Efesus
Gutnius i kamap ples klia.
3
1Mi Pol, mi kalabusman bilong Krais Jisas. Mi bin mekim wok namel long yupela ol lain Jentail na long dispela as mi stap nau long kalabus.
2Ating yupela harim pinis olsem, God i bin makim mi na Em i givim wok long mi long karim grasia bilong Em i go long yupela. 3Mi tok nau long tok hait God i bin soim mi. Long dispela tok mi raitim liklik hap pinis long yupela. 4Taim yupela ritim dispela tok yupela bai klia olsem God i givim gutpela save long mi long dispela tok hait bilong Krais. 5God i no putim dispela tok hait long ples klia long ol narapela jeneresen. Nau tasol Holi Spirit i putim dispela tok hait long ples klia long ol holi aposel na profet bilong God. 6Na dispela tok hait i olsem, olgeta samting God i promisim ol lain Israel ol lain Jentail tu bai kisim. Tupela i stap long wanpela bodi tasol na tupela wantaim bai kisim olgeta samting God i bin promisim long wok bilong Krais. Na ol dispela samting i kamap long rot bilong gutnius.
7God i bin mekim mi kamap wokman bilong autim dispela gutnius. Em i bin mekim strongpela wok na mekim grasia long mi na Em givim dispela wok long mi. 8Namel long ol manmeri bilong God mi yet mi man nating tumas. Tasol God i mekim grasia long mi na Em i givim dispela wok long mi. Na dispela wok i olsem, mi mas karim gutnius i go long ol lain Jentail. Mi mas tokim ol long olgeta gutpela samting Krais i bin mekim. 9Mi mas mekim plen bilong dispela tok hait i kamap klia olgeta long olgeta manmeri. God i wokim olgeta samting, na Em i holim dispela tok hait long tingting bilong Em i kam i kam inap long nau. 10God i mekim olsem bilong ol samting bilong heven i ken i lukim wok Em i mekim long sios na ol i ken i klia olsem, save bilong Em i moa moa yet. 11Ol dispela samting em i plen bilong God bilong oltaim oltaim, na long wok bilong Krais Jisas, BIKPELA bilong yumi, God i kamapim pinis plen bilong Em. 12Yumi ken i kam bek long God na yumi no inap sem o pret bikos Krais i bin feitful long mekim wok. 13Olsem na, mi laik tokim yupela olsem, yupela no ken i pilim hevi long dispela pen mi karim bilong helpim yupela. Nogat. Dispela pen mi karim em i gutpela samting tru bilong yupela.
Pol i prea long ol i ken i stap strong.
14Long dispela as mi save brukim skru long Papa. 15Long Em, olgeta papa bilong olgeta femili long heven na long graun i bin kisim nem. 16God Em i pulap tru long olgeta bikpela na gutpela samting na mi prea olsem God bai yusim ol dispela samting bilong Em bilong strongim yupela long strong bilong Holi Spirit insait long bel bilong yupela 17bai Krais i ken i stap insait long yupela long rot bilong bilip. Mi prea long yupela i bin kamap insait long trupela lavim, 18bai yupela i gat strong inap long kisim save, wantaim olgeta lain bilong God, long lavim bilong Krais. Dispela lavim bilong Krais em i bikpela tumas na em i antap tru na em i go daun moa. 19Na dispela lavim bilong Krais i winim save bilong yumi, tasol mi prea long yupela bai yupela i ken i save gut tru long dispela lavim. Na mi prea long yupela bai yupela i ken i pulap olgeta long olgeta samting bilong God.
20God i gat strong na dispela strong i save wok insait long yumi. Na maski wanem samting yumi tingim na yumi askim God, God Em inap wokim na Em inap tru long wokim moa moa yet. 21Long dispela God yumi mas givim biknem. God i mas kisim biknem long Krais Jisas na long sios i go i go long olgeta jeneresen oltaim oltaim. Tru tumas.
