaut na nupela sindaun.
Sapos yu wokim disisen na yu tanim bel na yu pas long olgeta samting bilong Jisas, orait yu mas save olsem, yu wokim disisen bilong bihainim nupela pasin long wokabaut na sindaun bilong yu. Yu no ken i tingim olsem, yu ken i tanim bel na bihainim Jisas na yu stap yet long ol kainkain pasin bilong yu yet. Nogat. Sapos yu tanim bel na yu bihainim Jisas, orait yu kam long nupela pasin long laip bilong yu.
Long stadi namba 11 yumi bin stori long pasin bilong bihainim Jisas. Pasin bilong bihainim Jisas i olsem…..
- Yumi daunim laik bilong yumi yet – yumi tok nogat long ol laik bilong yumi yet.
- Yumi karim diwai kros bilong yumi – yumi karim ol hevi i kamap long yumi na yumi bihainim Jisas i go yet.
- Yumi bihainim Jisas – yumi wok long wokabaut long pasin Jisas i wokabaut long em.
Na long Mak 10:32-45 yumi ken i save long wanpela samting moa. Jisas i tok olsem, ol manmeri i bihainim Em ol i mas wokabaut na sindaun long narapela kain pasin olgeta. Manmeri i bihainim Jisas ol i no ken i wokabaut na sindaun olsem ol manmeri bilong dispela graun. Nogat. Ol i mas wokabaut na sindaun narapela kain pasin olgeta.
Pasin bilong ol manmeri bilong dispela graun i olsem, ol i laik i stap paslain long ol narapela manmeri, na ol i apim ol yet, na ol i laik i stap nambawan, na ol i tingim ol samting bilong ol yet tasol. Em olsem tasol yumi i bihainim Jisas yumi mas daunim yumi yet na putim ol narapela manmeri paslain long yumi, na yumi lusim tingting long ol samting bilong yumi yet na yumi tingim na helpim ol narapela manmeri, na yumi lusim pasin bilong apim yumi yet na yumi daunim yumi yet na yumi tingim na helpim ol narapela manmeri.
Bihainim Jisas i minim olsem yumi i stap wokboi nating.
Sapos yu wokim disisen bilong tanim bel na bihainim Jisas, orait dispela i minim olsem yu wokim disisen bilong lusim bipo laip bilong yu we yu save tingim olgeta samting bilong yu yet, na yu putim tingting bilong yu i go long Jisas na long ol narapela manmeri.
Yumi skelim tok bilong Jisas long Mak 10:32-45.
- Long lain 32-34 wantaim lain 45. Jisas wantaim ol disaipel ol i wokabaut i go long Jerusalem, na Jisas i tokaut long ol samting Em bai mekim taim Em i kamap long Jerusalem. Jisas i tokaut long wok Em bai mekim long diwai kros bilong helpim ol disaipel na bilong helpim ol planti manmeri.
- Em olsem tasol ol disaipel ol i no harim gut tok bilong Jisas. Jems na Jon tupela i laik Jisas i givim pawa na namba long tupela bai tupela i winim ol narapela disaipel na winim olgeta narapela manmeri. Man i sindaun long han sut na long han kain bilong wanpela king, em i gat namba na pawa. Em olsem na, taim tupela i askim Jisas long sindaun han sut na han kais bilong Em, orait ol i askim Jisas long givim pawa na namba long tupela. (Lain 35-37.)
- Na Jisas i bekim askim bilong tupela na Em i askim tupela olsem, “Yutupela inap dring long dispela kap Mi bai dring long em, a? Na yutupela inap kisim dispela baptais Mi bai kisim, a?” Long kap Jisas i tok piksa long wok bilong Em, long hevi na pen Em bai kisim long diwai kros bilong baim pe bilong sin. Na long baptais Jisas i tok piksa long olgeta samting bilong diwai kros bai karamapim Em olsem wara bilong baptais. (Lain 38-39.)
Na tupela disaipel i no klia long as na minim bilong tok bilong Jisas na tupela i tok yes tasol. Na Jisas i tok olsem, “Tru, bai yutupela i kisim hevi na pen na ol dispela samting bai karamapim yutupela.” Na Jisas i no minim olsem, tupela bai karim hevi na pen bilong pe bilong sin olsem Jisas i karim. Nogat. Jisas wanpela tasol i karim pe bilong sin. Em olsem na Jisas i minim olsem, manmeri i bihainim Jisas ol bai karim hevi na pen na ol i bihainim Jisas. Long wanem, ol manmeri i egensim Jisas ol bai egensim manmeri i bihainim Jisas tu.
- Na ol narapela 10-pela disaipel ol i bel nogut long Jems na Jon i laik kisim namba na pawa bilong winim ol. Na ol i tok pait. (Lain 41.)
- Pasin bilong ol manmeri bilong dispela graun i olsem, ol i laik winim ol narapela manmeri na i stap paslain long ol. Olsem na ol i apim ol yet bilong i stap nambawan, na ol i tingim ol samting bilong ol yet tasol. Tasol pasin bilong Jisas i narapela kain pasin na i olsem, Em i daunim Em yet na Em i lusim laip bilong Em bilong helpim ol narapela manmeri. Jisas Em i no tingim Em yet. Nogat. Em i tingim ol narapela manmeri na Em i daunim Em yet na Em i lusim laip bilong Em bilong baim bek laip bilong ol. Jisas i putim ol paslain na Em i putim Em yet las. (Lain 42-45.)
Bihainim Jisas i minim olsem yumi wokabaut long nupela pasin.
Na dispela pasin bilong Jisas Em i soim yumi pasin bilong nupela laip bilong yumi i bilipim na trastim na bihainim Jisas. Olsem Jisas i putim laip bilong ol narapela manmeri paslain long laip bilong Em yet, orait yumi tu yumi putim laip bilong ol narapela manmeri paslain long laip bilong yumi. Bipo yumi putim olgeta samting bilong yumi fes, tasol nau yumi putim olgeta samting bilong yumi las. Bipo yumi tingim ol manmeri i mas helpim yumi, tasol nau yumi wok long helpim ol manmeri.
Sapos olgeta taim yu tingim olgeta samting bilong yu yet na yu pasim tingting bilong yu long ol narapela manmeri, orait yu no ken i tok olsem, “Mi bilipim na trastim na bihainim Jisas.” Jisas Em i no tingim Em yet na Jisas Em i no pasim tingting bilong Em long ol narapela manmeri. Nogat tru! Jisas Em i tingim ol na Em i lusim laip bilong Em bilong baim bek laip bilong ol. Sapos yumi laik bihainim Jisas, orait yumi mas bihainim pasin bilong Jisas na yumi lusim tingting long ol samting bilong yumi na yumi tingim ol narapela manmeri.
Lavim Jisas na wok long kisim pasin bilong Em.
Planti manmeri tumas ol i laik go long heven, tasol ol i no laik bihainim Jisas. Manmeri i kisim dispela kain tingting ol i no save gut long olgeta feitful wok Jisas i bin mekim bilong baim bek sin manmeri. Sapos yu tingim na kisim save moa long olgeta feitful wok Jisas i bin mekim bilong baim bek yu, orait dispela save bai senisim yu na yu bai strong long bihainim Jisas moa.
Bai yu tingim wok bilong Jisas i gutpela moa, na bai yu tingim Jisas yet i gutpela moa, na bai yu laik kisim na bihainim pasin bilong Jisas. Manmeri i tanim bel trutru ol i save kisim kain tingting olsem. Ol i tingim Jisas i nambawan stret na ol i laik wokabaut long laip bilong ol olsem Jisas. Ol i laik bihainim Jisas.
Yumi i trastim Jisas, yumi feil manmeri.
Yumi i tanim bel na i bilipim na trastim feitful wok bilong Jisas na i wok long bihainim Jisas, orait yumi mas save olsem, yumi feil manmeri. Jisas Em i no man bilong feil, olsem na, Em i wokabaut stret na tru olgeta taim. Tasol yumi feil manmeri, na taim yumi wok long wokabaut olsem Jisas, orait planti taim bai yumi feil. Em olsem tasol bai yumi senis na liklik liklik bai yumi kisim pasin bilong Jisas long laip bilong yumi. Liklik liklik bai yumi lusim selfis pasin bilong yumi na yumi tingim ol narapela manmeri. Planti taim yumi bai feil, tasol yumi bihainim Jisas i go yet.
Giaman senis.
Na sampela manmeri ol i amamas long helpim ol narapela manmeri, tasol ol i mekim olsem bilong apim ol yet na bilong kisim biknem long ai bilong ol manmeri. Sampela manmeri ol bai helpim ol narapela manmeri bilong amamasim ol misineri na ol waitman, bai ol i kisim mani na ol sampela kainkain kago bilong ol.
Na sampela manmeri ol i tingim olsem, “Sapos mi senisim laip bilong mi na wokim ol gutpela pasin, orait God bai amamas long mi na kisim bek mi.” Long dispela as tasol ol i senisim laip bilong ol.
Tasol, ol dispela kain senis em i no nupela laip Jisas i tokaut long em. Nogat. Ol manmeri i laik kisim biknem na ol i senis na ol manmeri i tingim God bai kisim bek ol long senis pasin bilong ol, ol i tingting yet long ol samting bilong ol yet. Ol i wokim selfis pasin i go yet. Ol i no senis trutru. Ol i no bihainim Jisas trutru. Ol i mekim giaman senis tasol.
Manmeri i senis trutru ol i laikim Jisas tumas.
Manmeri i senis trutru, senis bilong ol i narapela kain. Long wanem, ol i laikim Jisas tumas. Ol i tingim wok Jisas i bin mekim bilong ol na ol i amamas long Jisas na ol i laik bihainim Jisas na wokabaut olsem Jisas yet. Wankain olsem liklik pikinini i amamas long papa bilong em na em i laik bihainim papa na mekim wankain pasin olsem papa, orait ol lain bilong Jisas i laik bihainim Jisas na mekim wankain pasin olsem Jisas.
Sapos yumi tingim olsem, Jisas Em i nambawan stret na i winim olgeta narapela samting, orait bai yumi amamas long bihainim Jisas na bihainim pasin bilong Jisas. Na dispela i minim olsem, yumi bai senis, na yumi lusim selfis pasin bilong yumi na yumi tingim ol narapela manmeri. Selfis pasin em i pasin bilong dispela graun, na bai yumi lusim na yumi bihainim narapela kain pasin olgeta. Bai yumi bihainim pasin bilong Jisas.
Sapos yu wokim disisen bilong yu na yu laik tanim bel na bilipim na trastim na bihainim Jisas, orait yu wokim disisen bilong wokabaut long nupela kain laip. Sapos yu les long wokabaut long nupela kain laip, orait yu mas skelim bel bilong yu na tingim, “Mi tanim bel trutru o mi giaman tasol?”
Yumi wanwan yumi mas wokim disisen bilong yumi.
Ol pren bilong mi, plis mi laik yupela skelim gut na yupela wokim disisen bilong yupela. Yu ken i givim baksait long Jisas na yu i stap olsem bipo yu i stap, o yu ken i lusim rot bilong yu yet (tanim bel) na yu kam pas long Jisas, na yu bilipim na trastim feitful wok bilong Jisas long diwai kros, na yu bihainim Jisas long laip bilong yu. Na i no gat narapela disisen yu ken i wokim.
Mi yet mi wokim disisen bilong mi pinis. Bai mi bihainim Jisas na bihainim nupela wokabaut bilong Jisas. Planti taim bai mi feil na pundaun, tasol mi bai bihainim Jisas i go yet. Na yu? Bai yu wokim wanem disisen bilong yu?
Em tasol.
