Galesia

Bilip o pasin bilong bihainim lo em i wei bilong God?

3

¹Yupela ol Galesia, yupela longlong ya! Husat i bin paulim yupela? Long ai bilong yupela yet mipela i bin tokaut klia long as bilong dai bilong Jisas Krais long diwai kros. ²Mi laik yupela tokim mi long wanpela samting: Yupela i kisim Holi Spirit taim yupela i bihainim lo o yupela kisim Holi Spirit taim yupela i harim na bilipim na trastim tok mipela i tokim yupela, a? ³Yupela no gat het, a? Pastaim yupela i kisim nupela laip long strong bilong Holi Spirit, tasol nau yupela laik i stap long nupela laip long strong bilong yupela yet, a? ⁴Na ol samting yupela i bin lukim, yupela i lukim nating tasol, a? Yupela i lukim nating o nogat, ating i gat kwesten mak yet i stap long yupela. ⁵God i bin givim Holi Spirit long yupela na mekim ol mirakel namel long yupela bikos yupela i bihainim lo o bikos yupela i harim na bilipim na trastim tok mipela i bin tokim yupela, a?

⁶Tingting long Abraham: “Abraham i bilipim God na God i givim nating na givim stretpela pasin long Abraham.” (Jenesis 15:6) ⁷Olsem na, yupela mas klia long dispela, ol manmeri i bilip ol i pikinini bilong Abraham. ⁸Buk bilong God i bin mekim klia olsem, ol Jentail manmeri i bilip God bai givim stretpela pasin long ol na kolim ol stretpela manmeri. God i bin tokaut long dispela gutnius taim Em i mekim tok long Abraham olsem, “Long rot bilong yu, bai Mi blesim ol kainkain lain manmeri i stap long dispela graun.” (Jenesis 12:3) ⁹Olsem na, ol manmeri i bilip ol i kisim blesim bilong God wantaim Abraham, dispela man bilong bilip.

Manmeri i stretpela long rot bilong bilipim God bai i stap laip.

¹⁰Ol manmeri i tingim pasin bilong bihainim lo i ken i mekim ol i stap stretpela man long ai bilong God ol i stap aninit long bel hat bilong God. Long wanem, Buk bilong God i mekim tok olsem, “Manmeri i no mekim na bihainim olgeta lo bilong Buk Bilong Lo olgeta taim ol i stap aninit long bel hat bilong God.” (Lo 27:26) ¹¹Dispela samting i klia olgeta, God i no inap tru long kolim wanpela man stretpela man long pasin bilong bihainim lo. Long wanem, dispela tok i stap, “Manmeri i stretpela long rot bilong bilipim God bai i stap laip.” (Habakuk 2:4) ¹²Na pasin bilong bihainim lo em i no samting bilong bilip. Long wanem, dispela tok i stap, “Man i bihainim ol dispela samting bai i stap laip long dispela samting.” (Wok Pris 18:5) ¹³Lo i tok, “Manmeri i no mekim na bihainim olgeta lo olgeta taim ol i stap aninit long bel hat bilong God.” Tasol Krais i baim bek yumi; Krais yet i kisim bel hat bilong God, bai dispela strongpela toktok bilong lo i no inap holim yumi moa. Buk bilong God i tok olsem, “Man i hangamap long diwai em i kisim bel hat bilong God.” (Lo 21:23) ¹⁴Krais i baim bek yumi, bai ol lain Jentail, long wok bilong Jisas Krais, ol i ken i kisim blesim olsem Abraham i bin kisim, na mipela i ken i kisim Holi Spirit God i bin promisim long rot bilong bilip.

Lo i no winim Promis bilong God.

¹⁵Ol brata, mi laik givim wanpela eksempel long yupela: Long ol kontrak bilong dispela graun, taim ol i sainim pinis, orait i no gat wanpela man i ken i rausim kontrak o skruim wanpela toktok moa long dispela kontrak. Nogat tru. ¹⁶Orait, God i bin givim ol promis long Abraham na long pikinini bilong em. Na Buk bilong God i no tok olsem “long ol pikinini” na i minim ol planti pikinini. Nogat. Buk bilong God i tok olsem “long pikinini” na i minim wanpela pikinini tasol. Na dispela pikinini em i Krais. ¹⁷As bilong dispela tok na eksempel bilong mi i olsem: Pastaim God i givim promis na dispela promis i olsem kontrak God i sainim pinis. Lo i bin kamap 430 yia bihain long kontrak, na long dispela as lo i no inap rausim kontrak o rausim promis. ¹⁸Olsem na, sapos ol gutpela kaikai bilong promis i save kamap long rot bilong bihainim lo, orait em i no i stap moa samting bilong promis. Tasol God Em i mekim grasia na Em i givim ol gutpela kaikai bilong promis long Abraham long rot bilong promis.

¹⁹Orait, tasol, bilong wanem God i kamapim lo? God i kamapim lo bilong soim ol manmeri sin bilong ol i bikpela tumas. Na God i larim lo i stap tasol i go inap long taim Pikinini bilong promis i kam. Dispela lo bilong God i bin i kam long rot bilong ol ensel na long han bilong wanpela namel man. ²⁰Na taim yumi harim tok “namel man” yumi ken i tingim tupela sait i stap. Tasol, God yet Em i wanpela.

²¹Orait, lo em i birua bilong promis bilong God, a? Nogat tru! Sapos God i bin givim wanpela lo na dispela lo inap tru long mekim yumi kamap stretpela manmeri long ai bilong God, orait lo em inap long givim laip long yumi. ²²Tasol, Buk bilong God i tokaut klia olsem, olgeta manmeri bilong dispela graun ol i stap kalabusman bilong sin, bai ol gutpela samting bilong promis i ken i kamap long feitful wok bilong Jisas Krais na ol manmeri i bilip ol i ken i kisim.

²³Bipo, taim dispela kain bilip i no kamap yet, lo i bin kalabusim yumi. Lo i lokim yumi i stap tasol i go inap long taim bilip i kamap ples klia. ²⁴Olsem na, lo em i stap olsem waspapa bilong yumi i go inap long Krais i kam, bai God i ken i kolim yumi stretpela man long rot bilong bilip. ²⁵Nau bilip i kamap pinis yumi no i stap moa aninit long dispela waspapa.

²⁶Nau, long rot bilong bilipim na trastim Krais Jisas, yupela i stap pikinini bilong God. ²⁷Long wanem, yupela i bin kisim baptais na i pas long Krais yupela i bin karamapim yupela yet long Krais. ²⁸Nau i no gat ol manmeri Juda na ol Grik i stap, na i no gat ol wokboi nating na ol fri manmeri i stap, na i no gat ol man na ol meri i stap. Long wanem, yupela olgeta i stap wanpela tasol wantaim Krais. ²⁹Sapos yupela bilong Krais, orait yupela pikinini bilong Abraham, na yupela bai i kisim ol gutpela samting wantaim Abraham olsem God i bin promisim.