Efesus 6:10-24.
Long buk Efesus aposel Pol i tokim yumi long ol bikpela samting stret. Em i tokim yumi long olgeta blesim bilong heven. Em i tokim yumi long hau God i bin makim yumi na pasim yumi long Jisas na Jisas i kam i dai long diwai kros bilong mekim yumi stretpela na holi long ai bilong God. Long dispela rot God i kolim yumi “stretpela manmeri” na Em i kisim bek yumi na adoptim yumi na mekim yumi femili bilong Em.
Na Pol i tokim yumi long wok bilong Holi Spirit – Em i kam long yumi na Em i opim ai na ia na bel bilong yumi – Em i givim laip long yumi – na long dispela rot nupela laip i kamap long yumi – Em i tanim bel bilong yumi na yumi bilipim na trastim God long kisim bek yumi long feitful wok bilong Jisas long diwai kros.
Na long ol dispela rot na long ol dispela pasin God i pasim yumi wantaim long sios femili komyuniti bilong Em.
Na long Efesus 4:17 aposel Pol i tok long yumi olgeta manmeri bilong sios femili olsem, “Yupela no ken i wokabaut moa olsem ol haiden Jentail manmeri.” Long Efesus 4:23 em i skruim dispela tok olsem, “Nau tingting bilong yupela mas kamap nupela, na laip bilong yupela mas kamap nupela. Long wanem, God i bin mekim yupela kamap nupela lain manmeri bai yupela i stap olsem Em yet na laip bilong yupela bai i stap stretpela na holi olgeta.”
Em olsem na, yumi olgeta manmeri bilong sios femili bilong God yumi no ken i stap olsem ol haiden manmeri. Nau tingting bilong yumi olgeta i mas kamap nupela, na laip bilong yumi olgeta i mas kamap nupela. Long wanem, God i bin mekim yumi olgeta i kamap nupela lain manmeri, bai yumi olgeta i stap olsem Em yet na laip bilong yumi olgeta i stap stretpela na holi olgeta.
God i laik tingting bilong marit manmeri na tingting manmeri i no marit na tingting bilong pikinini na tingting bilong papamama na tingting bilong wokboi nating na tingting bilong bosman i kamap nupela, na olgeta ol i no ken i wokabaut moa olsem ol haiden manmeri long ples bilong ol. God i laik olgeta manmeri bilong sios femili komyuniti bilong Em i kisim nupela tingting na wokabaut long nupela tingting bilong Krais.
Satan i stap baksait long olgeta haiden pasin na ol pasin bilong ples.
Na i hatpela wok tru long yumi lusim ol haiden pasin na ol pasin bilong ples na yumi kisim na wokabaut long olgeta tingting na pasin bilong Jisas. Long wanem? Lukim Efesus 2:1-2. Satan i stap baksait long olgeta haiden pasin na ol pasin bilong ples. Ol haiden pasin na ol pasin bilong ples, ol dispela pasin em i no ol samting bilong dispela graun – em i no ol samting bilong ol manmeri bilong dispela graun. Nogat. Ol dispela samting em i samting bilong Satan wantaim ol spirit nogut bilong tudak. Na ol dispela samting i gat strong i winim strong bilong yumi manmeri bilong dispela graun. Long dispela as tasol yumi no fit na i hat tru long yumi i lusim ol haiden pasin na ol pasin bilong ples.
Long Efesus 6:10-24 God i tokim yumi sios femili komyuniti bilong God long yumi no ken i sanap long strong bilong yumi yet na yumi wok long lusim ol haiden pasin na ol pasin bilong ples na yumi kisim nupela tingting na pasin bilong Krais. Nogat. Sapos yumi sanap long strong bilong yumi yet, bai yumi pundaun tasol – bai yumi feil tasol.
Em olsem na yumi mas sanap long bikpela bikpela strong bilong God. God Em inap winim Satan wantaim ol wokboi lain bilong em – God Em inap winim ol pasin bilong Satan – pasin bilong Satan em i ol haiden pasin na ol kainkain pasin bilong ples. Yumi no inap, tasol God Em inap. Olsem na yumi mas sanap long strong bilong Em.
Em olsem na, bikpela toktok nau yumi mas kisim i olsem….
Sios femili bilong God mas sanap long bikpela bikpela strong bilong BIKPELA.
Lukim lain 10-13. Yumi no ken i sanap long strong bilong yumi yet long nupela sios femili komyuniti bilong God. Nogat. Yumi mas sanap long bikpela bikpela strong bilong BIKPELA.
Harim. Dispela samting yumi stap long em – dispela wok yumi stap long em bilong lusim ol haiden pasin na lusim ol kainkain pasin bilong ples – ol dispela samting i bikpela samting tumas. Long wanem, Satan i stap long baksait long ol dispela pasin na em i les long yumi sios femili bilong God i lusim em na i lusim pasin bilong em. Olsem na, em i wok long egensim yumi bilong holimpas yumi na yumi no ken i lusim em na lusim pasin bilong em na bihainim Jisas na bihainim pasin bilong Jisas.
Satan i gat narapela kain strong bilong em i stap na long dispela as ol strong bilong dispela graun i no inap long yumi sios femili bilong God. Nogat. Yumi nidim strong bilong God – yumi nidim bikpela bikpela strong bilong BIKPELA bilong helpim yumi sios femili i kisim nupela tingting na yumi wokabaut long nupela tingting na long nupela pasin bilong Jisas. Yumi mas yusim strong God i givim yumi – yumi mas yusim ol tuls God i givim yumi bilong yusim.
Sapos yumi wok long lusim ol samting bilong dispela graun tasol, orait yumi ken i yusim strong bilong dispela graun bilong winim ol dispela samting na yumi i stap stret long sios femili komyuniti bilong God. Tasol Satan wantaim ol “ami” bilong em i stap na em i laik holimpas yumi long ol kainkain haiden pasin bilong em long dispela graun – em i no laik yumi lusim na yumi wokabaut long pasin bilong Jisas na em no laik sios i wokabaut long pasin bilong Jisas. Nogat tru.
Satan em i wok long egensim yumi i laik bihainim Jisas. Long dispela as yumi mas yusim strong bilong BIKPELA. Pol i tok piksa long ol ami na em i tok olsem, i olsem yumi pait long ami – olsem na yumi mas putim ol klos bilong ami na yumi pait na egensim ami bilong Satan. (Lain 13.) Sapos yumi yusim ol strongpela samting bilong God long “pait” long ol ami bilong Satan, orait yumi ken i sanap strong na yumi lusim haiden pasin bilong Satan na yumi bihainim ol stretpela pasin bilong Jisas.
Orait yumi skelim ol tuls God i givim yumi bilong yumi ken i sanap long bikpela bikpela strong bilong Em.
- Lain 14…. Yumi mas pasim tok i tru tasol – trupela toktok – na dispela samting i mas raunim yumi na holimpas olgeta samting bilong yumi olsem let i save raunim na holimpas klos bilong soldia.
Giaman tok em i raunim na pasim olgeta samting bilong Satan. Tasol trupela tok – tok i tru olgeta – mas raunim na pasim olgeta samting bilong yumi. Wankain olsem let i raunim na holimpas olgeta klos bilong soldia, orait trupela tok i mas raunim na holimpas olgeta samting bilong laip bilong yumi. Sapos yumi giaman giaman olsem ol haiden manmeri, orait ol i gat rot bilong semim yumi – i olsem let bilong yumi i bruk na trausis i pundaun long ai bilong ol manmeri na yumi sem nogut tru. Em olsem na yumi mas raunim yumi long tok i tru tumas na ol birua bilong God i no gat rot bilong daunim na semim yumi.
- Lain 14…. Yumi mas putim na “werim” stretpela tingting na stretpela pasin olsem ol soldia i putim na werim siot ain bilong karamapim bros.
Sapos yumi bihainim pasin i stret na i tru, orait wanpela man i no inap bagarapim yumi taim em i sutim tok nogut long yumi bilong daunim yumi. Yu save, spia i no inap go insait long bros bilong soldia i werim siot ain, orait na wankain olsem tok bilong ol i no inap painim mak bilong em long laip bilong yumi. Long wanem, yumi wokabaut long stretpela pasin na i no gat rong na i no gat asua long yumi bai ol i daunim yumi.
- Lain 15…. Gutnius bilong God mas strongim lek bilong yumi olsem su i strongim wokabaut bilong ol soldia na wanpela samting i no inap sutim lek bilong ol na bagarapim wokabaut bilong ol.
God i kisim bek yumi long feitful wok bilong Jisas long diwai kros, na em i dispela wok bilong God i kisim wanbel i kam long yumi na i pasim yumi wantaim long sios femili komyuniti bilong God – em i dispela samting i kisim pis i kam long yumi wantaim God na long yumi wanwan insait long sios femili bilong God. Olsem na yumi sanap long dispela toktok. Olsem ol ami i sanap long strongpela su bilong ol, orait strongpela su bilong yumi em i gutnius bilong feitful wok bilong Jisas, na long dispela toktok bai yumi sanap strong tasol na wanpela samting i no inap sutim sanap bilong yumi.
- Lain 16…. Yumi mas holim strong bilip bilong yumi long feitful wok bilong Jisas – dispela i olsem plang ain ol soldia i yusim bilong stopim ol spia i flai i kam bilong kilim ol i dai.
Yu save, Satan bai sutim tok long yumi bilong bagarapim bilip bilong yumi, bai yumi lusim trupela bilip na yumi bihainim ol giaman bilip na long dispela rot em bai kilim yumi i dai na yumi lus long God.
Taim Satan i sutim tok long yumi (olsem soldia i sutim spia), orait yumi ken i stopim tok (spia) bilong em long bilip bilong yumi – yumi ken i tok “Nogat!” long toktok em i mekim na yumi tok, “God i kisim bek mi pinis long feitful wok bilong Jisas – bai mi trastim feitful wok bilong Jisas tasol na mi no inap lusim na bihainim na trastim ol narapela samting.” Long dispela rot trupela bilip long feitful wok bilong Jisas i ken i rausim tok bilong ol man i laik grisim yumi i go bek gen long ol narapela narapela kain bilip – olsem bilip long Sabat na baptais na misin wok na ol kainkain samting ol man i tok yumi mas mekim na God bai kisim bek yumi – ol dispela kain bilip em i giaman bilong Satan.
- Lain 17…. Olgeta taim yumi mas tingim wok God i bin mekim bilong sevim yumi – na dispela bai i stap olsem hat ain ol soldia i yusim bilong lukautim het bilong ol.
God i bin makim yumi na pasim yumi long Jisas, na Jisas i dai bilong mekim yumi stretpela na holi long ai bilong Em, na long dispela rot tasol God i kolim yumi “stretpela man”, na Em i kisim bek yumi na mekim yumi wanpela bilong femili bilong Em. Tingim ol dispela wok bilong God na tingim hau yumi no gat laip na yumi no save long wanpela samting long wok bilong God, tasol Holi Spirit i bin kamapim laip long yumi – Em i bin opim ai na ia na bel bilong yumi, na Em i tanim bel bilong yumi, bilong yumi bilipim na trastim na bihainim na tok tenkyu long feitful wok bilong Jisas long diwai kros bilong sevim yumi.
Em olsem na sapos yumi pasim dispela toktok long het bilong yumi, orait dispela tok bai stopim yumi long bikhet na apim yumi yet. Satan i laik sutim yumi long “het” bai yumi apim yumi yet na yumi bikhet. Em olsem na yumi mas lukaut na yumi no ken i bagarap long het bilong yumi na yumi stat na yumi apim yumi yet na yumi bikhet.
Yumi mas lukautim dispela trupela wok bilong God long laip bilong yumi – dispela i save bosim na kontrolim olgeta tingting na lavim na bilip bilong yumi, olsem na, yumi mas pasim dispela samting long het bilong yumi na bai dispela samting i lukautim yumi – bai yumi no ken i bikhet na apim yumi yet. Sapos yumi bikhet na apim yumi yet, orait Satan i bagarapim yumi na em i winim yumi.
- Lain 17… Na taim yumi laik difenim trupela tok i tokaut long feitful wok bilong Jisas long diwai kros, orait yumi holim Tok bilong God long han bilong yumi olsem ol soldia i holim sod.
Wankain ol bipo soldia i holim sod long han bilong ol bilong difenim ol, orait yumi has holim Baibel long han bilong yumi na yumi yusim Tok bilong God bilong difenim bilip bilong yumi. Tok bilong God Em i strong bilong Holi Spirit – Baibel em i sod bilong Holi Spirit.
Olsem na yumi no ken i bikmaus na toktok planti long toktok bilong yumi yet. Nogat. Yumi kisim strong bilong Holi Spirit long Tok bilong God na yumi yusim dispela samting na yumi toktok na yumi difenim rot bilong God long feitful wok bilong Jisas.
Yumi mas prea long God olgeta taim.
Lukim lain 18-20. Yumi yet yumi no gat strong bilong holim ol dispela samting Pol i stori pinis long en. Nogat. Yumi nidim God long helpim yumi. Yumi feil manmeri na yumi nidim strong bilong God na bai yumi sanap na yumi lusim pasin haiden na yumi pas wantaim long olgeta gutpela bilong God wantaim ol brata na sista bilong yumi insait long sios femili komyuniti bilong God.
Aposel Pol i mas prea tu na em i askim ol sios manmeri long taun Efesus long mekim prea long God bilong God i helpim em. Pol i no tingim olsem em i gat strong na em yet i ken i sanap strong na bihainim olgeta wei bilong Jisas. Nogat. Em i save olsem em i olsem yu na mi na em i wanpela man bilong feil feil. Em olsem na em tu em i nidim God long helpim em sanap strong na lusim ol haiden pasin na i pas wantaim olgeta pasin bilong Jisas na pas wantaim olgeta manmeri bilong Jisas long sios femili (lain 19).
Pol i gat namba – God i bin makim em bilong em i stap mausman bilong gutnius bilong feitful wok bilong Jisas (lain 20). Tasol yet Pol i nidim helpim bilong God na long dispela as em i askim ol Efesus na bai ol i prea long God bilong God i helpim em.
Yumi no winim Pol – yumi man olsem Pol na yumi no ken i sanap long strong bilong yumi yet. Nogat. Bai yumi pundaun. Yumi nidim strong bilong God na bai yumi holimpas olgeta trupela gutnius bilong feitful wok bilong Jisas na yumi lusim ol haiden pasin long laip bilong yumi na yumi wokabaut long pasin bilong Jisas, na long dispela rot bai yumi olgeta sindaun gutpela wantaim insait long sios femili bilong God.
Satan wantaim ol wokboi bilong em ol i birua long sios femili bilong God na ol i les long yumi sindaun gutpela wantaim na bihainim Jisas. Em olsem na ol i wok long pundaunim yumi. Tasol yumi no ken i larim ol i pundaunim yumi sios femili bilong God. Nogat. Yumi kisim na holim olgeta tuls God i givim yumi – yumi sios femili bilong God – na yumi yusim, na yumi prea long kisim helpim bilong God. Long dispela rot bai yumi i stap na yumi kisim na bihainim olgeta tingting na pasin bilong Jisas.
Lavim bilong BIKPELA long yumi i no save dai.
Lukim lain 21-24. BIKPELA i stap wantaim yumi ol sios femili bilong Em. Grasia na lavim bilong Em i pas long yumi na long dispela as yumi ken i stap isi. Birua bilong yumi i bikpela, tasol
BIKPELA bilong yumi i bikpela bikpela moa tumas na wanpela samting i no inap winim Em. Em olsem na yumi ken i stap isi na yumi wok wantaim bilong kisim na bihainim olgeta gutpela tingting na pasin bilong gutpela BIKPELA bilong yumi.
Em tasol.
