Filemon
1Mi Pol mi raitim dispela pas, wantaim Timoti, brata bilong yumi. Mi kalabusman bilong Krais Jisas.
Mipela salim dispela pas i go long yu Filemon. Yu wokman wantaim mipela na mipela lavim yu. 2Na mipela salim dispela pas tu long Apia, susa bilong mipela, na long Arkipus, em i soldia wantaim mipela, na long sios i save bung long haus bilong yu.
3God, Papa bilong yumi, wantaim BIKPELA Krais Jisas, i ken i mekim grasia long yupela na mekim bel isi long yupela.
Bilip na lavim bilong Filemon.
4Taim mi holim tingting long yu long prea bilong mi, olgeta taim mi save givim tenkyu long God long yu. 5Long wanem, mi save harim stori bilong lavim bilong yu na mi harim stori bilong feitful pasin bilong yu long Bikpela Jisas na long olgeta manmeri i bilip. 6Na mi prea olsem, pasin bilong bilip bilong yu bilong serim olgeta samting bai kamapim gutpela save long yu long olgeta gutpela samting i stap bilong yumi i pas long Krais. 7Brata bilong mi, lavim bilong yu i bin givim bikpela amamas na bel isi long mi. Long wanem, long pasin bilong yu, ol manmeri i bilip ol i bin kisim bel isi na i stap gut.
Pol i askim Filemon long kisim Onesimus.
8Em olsem na i gat wanpela samting mi laik yu mas mekim. Mi gat namba na mi inap tok strong long yu long nem bilong Krais na yu mekim. 9Tasol mobeta, long pasin bilong lavim, mi askim yu isi tasol na yu mekim. Mi Pol mi lapun pinis na nau mi i stap kalabusman bilong Krais Jisas. 10Na mi askim yu long yu givim mi pikinini bilong mi, Onesimus. Mi bin kamap papa bilong em long kalabus. 11Bipo em i no mekim gutpela wok bilong yu, tasol nau em bai mekim gutpela wok tru bilong yu na mi wantaim. 12Mi salim em i go bek long yu, na bel bilong mi go wantaim em. 13Mi gat bikpela laik long pasim em i stap wantaim mi, bai em i ken i kisim ples bilong yu na helpim mi hia long dispela ples we ol i kalabusim mi bikos mi bihainim gutnius. 14Tasol nogut mi pasim em i stap na mi no askim yu pastaim. Long wanem, mi no laik fosim yu long mekim gutpela pasin. Nogat. Mi laik yu mekim disisen bilong yu yet na yu mekim gutpela pasin. 15Onesimus i bin lusim yu liklik taim, tasol ating dispela samting i kamap bilong yu ken i kisim bek em na i stap wantaim yu oltaim oltaim. 16Nau em i no slev tasol. Nogat. Em i slev bilong yu, tasol nau tu em i wanpela brata yumi lavim tumas. Tru mi lavim em, tasol ating yu bai lavim em moa. Long wanem, em i bilong yu na em i bilong BIKPELA tu.
17Em olsem na sapos yu tingim olsem mi wanwok bilong yu, orait mi laik yu welkamim Onesimus olsem yu welkamim mi. 18Na sapos em i bin mekim rong long yu o em i gat dinau long yu, orait mi laik yu putim ol dispela samting long nem bilong mi. 19Mi Pol mi raitim dispela pas long han bilong mi yet, na tru tumas mi bai stretim yu. Tasol yu mas holim tingting, yu gat dinau long mi. Long wanem, mi bin sevim laip bilong yu. 20Yes brata, nau yu bilong BIKPELA na mi laik kisim sampela bekim long yu. Olsem na, gutpela pasin bilong yu long nem bilong Krais i ken i mekim mi bel isi na i stap gut.
21Mi raitim dispela pas na mi save olsem yu bai bihainim tok bilong mi. Na mi save olsem gutpela pasin bilong yu bai abrusim mak bilong askim bilong mi. 22Mi laik yu redim wanpela rum bilong mi. Long wanem, mi laik kam long yupela, na long prea bilong yupela God i ken i amamas long givim mi long yupela.
Las toktok.
23Epafras, em i kalabus wantaim mi long nem bilong Krais Jisas, na em i tok olsem, mi no lusim tingting long yupela. 24Na Mak na Aristarkus na Demas na Luk, em ol wanwok bilong mi, ol tu i tok olsem, mipela no lusim tingting long yupela.
25Grasia bilong BIKPELA Jisas Krais i ken i stap wantaim spirit bilong yupela.
