God Em i holi na Em i bosim stret olgeta samting.

( 2 )

Ating Habakuk i olsem yu na mi liklik, a? Habakuk em i wanpela profet stret bilong God, tasol Habakuk i no save long olgeta samting bilong God. Em i gat sampela gutpela save pinis, tasol em i no save long olgeta samting bilong God. Yumi no profet bilong God olsem Habakuk, tasol yumi save long sampela gutpela samting bilong God, tasol yumi no save long olgeta samting na yumi wok long lainim ol sampela samting moa.

Na Habakuk i no bikhet na karamapim dispela samting. Nogat. Taim yumi stadi long Buk Habakuk, orait i klia olsem Habakuk i wok yet long lainim ol samting bilong pasin na tok bilong dispela BIKPELA God bilong yumi. Em i wok yet long lainim ol samting bilong God.

• Fes komplen bilong Habakuk.

Long sapta 1:1-4 Habakuk em i no klia long pasin bilong God na em i tingim olsem God i stap nating na Em i no kea long wanem pasin ol lain Juda i save mekim. Yu save, Habakuk wantaim liklik lain manmeri ol i laik bihainim God. Tasol, planti lain manmeri bilong Juda ol i bin givim baksait long God na pasin nogut i kamap bikpela namel long ol. Em olsem na Habakuk i tingim olsem God i stap nating na Em i no kea long wanem pasin ol manmeri i save mekim.

Tasol, God i tokim Habakuk kain olsem, “Habakuk, ating yu no save long Mi. Yu tingim olsem Mi stap nating na Mi no kea long wanem pasin i kamap insait long ol lain Juda. Tasol yu rong. Opim ai bilong yu na lukluk gut. Mi bos bilong olgeta samting. Em olsem na Mi kirapim na strongim ol lain Babilon. Na Mi bai bringim ol i kam long ol lain Juda, na Mi bai yusim ol bilong mekim save long ol Juda. Habakuk, Mi no inap larim ol manmeri i givim baksait long Mi. Nogat tru. Mi no stap nating. Nogat. Mi kea. Na Mi bai mekim save long ol manmeri i bin givim baksait long Mi.”

• Sekon komplen bilong Habakuk.

Orait, nau Habakuk i klia long dispela samting. Tasol, dispela bekim bilong God i kirapim narapela tingting long Habakuk. Habakuk i paul long narapela samting nau. Em olsem na Habakuk i mekim narapela komplen long God.

Em olsem na Habakuk i gat dispela kain komplen long God…..

“God Yu stretpela stretpela God. Yu holi olgeta na Yu no laik lukim pasin nogut. Em olsem na, long wanem as Yu bai yusim ol dispela lain Babilon bilong tilim pe long sin bilong mipela ol lain Juda? Sin bilong ol dispela lain Babilon i winim sin bilong mipela moa moa moa yet. Tru, mipela Juda mipela mekim sin, tasol ol lain Babilon i mekim bikpela sin moa moa yet. Long wanem as Yu gat toktok long sin bilong mipela tasol Yu no gat toktok long sin bilong ol lain Babilon? Long wanem as Yu no inap larim ol Juda i givim baksait long Yu, tasol Yu bai larim ol lain Babilon i givim baksait long Yu?”

• God i bekim komplen bilong Habakuk.

Orait, God i bekim toktok bilong Habakuk kain olsem…..

“Mi ken i yusim ol lain nogut olsem ol lain Babilon bilong mekim save long yupela. Mi God bilong dispela graun na Mi ken i yusim eneting Mi laik yusim bilong mekim wok bilong Mi. Tasol yu no ken i tingim olsem Mi mekim pasin i no stret, na yu no ken i tingim olsem Mi bai pasim ai long sin bilong ol Babilon, na yu no ken i tingim olsem Mi yet i kamapim sin bilong ol. Nogat. Ol yet i kamapim sin bilong ol yet. Na long dispela as Mi bai mekim save long ol tu. Tasol, pastaim Mi bai bringim ol i kam long yupela ol lain Juda bilong mekim save long yupela long sin bilong yupela, na bihain Mi bai mekim save long ol lain Babilon.”

Em olsem na bekim bilong God long komplen bilong Habakuk i olsem, “Mi holi na Mi bosim stret olgeta samting.” God Em i holi na Em i bosim stret olgeta samting. Yumi no ken i tingim olsem, God i wokim rong na Em i no skelim stret olgeta samting. God i tokim Habakuk olsem, Mi holi na Mi bosim stret olgeta samting. Na God i tokim yumi tu olsem, Mi holi na Mi bosim stret olgeta samting.

Habakuk i lainim dispela samting – God Em i holi na Em i bosim stret olgeta samting. Na Habakuk i lainim ol sampela samting moa, na dispela samting moa i pas long dispela trupela tok, God Em i holi na Em i bosim stret olgeta samting. Na yumi tu yumi ken i lainim ol sampela samting moa long dispela tok long sapta 1:12 – sapta 2:20. Mi makim 2-pela samting moa yumi ken i lainim.

1. Yumi papa bilong olgeta sin yumi save mekim.

God Em i holi na stretpela olgeta. Na Em i no papa bilong pasin nogut. Nogat. Ol lain Babilon ol i papa bilong sin ol i save mekim. Ol yet ol i papa bilong sin bilong ol yet. Na long dispela as tasol God bai mekim save long ol.

Yes God i yusim ol dispela lain Babilon bilong mekim save long ol lain Juda, tasol dispela i no minim olsem God Em i papa bilong pasin nogut ol i save mekim. Nogat tru. Ol yet ol i papa bilong pasin nogut ol i save mekim.

Na wankain olsem, yumi yet yumi papa bilong sin yumi save mekim. Yumi no inap ranawe long sin yumi yet i save mekim. Yumi yet yumi papa bilong sin yumi save mekim, em i no narapela samting. Nogat. Yumi yet yumi papa bilong sin bilong yumi yet.

Sapos yu mekim pasin pamuk, orait yu no ken i tok olsem, “Ai sori tru, em i no mi i tingting long mekim pasin pamuk. Nogat. Meri ya i grisim mi na mi slip wantaim em. Olsem na, mi no papa bilong dispela sin mi wokim. Nogat. Meri tasol i pulim mi. Meri i wokim rong.”

Yu no ken i mekim dispela kain toktok. Long wanem? Yu save, sapos wanpela meri i grisim yu, orait yu ken i tok “nogat.” Yu man. Yu ken i tok “nogat” na stopim dispela kain pasin na i no ken i kamap. Sapos yu tok “yes” orait yu papa bilong dispela sin na yu no ken i makim meri na tok olsem, “Meri i strong tumas.” Nogat. Yu yet yu papa bilong sin yu yet i save mekim.

Na wankain long olgeta sin yumi mekim. Yumi yet yumi papa bilong sin yumi save mekim. Em i no narapela manmeri i papa bilong sin bilong yumi. Nogat. Em i no Satan i papa bilong sin yumi save mekim. Nogat. Na em i no narapela samting i papa bilong sin yumi save mekim. Nogat tru. Yumi yet yumi papa bilong sin yumi yet i save mekim. Yumi yet yumi ona bilong sin yumi yet i save mekim.

2. Long ai bilong God sin em i sin.

Habakuk i bin tingim olsem, “Yes, mipela gat sin, tasol sin bilong ol lain Babilon i bikpela moa moa yet.” (Lukim Habakuk 2:13.)

Yu save, Habakuk i tingim olsem, “Yes, ol lain Juda i givim baksait long God, tasol ol i no olsem ol lain Babilon. Nogat. Ol lain Babilon ol i givim baksait long God olgeta na sin bilong ol i bikpela olgeta. Tasol, mipela nogat. Mipela givim baksait long God liklik tasol na sin bilong mipela i liklik tasol.”

Tasol dispela i paul tingting. Sin em i sin, maski husat lain manmeri i mekim. Pasin bilong givim baksait long God em i pasin bilong givim baksait long God tasol. Em olsem na, God bai mekim save long sin bilong ol lain Juda na God bai mekim save long sin bilong ol lain Babilon tu.

Long ples bilong yumi, sampela lotu manmeri i save sanap na tok olsem, “Yupela i stap autsait long lotu God bai mekim save long yupela long sin bilong yupela.” Em olsem na, ol i tingim olsem God i no inap mekim save long ol long sin ol yet i mekim. Pasin bilong ol sampela lotu manmeri i wankain olsem pasin bilong ol manmeri i stap autsait long lotu. Tasol, lotu manmeri i tingim olsem pasin bilong ol i gutpela liklik na pasin bilong ol manmeri i stap autsait i nogut olgeta.

Na yumi tu yumi kisim paul tingting olsem. Ating, sampela taim yumi pilim olsem, sin bilong ol narapela manmeri i winim sin bilong yumi. Em olsem na, yumi tingim olsem, taim yumi wokim sin em i orait liklik, tasol taim narapela man i wokim sin em i mekim bikpela sin pasin nogut tru.

Yumi mas save olsem, pasin pamuk em i pasin pamuk maski misin manmeri i mekim o manmeri i stap autsait long misin i mekim. Na pamuk pasin em i pamuk pasin maski wanpela bilong yumi i mekim o ol narapela manmeri i mekim.

Yu no ken i tingim olsem, pasin pamuk bilong yu i orait liklik na pasin pamuk bilong narapela man i pasin nogut tru olgeta. Yu no ken i tingim olsem, stil pasin bilong yu i orait liklik na stil pasin bilong narapela manmeri i pasin nogut tru olgeta. Yu no ken i tingim olsem, taim yu kisim narapela meri yu mekim pasin i orait liklik na taim ol narapela manmeri i kisim narapela meri ol i mekim bikpela pasin nogut tru. Yu no ken i tingim olsem, spak pasin bilong sampela pasta i pasin nogut tru na spak pasin bilong yu i orait liklik. Nogat.

Long ai bilong God spak pasin em i spak pasin, na stil pasin em i stil pasin, na pasin bilong kisim tupela meri em i pasin bilong kisim tupela meri, na pamuk pasin em i pamuk pasin. Pasin nogut em i pasin nogut, maski yu mekim o narapela manmeri i mekim. Sin pasin em i sin pasin tasol.

Yumi tok pinis olsem, God Em i stretpela na holi. Sapos God i tingim sin bilong yu i orait liklik na sin bilong narapela man i bikpela sin tru, orait God i no holi na God i no stretpela.

Habakuk i klia olsem God Em holi na Em i stretpela. Na God i soim olsem, dispela i minim olsem God bai mekim save long olgeta manmeri i givim baksait long Em na i mekim sin, maski ol i lain Juda o lain Babilon o lain PNG o lain Australia o ol narapela lain.

Orait, nau yumi harim sampela gutnius stret…

Ol manmeri i bilipim na trastim feitful wok bilong Jisas long diwai kros na ol i tanim bel na bihainim Em, orait ol i no inap pret long God i mekim save long ol long sin bilong ol. Long wanem? God i bin kotim na stretim pinis olgeta sin bilong ol.

Harim. Olgeta sin bilong ol, inap long taim mama i karim ol i go inap long taim ol i dai, olgeta sin bilong ol God i bin kotim pinis. Olsem na ol i no inap lukim kot na ol i no inap lukim belhat bilong God.

Lukim Rom 3:25 wantaim 2 Korin 5:21….

²⁵God i bin salim Krais Jisas i kam, na Krais Jisas i kisim pe bilong sin na Em i dai, na blut bilong Em i kapsait bilong tekewe belhat bilong God long sin bilong manmeri i bilipim na trastim Krais Jisas.

²¹Krais yet i no save liklik long sin. Tasol, bilong helpim yumi, God i mekim Em i kamap sin samting. God i mekim olsem bai yumi, long wok bilong Krais, i ken i kamap stretpela manmeri bilong God.

Yu save, God i bin transferim olgeta sin bilong ol i go long Jisas na God i bin kotim Jisas long sin bilong ol. God i bin mekim save long Jisas long sin bilong ol. Long dispela as tasol Jisas i kisim bagarap long diwai kros na Em i dai. Em olsem na Jisas i bin kisim kot pinis na Em i kisim pe pinis bilong ol manmeri i tanim bel na i bilipim na trastim feitful wok bilong Jisas long diwai kros na i bihainim Em.

Olsem na, long dispela as ol manmeri i tanim bel na bihainim Jisas ol bai amamas long De bilong kot bilong God. Long wanem? Kot bilong ol i no gat. Jisas i bin pinisim pinis kot bilong ol na ol i no inap lukim belhat bilong God long sin bilong ol. God i no inap mekim save long ol bikos Em i bin mekim save pinis long Jisas long sin bilong ol. Olsem na, ol i no inap pret long De bilong kot bilong God. Lukim tok bilong Jisas long Jon 5:24….

²⁴Tru tumas, Mi tokim yupela, Man i harim tok bilong Mi, na i bilip long God i bin salim Mi i kam, em i gat laip i stap gut oltaim oltaim. Em bai i no gat kot. Nogat. Em i lusim sait bilong i dai na em i kamap insait long laip pinis.

Yes, God bai mekim save long ol manmeri i mekim pasin nogut. Na yes, God bai kotim ol manmeri i givim baksait long Em. I gat De bilong ol dispela samting i stap.

Tasol manmeri i bilipim na trastim feitful wok bilong Jisas long diwai kros na i tanim bel na bihainim Em, orait God i no inap mekim save long ol. Long wanem, God i kotim Jisas long sin bilong ol na long dispela as Jisas Em i dai long diwai kros.

Na yu? Yu stap olsem wanem? Yu stap long wanem sait?

Em tasol.