Galesia
Pas Pol i raitim bilong ol sios long Provins Galesia.
1
1Mi Pol, mi wanpela aposel. Wanpela man i no makim mi bilong mekim wok aposel, na wanpela man i no givim wok aposel long mi. Nogat. Jisas Krais wantaim God, Papa, i kirapim Jisas long matmat, i mekim mi kamap aposel. 2Mi wantaim ol brata i stap wantaim mi i salim dispela pas.
Mipela salim dispela pas long yupela ol sios i stap long Galesia.
3Mipela laik grasia na pis bilong God, Papa bilong yumi, na BIKPELA Jisas Krais, i stap wantaim yupela. 4Long laik bilong God na Papa bilong yumi, Krais i givim Em yet bilong kisim pe bilong sin bilong yumi. Em i mekim olsem bilong sevim yumi long ol pasin nogut nau i stap long graun. 5Bilong Em biknem i stap oltaim oltaim. Tru tumas.
Wanpela gutnius tasol i stap.
6Bel bilong mi i kirap nogut tru, long wanem, kwiktaim tumas yupela i lusim God, Em dispela God i bin singautim yupela long kam pas long grasia bilong Krais, na yupela i bihainim narapela gutnius. 7Tok yupela i bihainim i no gutnius. I luk olsem ol sampela manmeri i konfiusim yupela na ol i senisim nabaut gutnius bilong Krais. 8Tasol, sapos wanpela bilong mipela, o wanpela ensel bilong heven, i autim gutnius na dispela gutnius i no olsem gutnius mipela i autim pinis long yupela, orait em i ken i lus long hel. 9Bipo mipela i bin tokim yupela, na mi tok gen, sapos wanpela man i autim gutnius na dispela gutnius i no olsem gutnius yupela i kisim pinis, orait em i ken i lus long hel.
10Na mi mekim dispela toktok bai ol manmeri i ken i bel gut long mi, a? O mi mekim dispela toktok bai ol i ken i amamasim mi, a? Sapos mi mekim olsem, orait mi no wokman bilong Krais.
God i makim Pol.
11Mi laik yupela ol brata i mas save olsem, gutnius mi bin autim long yupela i no samting wanpela man i bin kamapim. 12Mi no kisim dispela gutnius long wanpela man, na wanpela man i no bin skulim mi long em. Nogat. Gutnius mi autim Jisas Krais yet i bin soim mi.
13Yupela i harim stori pinis long bipo pasin bilong mi taim mi pas yet long bilip bilong ol Juda. Long dispela taim mi strong olgeta long mekim nogut long sios bilong God na mi wok long distroim sios. 14Na mi bin gohet olgeta long olgeta samting bilong bilip bilong ol Juda, na mi strong moa yet long holim na bihainim olgeta tisim ol bipo papa bilong Juda i bin holim na bihainim. Em olsem na mi winim ol planti poroman bilong mi long ol dispela samting. 15-16Tasol, God i bin makim mi pinis taim mama i bin karim mi, na Em i bin mekim grasia long mi na singautim mi. Na taim God Em i amamas long soim Pikinini bilong Em long mi, bai mi autim tok bilong Em long ol Jentail manmeri, long dispela taim mi no bin toktok wantaim ol sampela manmeri. 17Na mi no go long Jerusalem na toktok wantaim ol aposel i bin kamap aposel paslain long mi. Nogat. Mi go hariap tasol long Arebia na bihain long dispela mi go bek gen long Damaskus.
18Bihain long 3-pela yia mi bin i go long Jerusalem bilong toktok wantaim Pita, na mi stap wantaim em long 15-pela de tasol. 19Mi no lukim ol narapela aposel, Jems tasol, brata bilong BIKPELA, mi bin lukim. 20Tru, long ai bilong God, mi no giamanim yupela. 21Na bihain gen mi bin i go long provins bilong Siria na Silisia. 22Olsem na, ol sios bilong Krais long provins bilong Judia ol i no save tru long mi. Nogat. 23Ol i harim stori tasol long mi. Ol i harim stori olsem: “Manya i bin wok long bagarapim mipela nau em i wok long autim dispela trupela bilip pastaim em i laik distroim.” 24Na long dispela samting i bin kamap long mi ol i bin litimapim nem bilong God.
