Sios i stap bilong apim nem bilong God i bikpela na gutpela tumas.
Yumi save pinis, dispela graun i no gutpela tumas. Long planti hap bilong dispela graun i gat planti korapsen i stap, na gutpela wok bilong memba i no kamap tumas, na ol gutpela sevis i no kamap bilong helpim ol manmeri. Na long ples bilong yumi tu, i gat planti pasin nogut i stap, na dispela pasin nogut i save spoilim sindaun bilong yumi.
Yumi bin skelim Efesus 1:9-10 na long dispela hap God i bin tokaut olsem, “Bai Mi rausim ol dispela samting na bai Mi kamapim wanpela nupela samting.” Yu save, God i gat plen bilong Em i stap, na as bilong plen bilong God i olsem, “Olgeta samting long heven na long dispela graun bai kamap wanpela samting na i stap aninit long wanpela hetman tasol. Na dispela hetman Em i Jisas Krais.” (Efesus 1:9-10)
God bai bungim olgeta samting bilong heven wantaim ol samting bilong dispela graun na Em bai kamapim wanpela nupela samting. Em bai kamapim wanpela nupela komyuniti we olgeta manmeri bilong dispela nupela komyuniti wantaim olgeta samting bai i stap aninit long wanpela gutpela hetman, Jisas Krais.
Bihain, long wanpela gutpela taim God i makim pinis, ol samting bilong dispela graun nau yumi stap long em bai pinis wantaim ol kainkain komyuniti bilong dispela graun. Olgeta bai pinis na wanpela nupela samting bai kamap. Na long dispela nupela samting wanpela nupela komyuniti bai i stap, na olgeta manmeri long dispela nupela komyuniti wantaim olgeta samting bai i stap aninit tru long Jisas Krais.
Na God i wok long kamapim dispela nupela komyuniti nau. Nau God i wok long kisim na pasim ol kainkain manmeri long wanpela nupela samting, long wanpela nupela komyuniti we ol i stap aninit tru long Krais. Bihain long wanpela gutpela taim God i bin makim pinis bai God i pinisim dispela wok bilong Em. Bihain Em bai kisim ol dispela nupela komyuniti Em i wok nau long kamapim na Em bai bungim ol wantaim olgeta samting bilong heven, na olgeta bai kamap wanpela, na olgeta bai i stap aninit long Krais i go i go i go olgeta.
Na nem bilong dispela nupela komyuniti God i wok long kamapim em i sios. Dispela nupela komyuniti em i sios bilong God. Dispela nupela komyuniti God i wok long kamapim nau, na bihain Em bai bungim, em i sios bilong God.
Orait, em gutpela. Tasol, husat bai i stap long dispela nupela komyuniti bilong God? Wanem manmeri i ken i stap insait long dispela nupela komyuniti bilong God? Husat em i bilong dispela nupela komyuniti bilong God? Wanem manmeri em i sios bilong God?
Nau moning mi laik tokim yupela long dispela samting. Husat em i sios bilong God?…
Sios bilong God em i ol manmeri God i bin makim na pasim long Krais.
Lukim lain 11-12. Aposel Pol i tok olsem, “God i makim mipela na pasim mipela long Krais bai mipela i stap manmeri bilong God. ” God i bin makim aposel Pol wantaim ol sampela manmeri, na Em i pasim ol long Krais. Long wanem? Em i pasim ol long Krais bai ol i stap manmeri bilong God, bai ol i stap manmeri bilong dispela nupela komyuniti bilong God, bai ol i stap sios bilong God.
God i bin makim na pikim aposel Pol wantaim ol sampela manmeri, na long dispela wei ol i kamap manmeri bilong God. Yu save, God yet i save makim na pikim husat bai kamap manmeri bilong God. God yet i save makim na pikim husat bai kamap manmeri bilong dispela nupela komyuniti bilong God. God yet i save makim na pikim husat bai stap sios bilong God.
Na long wanem taim God i makim na pikim ol dispela manmeri? Lukim lain 11 wantaim lain 4. Long lain 11, Pol i tok olsem, “Long bipo tru God i bin makim mipela inap long dispela plen bilong Em.” Nau yumi lukim lain 4. “Long bipo, taim God i no kamapim dispela graun yet, Em i bin makim yumi na pasim yumi long Krais.”
God i bin makim na pikim ol wanwan manmeri long bipo, taim dispela graun i no kamap yet – Em i bin makim na pikim ol bilong kamapim dispela nupela komyuniti we ol i stap aninit tru long Jisas. Em i makim na pikim ol bilong kamapim sios bilong God we ol i stap aninit long Pikinini bilong Em, Jisas Krais.
Sampela manmeri i tingim olsem, God i save makim na pikim ol gutpela manmeri. Ol i tingim olsem, God i save raun na lukim husat em i gutpela manmeri na Em save makim na pikim ol dispela manmeri – ol gutpela manmeri. Tasol nogat. God i no mekim olsem.
God i bin pikim ol wanwan manmeri long bipo tru, taim wanpela samting i no kamap yet, taim wanpela manmeri i no kamap yet, taim ol i no bin mekim wanpela samting yet. God i bin makim na pikim ol wanwan manmeri long bipo, taim dispela graun i no kamap yet – long dispela bipo taim God i bin makim ol wanwan manmeri – i no nau. Long bipo, taim dispela graun i no kamap yet, God i bin makim na pikim wanwan manmeri.
Na narapela samting tu – yu tingim – gutpela manmeri i stap we na God i ken i makim na pikim ol? Yu save, i no gat wanpela gutpela manmeri i stap we God i ken i makim na pikim ol. Nogat. Long bipo, taim wanpela samting i no kamap yet, God i bihainim amamas na laik bilong Em yet na Em i makim na pikim ol wanwan manmeri. Long dispela bipo taim God i bihainim amamas na laik bilong Em yet na Em i makim na pikim ol wanwan manmeri. God i makim na pikim ol long laik bilong Em yet – Em i no makim na pikim ol bikos ol i gutpela manmeri. Nogat. Em i bihainim amamas na laik bilong Em yet na Em i makim na pikim ol wanwan manmeri. (Yu ken lukim lain 5)
Na taim God i bin makim na pikim ol, Em i bin pasim ol long Krais. Na bihain Krais i bin mekim wok long diwai kros bilong mekim ol holi na i no gat asua long ai bilong Em. Blut bilong Jisas i bin kapsait bilong baim pe bilong sin bilong ol, na long dispela wei God Em i fogivim ol long sin bilong ol. Na God Em i adoptim ol na mekim ol i kamap pikinini bilong Em yet. Na wantaim ol dispela samting God i bin givim trupela save na tingting bilong Em yet long ol – Em i givim bilip long ol – na long dispela as ol i bin tanim bel na bilipim na trastim na lavim na bihainim na i stap aninit tru long Jisas.
God i bin mekim ol dispela samting bilong kamapim dispela nupela komyuniti bilong Em we olgeta bai i stap aninit tru long Jisas. God i bin mekim ol dispela samting bilong kamapim sios bilong Em. Ol dispela manmeri God i bin makim na pasim long Krais ol i trupela sios bilong God.
Sampela man i tingim olsem ol yet i ken i kamapim sios. Sampela i tingim olsem, taim ol i wokim haus lotu na ol i grisim ol manmeri i kam bung, em nau, ol i kamapim sios. Tasol sios bilong God i no inap kamap long dispela wei. Nogat tru. God yet i save kamapim sios. Ol dispela manmeri God i bin makim na pikim long bipo na nau ol i tanim bel na bilipim na trastim feitful wok bilong Jisas na ol i lavim Em na i stap aninit long Em, ol dispela manmeri ol i sios bilong God.
Wanpela man i no inap kamapim sios bilong God. Nogat tru. God yet i save kamapim. Wok bilong kamapim sios Em i wok bilong God tasol bikos God tasol i bin makim na pikim ol na God tasol i ken i givim bilip long ol.
Na sapos yu bin tanim bel na yu bilipim na trastim na lavim na i stap aninit tru long Jisas, orait yu ken i klia olsem, God i bin makim na pikim yu na Em i bin givim bilip long yu. Na yu ken i klia olsem yu bilong dispela nupela komyuniti bilong God.
Orait, nau yumi tingim dispela, Long wanem as God i kamapim dispela nupela komyuniti? Long wanem as God i kamapim sios? Long wanem as God i bin makim na pikim yumi na kisim yumi i kam insait long dispela nupela komyuniti bilong Em?
Lukim lain 12.
God i kisim yumi i kam insait long nupela komyuniti bai yumi i stap bilong apim nem bilong God i bikpela na gutpela tumas.
Long Efesus 1:7-8 yumi bin stori long grasia bilong God. Na grasia bilong God em i pasin we God i mekim gutpela pasin long yumi i bin mekim pasin nogut long Em.
Yu save long pasin bilong ol manmeri bilong dispela graun. Ol i ken i mekim gutpela pasin long ol manmeri i mekim gutpela pasin long ol. Tasol, God i save mekim gutpela pasin long yumi i bin mekim pasin nogut long Em.
Yumi bin sakim tok bilong Em. Yumi bin givim baksait long Em. Yumi bin daunim nem bilong Em. Yumi bin egensim Em. Yumi bin les long bihainim Em. Tasol God i mekim gutpela pasin long yumi. Em i bin makim yumi na pasim yumi long Krais. Na Krais i mekim wok bilong mekim yumi holi na i no gat asua long ai bilong God. God Em i fogivim yumi na Em i adoptim yumi na Em i givim bilip long yumi. Ol dispela i soim yumi grasia bilong God. God i mekim gutpela pasin tru long yumi i bin mekim pasin nogut tru long Em. Em i bin lavim yumi i no bin lavim Em. Ol dispela em i grasia bilong God.
Na yumi i save long grasia bilong God, yumi save tingim olsem, God Em i wanpela bikpela na gutpela God tumas. Bipo, yumi no save tumas long God na long olgeta samting Em i mekim long yumi. Tasol nau yumi klia liklik na yumi tanim het na yumi tingim olsem, God Em i wanpela bikpela na gutpela God tumas.
Em nau. God i bin kisim yumi i kam insait long nupela komyuniti bilong Em bilong dispela samting tasol. Em i bin kisim yumi i kam bilong apim nem bilong Em.
God i bin mekim ol dispela wok bilong makim na pikim yumi na pasim yumi long Krais bai yumi ken i save long God na bai yumi amamas long Em na tok tenkyu long Em na litimapim nem bilong Em na lotu long Em. God i kamapim sios bilong Em bai ol manmeri bilong dispela nupela komyuniti i ken i tokaut long olgeta gutpela gutpela pasin bilong God long wok bilong Jisas na litimapim nem bilong Em.
Olgeta wok bilong kamapim sios em i wok bilong God “long stat tu pinis”. Em i bin makim na pikim ol na sevim ol na pasim ol long nupela komyuniti bilong Em. Em yet Em i mekim olgeta wok bilong kamapim nupela komyuniti bilong Em. Em i mekim olsem bai ol i no inap apim ol yet long wanpela liklik samting. Nogat. Ol bai litimapim nem bilong God tasol long olgeta samting bikos God yet i bin mekim olgeta wok.
Sios bilong God i stap bilong apim nem bilong God tasol. Olgeta samting God i wokim na God i mekim em bilong yumi ken i save long Em na bai yumi apim nem bilong Em i bikpela na gutpela tumas.
Olsem na, yu tingim. Sios bilong God i no stap bilong kamapim haus sik. Sios bilong God i no stap bilong kamapim skul. Sios bilong God i no stap bilong kamapim ol sampela program long ples. Sios bilong God i no stap bilong kamapim bikpela hauslotu. God i no kamapim nupela komyuniti bilong Em bilong mekim ol dispela samting. Nogat tru!
Sios bilong God i stap bilong apim nem bilong God tasol. Olgeta samting God i wokim na God i mekim em bilong yumi ken i save long Em na bai yumi apim nem bilong Em i bikpela na gutpela tumas.
Long 1 Timoti 3:15 aposel Pol i bin mekim wanpela toktok. Em i tok, “Hauslain bilong God em i sios bilong dispela trupela God i gat laip. Na sios bilong God em i olsem strongpela graun na strongpela pos bilong holim trupela tok.”
Na yu tingim. Long wanem as Pol i mekim dispela toktok? Pol i mekim dispela toktok bikos long trupela tok bilong God tasol bai yumi save tru long olgeta samting God i bin mekim long Krais na bai yumi amamas long God na lavim Em na bihainim Em na litimapim nem bilong Em.
Ol sampela lotu i bin lusim trupela gutnius pinis na ol i bihainim tok i no tru. Olsem na, ol i no save long wanem samting God i bin mekim long dai bilong Jisas, na ol i no save long wanem as sios i stap. Ol i bin dropim trupela tok bilong God na ol i bihainim tok ol yet i kamapim. Ol i bihainim giaman tok tasol. Ol i lusim trupela tok bilong God na long dispela as ol i no save long olgeta wok God i bin mekim long dai bilong Jisas, na ol i no save litimapim nem bilong God. Nogat. Ol i save litimapim nem bilong ol yet na ol i save litimapim nem bilong lotu bilong ol tasol.
Na sapos yumi tu yumi lusim trupela tok bilong God, o yumi larim ol lotu pasin i karamapim trupela tok bilong God, orait bai yumi stap olsem ol. Manmeri i lusim trupela tok bilong God ol i no inap save tru long God, na long dispela as ol i no inap litimapim nem bilong God. Nogat. Bai ol i litimapim nem bilong ol yet tasol.
God i bin givim trupela save na tingting bilong Em yet long yumi, bai yumi save tru long Em na bai yumi lavim Em na amamas long Em na litimapim nem bilong Em tasol. Olsem na, yumi mas strong long holim dispela trupela save na tingting bilong Em. Yumi mas strong long holim trupela tok bilong God. Sios bilong God i mas strong long holim trupela tok bilong God. Na sios bilong God i mas strong bilong autim trupela tok bilong God, bai God tasol i kisim amamas bilong yumi na Em i kisim tok tenkyu bilong yumi, na bai God tasol i kisim biknem.
Long Papua Niu Gini, planti misin i save resis. Ol i save tok olsem, “Mipela trupela sios tasol.” Na narapela bai tok olsem, “Nogat, mipela trupela sios.” Yu save, ol i resis na planti manmeri long ples i save paul.
Tasol yumi no inap paul bikos yumi save olsem, trupela sios bilong God bai apim nem bilong God tasol. Ol trupela sios bai tokaut long olgeta samting God i bin mekim long dai bilong Jisas na ol bai apim nem bilong God long ol dispela samting. Ol bai tok olsem, “Long wok bilong Jisas Krais tasol God i bin kisim bek mipela. Mipela no mekim wanpela samting na God i kisim bek mipela, nogat. God tasol i mekim olgeta wok bilong kisim bek mipela. Em i wok bilong God ‘long stat tu pinis’.”
Tasol, giaman sios bai tok olsem, “Mipela gutpela manmeri na mipela save harim lotu, na bihain Jisas i ken i lukim mipela na amamas long pasin bilong mipela na kisim bek mipela.” Yu save, long dispela toktok ol i apim ol yet long ai bilong God. Na sapos ol apim ol yet, em nau, ol i daunim nem bilong God tasol. Ol i daunim gutpela grasia bilong God. Olsem na, dispela tok bilong ol i soimaut olsem, ol i no trupela sios bilong God.
Na narapela samting tu. Ol trupela sios bilong God i save stap aninit tru long Jisas. Ol i save harim na bihainim olgeta tok bilong Jisas. Na ol i amamas long i stap aninit long Jisas bikos dispela pasin i save givim biknem long God. Taim ol i stap aninit tru long Jisas, dispela i soim olsem ol i tingim God Em i wanpela bikpela na gutpela God tumas na ol i amamas long i stap aninit long Em. Pasin yumi mekim i soim olsem, God i bikpela na gutpela tumas long yumi, na dispela i save givim biknem long God.
Las toktok.
God i bin makim na pikim na pasim yumi long Krais, na Krais i bin mekim wok long diwai kros bilong mekim yumi holi na i no gat asua long ai bilong Em. Na God Em i adoptim yumi na mekim yumi femili bilong Em. Na Em i givim trupela save na tingting bilong Em yet long yumi. God yet i mekim ol dispela samting bilong kamapim nupela komyuniti bilong Em, bilong kamapim sios bilong Em. Na Em i mekim ol dispela samting bilong yumi ken i stap bilong apim nem bilong God.
Sios God i wok long kamapim i stap bilong litimapim nem bilong God. Olsem na, yumi mas holim strong trupela gutnius bilong God na yumi mas tokaut long olgeta samting dispela bikpela na gutpela God bilong yumi i bin mekim long dispela Man Em i lavim tumas, Jisas Krais. Na long dispela wei nem bilong dispela bikpela na gutpela God bai kamap bikpela insait long PNG.
Em tasol.
