Galesia
Krais i bin friim yumi.
5
1Krais i friim yumi bai yumi ken i stap fri. Olsem na, yupela mas sanap strong na yupela no ken i larim ol man i mekim yupela i kamap slev gen.
2Harim gut tok bilong mi. Mi Pol mi tokim yupela olsem, sapos yupela larim ol man i katim skin bilong yupela, orait wok bilong Krais i no inap helpim yupela liklik. 3Mi toksave gen long yupela, sapos yupela katim skin bilong yupela, orait yupela i mas bihainim olgeta lo wantaim. 4Sapos yupela i laik bihainim lo na long dispela pasin yupela i laik God i kolim yupela stretpela man, orait yupela i lusim Krais pinis. Yupela i lusim pinis grasia bilong God. 5Tasol God i givim stretpela pasin long mipela i bilip, na long strong bilong Holi Spirit mipela i wetim ol gutpela samting dispela stretpela pasin bai kamapim. 6Long Krais Jisas pasin bilong katim skin na pasin bilong larim skin em i samting nating. Tasol bilip em i samting tru, na dispela bilip i save kirapim pasin bilong lavim ol narapela manmeri.
7Pastaim yupela i ran gut. Tasol husat i distebim yupela na stopim yupela long bihainim trupela tok? 8Em i grisim yupela, tasol dispela toktok bilong em, em i no tok bilong God i singautim yupela. 9Tingim. “Liklik yis tasol i save mekim olgeta bret i solap.” 10Mi trastim strong bilong BIKPELA na mi tingim olsem yupela bai harim tok bilong mi. Na dispela man i paulim yupela, maski em i husat, em bai kisim pe nogut bilong pasin bilong em. 11Ol brata, sapos i tru mi wok yet long autim tok bilong katim skin, orait long wanem as mi save kisim hevi long han bilong ol Juda? Sapos mi autim tok bilong katim skin, orait tok bilong diwai kros i no inap mekim ol bel nogut. 12Ol dispela man i skrapim tingting bilong yupela, ating mobeta ol i gohet na katim na rausim skin wantaim olgeta wanemya bilong ol.
13Ol brata bilong mi, God i singautim yupela bilong yupela ken i stap fri. Tasol, dispela i no minim olsem yupela fri long mekim pasin nogut bilong olpela bel. Nogat. Mobeta yupela i lavim ol narapela na yupela helpim ol olsem yupela wokboi nating bilong ol. 14Olgeta toktok bilong lo i pas insait long dispela wanpela tok, “Yu mas lavim ol narapela manmeri olsem yu lavim yu yet.” (Wok Pris:19:18) 15Sapos yupela i kros kros na pait nabaut namel long yupela yet, orait yupela lukaut, nogut yupela i pundaunim yupela yet.
Wokabaut long stia bilong Holi Spirit.
16Tok bilong mi i olsem, yupela mas wokabaut long stia bilong Holi Spirit. Sapos yupela i mekim olsem, orait bel bilong yupela i no inap kirap long bihainim pasin nogut bilong olpela bel. 17Long wanem, olpela bel i laik bihainim pasin Holi Spirit i no laik bihainim, na Holi Spirit i laik bihainim pasin olpela bel i no laik bihainim. Tupela rot i no wankain, na sapos yu wokabaut long wanpela, orait yu no inap mekim pasin bilong narapela. 18Tasol sapos yu bihainim stia bilong Holi Spirit, em nau yu no aninit long lo.
19Pasin bilong olpela bel em i ples klia: ol kainkain pasin pamuk na pasin i doti na pasin bilong pilai wantaim ol man o meri; 20na pasin we ol i lotu long ol aidol na ol kainkain posin pasin; na pasin bilong hetim narapela manmeri, na pasin bilong kros pait, na pasin we ol i jelas long ol narapela manmeri, na pasin bilong belhat, na selfis pasin, na pasin bilong bel nogut, na pasin bilong pas tasol long ol wantok, 21na pasin we ol i jelas long ol samting bilong narapela manmeri; na pasin bilong spak nabaut, na pasin disko; na ol kainkain pasin olsem. Bipo mi bin givim woning long yupela na mi tok gen, husat manmeri i wokabaut long ol dispela kain pasin ol i no inap tru long lukim ol gutpela samting bilong kingdom bilong God.
22Tasol kaikai Holi Spirit i save kamapim i olsem: pasin bilong lavim tru ol narapela manmeri, na pasin bilong amamas tru long wok bilong Krais, na pasin we pis i holim tingting na wokabaut bilong yu, na pasin bilong bel isi maski wanem samting i distebim yu, na pasin bilong wanbel na helpim narapela manmeri, na pasin bilong mekim gutpela pasin long ol narapela manmeri, na pasin we ol manmeri i ken i trastim yu long olgeta samting, 23na pasin we yu no apim yu yet, na pasin we yu ken i kontrolim ol laik nogut bilong yu. I no gat wanpela lo i birua long ol dispela kain pasin. 24Ol manmeri i pas tru long Krais Jisas ol i bin nilim olpela bel wantaim ol laik na tingting nogut bilong olpela bel long diwai kros. 25Holi Spirit i bin kamapim laip long yumi, orait yumi wokabaut long stia bilong Holi Spirit. 26Em olsem na yumi no ken i bikhet, na yumi no ken i larim pasin bilong skrapim bel na jelas pasin i kamap namel long yumi.
