Efesus
Yumi stap laip wantaim Krais.
2
1Bipo, yupela i stap insait tru long ol kainkain rong na sin, na spirit bilong yupela i no gat laip. 2Nau yupela no stap olsem, tasol long bipo yupela bihainim olgeta pasin bilong dispela graun na yupela bihainim hetman bilong ol spirit bilong pasin nogut, na em i dispela spirit i wok yet insait long ol manmeri i save sakim tok bilong God. 3Bipo, yumi olgeta i stap olsem ol dispela kain manmeri na yumi amamas long bihainim sin bilong olpela bel bilong yumi na yumi bihainim laik nogut na tingting nogut bilong olpela bel. Olsem na, wankain ol narapela manmeri yumi tu yumi bin i stap aninit long bel hat bilong God. 4-5Tasol, taim yumi stap yet insait long ol kainkain rong na sin, na spirit bilong yumi i no gat laip, orait God Em i kamapim laip long yumi na nau yumi stap laip wantaim Krais. Na God i mekim olsem bikos God Em i God bilong marimari na bikos God i lavim yumi. Yes, God i mekim grasia na Em i sevim yumi. 6God i bin pasim yumi long Krais Jisas, na long dispela as God i kirapim yumi wantaim Krais na Em i sindaunim yumi wantaim Krais long heven. 7Na God i bin mekim ol dispela samting bilong soim olgeta jeneresen olsem, grasia bilong Em i bikpela na gutpela moa moa yet. Na dispela grasia i kamap ples klia taim God i mekim gutpela pasin long yumi long wok bilong Krais Jisas. 8God i mekim grasia na Em i sevim yumi long rot bilong bilip. Yumi yet yumi no kamapim bilip bilong yumi. Nogat. God i bin givim bilip long yumi. 9Na yumi no mekim wok na God i givim bilip long yumi. Nogat. Olsem na, yumi no ken i litimapim nem bilong yumi yet. 10God i mekim yumi kamap nupela manmeri long wok bilong Krais Jisas. Em i mekim olsem bilong yumi ken i mekim ol kainkain gutpela wok God i bin redim long bipo bilong yumi ken i mekim.
Tupela lain manmeri i kamap wanpela.
11Olsem na, yupela manmeri i bon long sait bilong ol Jentail na ol lain i katim skin i save kolim yupela “manmeri i no katim skin” – yu save, katim skin em i samting ol man i mekim long bodi – orait yupela holim tingting. 12Yupela holim tingting olsem, taim yupela no bilip, yupela i stap separet long Krais, na yupela stap autsait long kingdom bilong ol Israel na autsait long ol promis bilong kontrak, na yupela no gat wanpela gutpela samting yupela wetim na i laik kamap bihain, na God i no stap wantaim yupela. 13Bipo yupela i stap longwe tru. Tasol nau, long wok bilong Krais yupela i stap klostu. Blut bilong Krais i bin bringim yupela i kam long God.
14Krais yet Em i pis bilong yumi. Em i kamapim pis namel long dispela tupela lain, ol Juda na ol Jentail, na Em i mekim tupela i kamap wanpela. Pasin birua i olsem banis i separetim tupela, tasol Krais i brukim na pinisim dispela banis. 15Long bodi bilong Em yet Krais i pinisim lo bilong Moses. Em i pinisim ol lo wantaim ol toktok bilong ol wan wan lo. Long dispela wei Em i brukim na pinisim dispela banis i separetim tupela. Krais i mekim olsem bilong bungim tupela na kamapim wanpela nupela lain manmeri i pas long Em yet. Long dispela wei Krais i kamapim pis namel long ol. 16Krais Em i bungim tupela na kamapim wanpela na dispela wanpela lain Krais i bringim ol i kam bek long God. Long wok bilong Krais long diwai kros Em i bringim ol i kam bek long God na Em i kilim i dai pasin birua bilong dispela tupela lain manmeri. 17Krais i bin kam na Em i autim tok bilong dispela pis long yupela i bin i stap longwe, na Em i autim tok bilong dispela pis long ol lain i stap klostu. 18Long wanem, yumi tupela lain manmeri yumi kam long Papa long wanpela rot tasol, na dispela rot em i wok bilong Krais. Na wanpela Holi Spirit tasol i pulim yumi i kam.
19Em olsem na nau yupela no manmeri bilong narapela lain na narapela ples. Nogat. Nau yupela sitisen tru wantaim ol manmeri bilong God na yupela memba bilong hauslain bilong God. 20Hauslain bilong God i olsem wanpela haus na dispela haus i stap antap long as ston, na dispela as ston em i ol aposel na ol profet. Na Krais Jisas yet em i nambawan ston stret long dispela haus. 21Long strong bilong Krais Jisas olgeta ston bilong dispela haus i pas gut na i stap. Dispela haus i kamap na em i stap olsem holi tempel bikos dispela haus em i haus bilong BIKPELA. 22Yupela bilong BIKPELA nau, na long dispela as God i yusim yupela tu na Em i wokim dispela haus. God i yusim yupela na Em i kamapim haus, na long Holi Spirit God i stap insait long dispela haus.
