Galesia
Yupela karim hevi bilong ol narapela.
6
1Ol brata, sapos yupela save olsem wanpela bilong yupela i bin mekim sin, orait yupela i bihainim gut stia bilong Holi Spirit yupela ken i daunim yupela yet na stretim em. Tasol yupela mas lukaut, nogut yupela tu i pundaun long sin. 2Yupela mas karim hevi bilong ol narapela namel long yupela yet, na long dispela pasin yupela bai fulfilim lo bilong Krais. 3Sapos wanpela man i tingim em i bikpela man tumas, na em i man nating, orait em i giamanim em yet. 4Ol wan wan manmeri i mas skelim pasin bilong em yet. Long dispela wei em i ken i ai klia long pasin em yet i mekim, maski long tingim pasin bilong ol narapela manmeri. 5Long wanem, ol wan wan manmeri bai i karim hevi bilong pasin bilong em yet.
6Man o meri i kisim skul long tok bilong God em i mas serim olgeta gutpela samting bilong em long man i skulim em.
7Harim gut. Yupela no ken i giamanim bel bilong yupela yet; wanpela man i no inap trikim God. Wanem samting yu plenim long gaden, em i kaikai bilong dispela samting tasol bai i kamap. 8Olsem na, man i bihainim ol samting olpela bel bilong em i laikim, orait em bai kisim samting olpela bel i save kamapim; em bai kisim bagarap. Na man i bihainim ol samting Holi Spirit i laikim, orait em bai kisim samting Holi Spirit i save kamapim; em bai kisim laip i stap oltaim oltaim. 9Em olsem na yumi no ken i les long mekim pasin i gutpela. Sapos yumi no givap, orait long taim bilong kisim kaikai, bai yumi kisim gutpela kaikai stret. 10Olsem na, sapos sanis i kamap long yu, orait yu mekim pasin i gutpela long ol narapela manmeri. Tasol, nambawan samting, yu mekim pasin i gutpela long ol manmeri i stap long hauslain bilong bilip.
Las toktok bilong Pol.
11Lukim ol dispela bikpela rait mi raitim long yupela long han bilong mi yet.
12Ol lain i laik lukautim nem bilong ol yet, em ol dispela lain i strong long fosim yupela long katim skin. Ol i mekim olsem bikos ol i pret tumas long karim hevi bilong diwai kros bilong Krais. 13Ol dispela lain i katim skin pinis, ol yet i no save bihainim olgeta lo, tasol ol i laik yupela katim skin bai ol i ken i apim ol yet long dispela samting ol i laik mekim long yupela. 14Mi no ken i litimapim nem bilong ol narapela samting. Nogat. Bai mi litimapim nem bilong diwai kros bilong Jisas Krais tasol. Long diwai kros bilong Jisas Krais olgeta samting bilong dispela graun i pinis long mi, na mi yet mi pinis long olgeta samting bilong dispela graun. 15Nau pasin bilong katim skin na pasin bilong larim skin em i samting nating. Bikpela samting i olsem: yumi kamap nupela manmeri. 16Na ol manmeri i wokabaut long dispela lo, pis na marimari bai i stap wantaim ol, na wantaim ol lain Israel bilong God i wokabaut olsem.
17Mi no laik wanpela man i givim trabel moa long mi. Long wanem, long bodi bilong mi i gat ol planti makmak pinis bilong soim olsem mi bilong Jisas.
18Grasia bilong BIKPELA Jisas Krais i ken i stap wantaim spirit bilong yupela ol brata. Tru tumas.
